Hlue si klei hâo hưn hlăm anôk bi kƀĭn, wưng 2021-2025, dŭm čar Lăn Dap Kngư mâo gưl dlông jao êbeh 11.700 êklai prăk čiăng hlue ngă 3 hdră kñăm ala čar. Ênoh prăl anei mâo êbeh 11,73% ênoh bi liê mđĭ kyar mơ̆ng gưl dlông kơ 3 hdră bruă ala čar hlăm kluôm ala. Hjăn thŭn 2022, gưl dlông mkăp êbeh 3.878 êklai prăk leh anăn dŭm čar Lăn Dap Kngư jao leh 877,024 êklai prăk knŭk kna alŭ wăl čiăng hlue ngă dŭm hdră bruă. Truh 31/12/2022, dŭm čar krĭng mrâo bi liê 34,77% ênoh prăk gưl dlông jao, (ƀiă hĭn 2,96% mkă hŏng hnơ̆ng bi liê kah knar kluôm ala). Mlan 1.2023 , mâo leh 3 hlăm êboh 5 čar jing Kon Tum, Lâm Đồng, Dak Nông bi leh mbha prăk bi liê mơ̆ng thŭn.

 Hâo hưn hŏng K’iăng Khua knŭk kna kơ boh sĭt pŏk ngă dŭm hdră, dŭn alŭ wăl krĭng Lăn Dap Kngư mâo lu klei gun kpăk, msĕ si kƀah hră mơar ktrâo lač jar mơ̆ng gưl dlông; đa đa ktrâo lač, kčah mtrŭn ƀiădah hdră thâo săng ka bi tŭ ư ôh amâodah ka djŏ guôp ôh hŏng boh sĭt ti krĭng Lăn Dap Kngư leh anăn grăp alŭ wăl. Nguyễn Thị Thanh Lịch-  K’iăng Khua Knơ̆ng bruă sang čư̆ êa čar Gia Lai brei thâo:

     “Ară anei, hdră mkŏ mkra čiăng ngă hrăm mbĭt dŭm klei ktrâo lač mơ̆ng Knŭk kna, phŭn bruă leh anăn alŭ wăl adôk mâo lu klei dleh dlan. Tal dua, dŭm hnơ̆ng kčah mkŏ mjing, dŭm mta ka djŏ guôp hŏng klei găl bruă duh mkra ala ƀuôn ti Gia Lai. Bruă tal tlâo jing pŏk ngă mguôp ênoh prăk bi liê, hnơ̆ng kčah, ktrâo lač čiăng hlue ngă tŭ dưn, jing phŭn mđĭ kyar bruă duh mkra- ala ƀuôn dôk gun kpăk.”

 Mơ̆ng boh sĭt dŭm klei gun kpăk ti lăn Dap Kngư khua gĭt gai dŭm čar kčĕ dŭm hdră msir čiăng kơ knŭk kna ksiêm dlăng. Nguyễn Hưũ Tháp- K’iăng Khua Knơ̆ng bruă sang čư̆ êa čar Kon Tum lač:

“Dŭm klei kčĕ tinei jing hnưm bi leh hdră kčah kơ klei bi mguôp prăk bi alŭ wăl. Tal dua jing hnưm bi leh hnơ̆ng, ktrâo lač, hlăm anăn mâo lăn dôk, lăn mkra mjing kơ mnuih ƀuôn sang, boh nik krĭng taih kbưi. Hlăm mmông dôk guôn klei ktrâo lač klă klơ̆ng hĭn, čar ăt kƀĭn pŏk ngă hlue si hdră kčah čiăng rơ̆ng hdră kñăm hdră kčah leh anăn kƀĭn msir mgaih rơ̆ng hnơ̆ng prăk bi liê.”

Leh hmư̆ dŭm alŭ wăl hưn mdah, klei kčĕ, K’iăng Khua knŭk kna Trần Lưu Quang cih yap leh anăn bi mni kơ dŭm bruă dŭm čar Lăn Dap Kngư dưi ngă leh, mjing klei găl hlue ngă bruă kơ anăp. K’iăng Khua knŭk kna mtă kơ dŭm alŭ wăl hnưm bi leh bruă jao prăk bi liê, ba yua prăk bi liê djŏ guôp hŏng djăp hdră, klei čiăng mơ̆ng dŭm anôk bruă, phŭn bruă gưl dlông ksiêm dlăng, bi leh dŭm klei kčah mtrŭn adôk kƀah. Kơ alŭ wăl, K’iăng Khua knŭk kna mtă lŏ dơ̆ng mđĭ pral dŭm bruă dôk ngă; mđĭ ktang bruă  bi hgŭm plah wah dŭm alŭ wăl leh anăn phŭn bruă gưl dlông leh anăn bruă bi hgŭm hlăm dŭm anôk bruă mơ̆ng grăp alŭ wăl hlăm bruă pŏk ngă:

        “Kâo mtă, ti alu wăl Khua Knơ̆ng bruă sang čư̆ êa čar amâodah K’iăng Khua Knơ̆ng bruă sang čư̆ êa čar klam bruă dŭm hdră srăng jing pô gĭt gai, dôk ti krah dŭm anôk bruă čiăng mâo klei blŭ msir mgaih. Hŏng bruă jing K’iăng Khua knŭk kna, Khua gĭt gai gưl dlông, kâo srăng jing pô gai bruă dôk mbĭt hŏng dŭm alŭ wăl leh anăn phung khua phŭn bruă, k’iăng khua phŭn bruă ka tŭ ư klei mĭn, čiăng kơ phung diih jhŏng ngă. Čang hmăng dŭm alŭ wăl tui hriăm klei thâo, mâo alŭ wăl brei čan pral, ngă jăk snăk. Ăt mơ̆ng tur knơ̆ng klei bhiăn anăn snăn kơ klei mĭn jing diñu ăt mâo hdră ngă, klei thâo drei tui hriăm.”

 K’iăng Khua knŭk kna Trần Lưu Quang ăt lač, wưng čiăng bi leh dŭm Hdră kñăm ala čar mâo mâo lu ôh, dŭm alŭ wăl krĭng Lăn Dap Kngư brei kƀĭn pŏk ngă leh anăn prak msir mgaih klei êdu kƀah; mbŏ dŭm bruă dôk kƀah leh anăn bi leh hlăm gưl I/2023. Knhal jih klei bi kƀĭn, K’iăng Khua knŭk kna Trần Lưu Quang mâo hră mơar gĭt gai dŭm phŭn, dhar bruă, alŭ wăl ngă mtam dŭm bruă klă klơ̆ng, mâo wăt hruê mmông hưn hŏng Knŭk kna./.