Adŭ mjuăt bi hriăm maketing mâo Êpul hgŭm bruă ti Dak Lak mkŏ mjing ti dŭm anôk rang mdah, hưn mthâo mnơ̆ng dhơ̆ng mŏng Êpul hgŭm bruă. Dŭm ƀĭng ngă lŏ hma knŏng juăt mưng hŏng pưk hma, ară anei raih leh dŭm hdră ngă hlăm đĭng blŭ djă hiu ênuk mrâo. Diñu ruah anôk mkra bi siam, ruah kiêng mă rup mnơ̆ng dhơ̆ng lehanăn čih klei hưn mthâo. Knhal tuič diñu “Hưn čhĭ” hlăm wăl anôk mnia mblei điện tử. Nao hgŭm hlăm adŭ anei, ayŏng Lê Văn Việt, mnuih hgŭm hlăm Êpul hgŭm bruă Bazan, kdriêk Krông Pač, čar Dak Lak brei thâo:

Êlan hla pŏk web yang ƀuôn lehanăn wăl anôk mnia mblei điện tử ară anei jing hdră arăng dôk ngă lu. Tơdah drei amâo ngă, amâo ñŭ kma hŏng hdră anei snăn drei srăng dôk ti tluôn mtam. Kơ klei êpul hgŭm bruă ñŭ kma hlăm êlan mạng yang ƀuôn amâo dah dŭm wăl anôk mnia mblei điện tử srăng jing klei găl prŏng kơ êpul hgŭm bruă. Kyua hdră anei srăng đru hưn mthâo kơ mnuih blei yua hlăm êlan hla pŏk web yang ƀuôn, ƀuh mnuih sĭt, bruă ngă sĭt, mnơ̆ng dhơ̆ng sĭt”.

Phung nai ktrâo lač kơ hdră mă rup, mdar video mnơ̆ng dhơ̆ng hŏng đĭng blŭ djă hiu

Thân Cư, Kơiăng khua Êpul hgŭm bruă lŏ hma Công Bằng Čư̆ Dliê Mnông, kdriêk Čư̆ Mgar, čar Dak Lak brei thâo, êpul hgŭm dưi mkŏ mjing hlăm thŭn 2012. Truh kơ ară anei, êpul hgŭm mâo 114 čô hgŭm, hŏng êbeh 230 ha lăn pla kphê, tiu lehanăn durian. Tơdah êlâo adih, êpul hgŭm knŏng juăt mưng hŏng bruă mkăp mjeh, mnơ̆ng yua, hbâo pruê, đru kơ hdră mnêč mrâo mrang đru kơ ƀĭng ngă lŏ hma pla mjing mnơ̆ng mâo djăp hnơ̆ng čuăn, snăn ară anei diñu dôk păn bruă klam mrâo, jing pô phŭn hlăm hdră bi mguôp bruă pla mjing hŏng wăl anôk mnia mblei, hưn mthâo mnơ̆ng dhơ̆ng ti alŭ wăl. Bruă ba yua kdrăp mrô hlăm klei hưn mthâo mnơ̆ng dhơ̆ng đru leh kơ êpul hgŭm dưi bi mjĕ hŏng wăl anôk mnia mblei pral hĭn. Thân Cư lač snei:   

“Brei drei mđĭ hnơ̆ng tŭ bruă pla mjing mguôp hŏng klei thâo ba yua kdrăp 4.0, thâo hdră čhĭ mnơ̆ng, bi mjĕ hŏng wăl anôk mnia mblei, maketing čiăng ba čhĭ mnơ̆ng hlăm wăl anôk mnia mblei, brei lu mnuih thâo mnơ̆ng pô pla mjing jăk mơ̆ amâo dah hơaĭ. Tơdah drei ngă jăk ƀiădah amâo mâo klei bi trông, amâo hâo hưn srăng jing klei luič liê prŏng kơ drei”.

Phạm Thanh Tuấn, nai mtô kơ Hdră mphŭn čô̆ kơ bruă mĭn mrâo ala čar, jing pô đru ktrâo lač leh kơ ƀĭng ngă lŏ hma Dak Lak ba yua hla pŏk web yang ƀuôn, wăl anôk mnia mblei điện tử lehanăn kdrăp mrâo čiăng hưn mthâo truh kơ phung tuê blei yua mâo klei găl lehanăn lač: Hdră bi mlih mrô hlăk dôk nao truh ti grăp đang war, truh ti grăp kiê kngan ƀĭng ngă lŏ hma. Bi mlih mrô ăt mjing klei thâo săng mrâo, sa hdră ngă mrâo hlăm bruă pla mjing, kriê dlăng lehanăn bi mklă anăn knăl.

