Dŭm hruê knhal jih mlan 3, ti êlan dơ̆ng êran pral Khánh Hòa – Ƀuôn Ama Thuôt, kdrêč găl wăl dliê mrô 1148, ti kdrêč dliê alŭ Ea Rơt, să Čư̆ Pui, kdriêk Krông Bông, êbeh 30 čô dôk mă bruă mbĭt hŏng êdeh edâo ktrŏ mơ̆ng Êpul grŭp Đạt Phương dôk ngă bruă mjêč. Ayŏng Vũ Đức Hùng, knuă druh hdră mnêč mơ̆ng knơ̆ng bruă brei thâo: Anei jing hdră XL03 hlăm kdră kdrêč mrô 1, hŏng 14km găn dliê truh ti ƀăng mur Phượng Hoàng. Ƀiadah, truh knhal jih wưng tlâo mlan tal 3 thŭn dih, knơ̆ng bruă mrâo dưi jao anôk ala mă bruă, ngă kơ klei mă bruă êmưt hlăm brô 30%.

“Knơ̆ng bruă dôk mă bruă dua nah jing ƀăng bhă yŭ leh anăn ƀăng bhă ngŏ. Ti ƀăng bhă yŭ mă bruă mơ̆ng mlan 9/2024, lu jing mdơ̆ng kban leh anăn ƀăng mur, ti ƀăng jang ngŏ mă bruă mơ̆ng mlan 2/2025 leh anăn knŏng mâo mă ƀiă %. Ară anei ăt dôk kpăk hŏng êbeh 3ha lăn dliê hlăm ênhă ka dưi bi mlih. Hmei hmăng hmưi dưi bi mlih pral čiăng ngă bruă găl hĭn”.

Hdră kdrêč 2 mrâo ênoh bi liê êbeh 10.436 êklai prăk, mâo boh taih giăm 40km, kčưm mơ̆ng wăl krah Ninh Hoà, čar Khánh Hòa, găn dŭm kdriêk M’drak, Krông Bông leh anăn Ea Kar mơ̆ng čar Dak Lak. Anei jing hdră kdrêč mâo ênoh duh bi liê lu hĭn, mơ̆ng êpul kriê dlăng hdră êlan mrô 6 – Phŭn bruă mkŏ mkra jing pô duh bi liê. Ƀiădah, klei ngă bruă tinei ară anei êmưt mơ̆ng 12 – 17%,  hluê si kdrêč bruă.

Nguyễn Thanh Tú, k’iăng khua êpul gĭt gai êpul grŭp Đèo Cả brei thâo, ară anei dôk ngă kdrêč bruă XL01, mâo boh taih 11km, mâo ƀăng mur Phượng Hoàng mâo boh taih 1,7km, 10 kban gưl 1 leh anăn 5,6km êlan…ênoh duh kơ kdrêč bruă 3.083 êklai prăk. Hlăm 4 ƀăng mur srăng ngă bruă, ƀăng mur nah điâo tĭng Khánh Hòa ăt ka dưi pŏk kyua dôk kpăk 1,9ha lăn dliê ka dưi bi mlih. Êngao kơnăn, kdrêč ta luy ti nah hnuă ƀăng mur yŭ čar Dak Lak ăt dôk kpăk hŏng lăn mkra mjing mơ̆ng đa đa gŏ sang ka dưi mgaih msir leh.

“Bi čar Dak Lak, ară anei ênhă êbeh 6000m2 ka dưi bi klă hdră êlan hrui wĭt leh anăn mâo hdră êlan čiu tla kơ mnuih ƀuôn sang. Diñu mñă kơ phung ngă bruă mdei êjai klei ngă bruă ti ênhă anei. Bi čar Khánh Hoà, hmei mrâo pŏk ƀăng mur nah hnuă hlăk hruê 15/3 mrâo êgao, nah điâo ăt dôk guôn hdră êlan bi klă knhal tuč, leh anăn kơh tŭ mă anôk ala, leh anăn ba êdeh êdâo, kdrăp yua ngă bruă”.

