Aguah mbruê 16/4, dŭm êbâo čô knưa druh, đảng viên čar Kon Tum nao hlăm klei kƀĭn trông online kluôm ala kơ bruă hyuă kjăp, hluê ngă hdră mtrŭn Klei kƀĭn trông tal 11 mơ̆ng Êpul khua bruă Đảng gưl dlông gưl 13.

Mkŏ mjing klei găl čiăng kơ đảng viên dưi mâo klei hưn, Kon Tum mkŏ mjing 121 anôk bi kƀĭn mơ̆ng gưl čar truh kơ gưl să. Čŏng pô hluê ngă hdră mtrŭn klei kƀĭn trông tal 11, êlâo anăn, ti wăl krah Măng Đen, kdriêk Kon Plông, Êpul khua bruă Đảng čar Kon Tum leh anăn Quãng Ngãi mkŏ mjing leh klei kƀĭn trông hluê ngă hdră êlan mơ̆ng gưl dlông kơ bruă bi mŭt 2 čar. Dua čar bi tŭ ư mkŏ mjing 6 êpul ngă bruă čiăng pral ngă dŭm mta phŭn bruă klam.

  Knơ̆ng bruă sang čư̆ êa čar Dak Lak mâo leh Hdră kčah mkŏ mjing mă klei blŭ mguôp phung bi ala kơ mnuih ƀuôn sang hŏng boh phŭn Hdră bruă dăp, bi mŭt anôk bruă ngă hră mơar gưl čar, gưl să. Hlue anăn, bruă mă klei blŭ mguôp dưi ngă hŏng klei mbha hră truh kơ phung bi ala gŏ êsei. Wưng mkŏ mjing mă klei blŭ phung bi ala kơ mnuih ƀuôn sang jing hruê 20/4.

Leh anăn, Knơ̆ng bruă sang čư̆ êa gưl să, kdriêk leh âwn Knơ̆ng bruă kriê dlăng bruă knuă Dak Lak ngă bruă bi klin, hưn mdah boh tŭ, rơ̆ng hnơ̆ng hưn mdah hŏng Êpul gơ̆ng bruă ƀuôn sang dŭm gưl ksiêm dlăng mơ̆ng hruê 21 truh 24/4.  Knơ̆ng bruă sang čư̆ êa čar Dak Lak mtă kơ dŭm alŭ wăl pŏk ngă bi jăk, djŏ hdră, rơ̆ng klă mngač leh anăn djŏ hnơ̆ng, mơ̆ng anăn mjing klei sa ai hlăm mnuih ƀuôn sang hŏng bruă dăp dŭm anôk bruă knŭk kna ti alŭ wăl.

Čar Dak Nông bi êdah leh 8 hdră bhiăn yuôm bhăn čiăng ngă bruă mkŏ dăp anôk bruă knŭk kna gưl să hŏng tur knơ̆ng rơ̆ng kơ klei kjăp, kreh knhâo, djŏ hdră bhiăn. Hdră bhiăn tal êlâo jing rơ̆ng kơ klei gĭt gai kluôm dhuôm mơ̆ng Đảng hlăm bruă mkŏ dăp anôk bruă gưl să. Hdră bhiăn tal 2 jing hluê ngă djŏ hdră bhiăn phŭn, klei bhiăn lăn čar  leh anăn klei čuăl mkă dưi bi klă.

Tal 3 jing mđing tal êlâo mkŏ dăp anôk bruă ka djăp hnơ̆ng čuăn kơ ênhă amâodah ênoh mnuih ƀuôn sang hluê si hdră mtrŭt mơ̆ng Dhar Bruă Kƀĭn Ala. Hdră bhiăn tal 4 jing tĭng kơ klei găl mâo, bruă mkŏ mkra, wăl đĭ kyar čiăng bi lar jing hnơ̆ng klei găl alŭ wăl leh bi mŭt mbĭt. Tal 5 jing amâo mâo bi mlih kdriêk. Tal 6 jing bruă mkŏ dăp anôk bruă knŭk kna nao mbĭt hŏng bruă bi kluôm mnuih mă bruă hŏng hdră khuăt, ngă bruă tŭ dưn. Tal 7 jing amâo mâo dưn yua hdră bhiăn hnơ̆ng čuăn wăl krah. Sa hdră bhiăn yuôm bhăn mkăn mâo čar Dak Nông ba mdah jing ngă jăk bruă hâo hưn, mtrŭt mjhar, mă klei blŭ mguôp mnuih ƀuôn sang čiăng mkŏ mjing klei sa ai, klei bi tŭ ư hlăm yang ƀuôn kơ bruă mkŏ dăp gưl să.