“Ară anei mnuih blei yua mâo klei đăo knang hlăm mnuih pla mjing, mkra mnơ̆ng dhơ̆ng, kyua knŏng diñu klă phŭn agha hdră pla mjing. Kyua lu thŭn pla mjing snăn diñu jing leh pô thơ̆ng kơ bruă pla mjing mnơ̆ng diñu. Tal dua jing bi mlih klei thâo săng mơ̆ng ƀĭng ngă lŏ hma diñu amâo lŏ guôn kơ pô tal 3 čiăng hriê hrui blei mnơ̆ng dhơ̆ng. Tơdah sui hŏng anei 5 thŭn lač mnuih ƀuôn sang drei bi mnia blei hlăm wăl anôk blei mnia điện tử amâo dah livestream yơh, amâo dah bi hgŭm hŏng mnuih blei yua hlăm tar rŏng lăn snăn klei anei jing dleh snăk. Ƀiădah ară anei, bruă anei jing klei dôk mâo lu leh.

        Mnuih hgŭm hlăm êpul hgŭm bruă hluê ngă leh leh mjuăt bi hriăm ti adŭ hriăm mtam

Hluê si Lê Văn Dần, Kơiăng khua Êpul hgŭm bruă lŏ hma čar Dak Lak, hlăm wăl anôk blei mnia bi ktưn msĕ ară anei, mbĭt hŏng bruă bi mrâo mrang hdră pla mjing, dŭm êpul hgŭm bruă ăt mtrŭt mđĭ klei ba yua kdrăp mrâo hlăm bruă hưn mthâo, blei yua mnơ̆ng dhơ̆ng hlăm wăl anôk mnia mblei điện tử. Hlăm wưng êgao, êpul hgŭm bruă čar mkŏ mjing leh lu adŭ mjuăt bi hriăm kơ klei thâo bi mnia mblei hlăm kdrăp mrô, mđĭ kyar anăn knăl, mkŏ mjing pŏk rup kơ anôk bruă duh mkra, êpul hgŭm bruă. Hlăm wưng ti anăp, Êpul hgŭm bruă srăng lŏ dơ̆ng mkŏ mjing dŭm adŭ mjuăt bi hriăm kơ djăp mta ra bruă kñăm mkăp djŏ hŏng klei čiăng đĭ kyar mơ̆ng wăl anôk mnia mblei. Lê Văn Dần, hâo hưn snei:

“ Lŏ dơ̆ng mjuăt bi hriăm kah mbha lu adŭ čiăng kơ êpul hgŭm bruă thâo klă klei dôk mâo mơ̆ng wăl anôk mnia mblei điện tử mơ̆ng AI, leh kơnăn pŏk dŭm boh adŭ hưn mthâo klă klơ̆ng kơ grăp mta mnơ̆ng dhơ̆ng. Kyua grăp mta mnơ̆ng srăng mâo dŭm hdră ngă mdê mdê hlăm wăl anôk mnia mblei anei. Čiăng kơ êpul hgŭm bruă dưi dôk kjăp snăn brei drei mđĭ hdră hưn mthâo, hâo mdah lehanăn čhĭ mnơ̆ng online hluê hŏng tur knơ̆ng mrô msĕ ară anei. Boh nik, đru kơ dŭm êpul hgŭm bruă ti krĭng taih kbưi dưi mjĕ hŏng dŭm wăl anôk mnia mblei snei”.

Dŭm klei gĭr hlăm hdră mlih mrô mơ̆ng Êpul hgŭm bruă ti čar Dak Lak dôk đru mguôp mjing klei găl hlăm hdră kriê dlăng, đru bi hrŏ ênoh bi liê, mđĭ prăk mnga kơ êpul hgŭm bruă. Boh nik, klei ba yua kdrăp mrô hlăm bruă hưn mthâo mnơ̆ng dhơ̆ng hlăk dôk pŏk lu klei găl mrâo, wăl anôk mnia mblei mrâo, mđĭ boh tŭ yuôm lehanăn mkŏ mjing anăn knăl mnơ̆ng dhơ̆ng mơ̆ng čar Dak Lak./.