Hlăm giăm 3000 êdam êra čar Dak Lak nao mŭt kahan tal anei mâo 2.502 čô ngă bruă lĭng kahan leh anăn 466 čô hlăm êpul kahan ksiêm. Hlăm anăn 15% mâo gưl hriăm gưl prŏng, gưl krah, 3 čô mniê. Bi ti Dak Nông, thŭn anei mâo 852 čô kahan leh anăn 265 čô hlăm êpul kahan ksiêm yang ƀuôn. Knăm jao kahan ti Dak Nông dưi mkŏ mjing ti 8 kdriêk, ƀuôn prŏng, klă sĭt jing knăm mơak mŭt kahan. Čar ăt ngă jăk bruă đru nah tluôn kơ lĭng kahan, boh nik êmuh hrăm, mđĭ ai mnuih ƀuôn sang hơĭt ai tiê, klei mĭn nao mŭt kahan.

Ti čar Gia Lai, klei nao jao kahan mrâo thŭn anei mâo 2.250 čô hlăk ai nao mŭt lĭng kahan, 400 čô hlăk ai nao mŭt ngă kahan ksiêm, 30% ênoh hlăk ai ngă hră akâo nao mŭt kahan. Tui si Êpul gơ̆ng bruă hrŏng mŭt kahan, dŭm alŭ wăl ti Gia Lai mâo hdră mkăp bi djăp ênoh čoh čuăn, dưi ngă djŏ hŏng klei bhiăn. Bi Kon Tum, hlăm aguah mbrue 8/2, jih jang 10 kdriêk ƀuôn prŏng hlăm čar bi mkŏ mjing sơăi bruă jao kahan thŭn 2023.

Hlăm ênoh 754 čô hlăk ai mơ̆ng čar Kon Tum nao mŭt kahan, mâo truh 19 hlăk ai ngă hră akâo nao mŭt kahan, mâo 4 čô mniê, lehanăn 12 čô mâo hnơ̆ng hriăm gưl prŏng, gưl krah. Klei suaih pral djăp hnơ̆ng čuăn mrô 1 êbeh 60%. Hŏng klei prăp êmiêt djăp ênŭm, knăm jao kahan thŭn anei ti dŭm kdriêk, ƀuôn prŏng čar Kontum mâo mkŏ mjing djŏ klei bhiăn, mjing leh ai êwa jăk mơak hlăm êpul hlăk ai nao mŭt kahan pioh răng mgang lăn čar./.