Hlăm 3 hdră kdrêč êlan dơ̆ng êran pral Khánh Hòa – Ƀuôn Ama Thuôt, hdră găn čar Dak lak mâo klei ngă bruă pral ƀiădah ăt tuôm hŏng lu klei kpăk hlăm bruă ruh mgaih anôk ala, boh tâo rŭ mjing, anôk mă lăn hli, êlan klei pui kmlă leh anăn boh klei djah djâo.

Nguyễn Thiên Văn, k’iăng khua bruă sang čư̆ êa čar Dak Lak brei thâo, čar dôk gĭt gai ktang phĭt ruh mgaih dŭm klei kpăk gun djŏ tuôm hŏng anôk mă lăn, boh tâo leh anăn êlan klei pui, mñă kơ gưl kdriêk, să mjêč ngă klei blŭ hrăm, mtrŭt dŭm gŏ sang ba jao anôk ala:

“Hmei gĭt gai leh êpul kriê dlăng hdră, phung ngă bruă, bruă sang čư̆ êa kdriêk Krông Pač leh anăn dŭm knơ̆ng, dhar bruă mtrŭt bi pral klei mkăp brei lăn kơ anôk ngă bruă. Bi kơ klei kƀah boh tâo rŭ mjing, čar bi tŭ ư hŏng êpul kriê dlăng čar Dak Lak leh anăn phung duh bi liê, mbĭt hŏng êpul kriê dlăng hdră mrô 6, ba mdiăng boh tâo mơ̆ng hdră kdrêč mrô 2 wĭt kơ hdră kdrêč mrô 3 čiăng mtrŭt bi pral klei mă bruă. Bi kơ êlan klei pui kmlă sơwil, bruă sang čư̆ êa kdriêk gĭt gai leh dŭm să pral ngă bruă, đru kơ mnuih ƀuôn sang, mkŏ mjing klei găl kơ phung mă  bruă”.

Truh kơ ară anei, hdră kdrêč tal 1 mơ̆ng čar Khánh Hòa jing pô duh bi liê dưi ba jao giăm 93% anôk ala, ƀiădah klei ngă bruă knŏng mâo mă ka truh 49%, êmưt 8,3% mkă hŏng hdră kčah. Hdră ară anei kpăk gun ti 15 bĭt anôk ruh mgaih anôk ala, bruă mbĕ đuê̆ bruă mkŏ mkra msĕ sĭ gơ̆ng pui kmlă, klei dăng dông, pui mtrang mñgač…ăt dôk tuôm hŏng klei dleh dlan. Đinh Văn Thiệu, k’iăng khua bruă sang čư̆ êa čar Khánh Hòa, ktrâo klă dŭm klei dleh kpăk čiăng ruh mgaih kơ hdră:

“Hlăm ênoh 42 gŏ sang, mâo 18 gŏ sang dăp anôk dôk mrâo. Ară anei lăn anôk dôk mrâo mâo leh čar Khánh Hòa dăp djăp kơ phung dôk mrâo. Bi hŏng 24 gŏ sang amâo mâo dăp anôk dôk mrâo, čar srăng mgaih msir jih hnơ̆ng êlâo kơ hruê 30/3 anăp anei. Tơdah dŭm gŏ sang amâo mâo tŭ ư hdră êlan tla hnô ba jao anôk ala, srăng ngă klei mgô̆ hluê si hdră bhiăn, kyudah amâo lŏ mâo êlan mkăn ôh.”

Truh kơ ară anei, êlan dơ̆ng êran pral Khánh Hòa – Ƀuôn Ama Thuôt dưi rŭ mjing giăm dua thŭn, knar hŏng mkrah wah mmông ngă hdră. Ƀiădah lu anôk kpăk mơ̆ng mphŭn hlăm hdră anei ăt dôk mâo. Anei jing klei kpăk prŏng hŏng mta kñăm bi leh ti knhal jih thŭn 2026 leh anăn ba yua ti akŏ thŭn 2027 mâo Khua knŭk kna bi êdah leh.