Ti Kon Tum, dŭm krĭng lăn hlăm klei bi blha jhat rai kyua klei bi blah, arăng bi rai jih klei hdĭp mda hŏng êa drao ruă msĕ si ti Sạc ly, Đăk Tô- Tân Cảnh… mtah mda mơ̆ng dliê leha năn ana pla mjing. Truh ară anei čar Kon Tum mđĭ kyar lu mta ana pla mjing phŭn msĕ si kphê êbeh 31.500 héc-ta; ksu êbeh 81.600 héc-ta; sâm Ngọc Linh giăm 3.000 héc-ta…  Kahan hđăp U Lý Hùng, ƀuôn Kon Năng Treang, să Đăk Ui, kdriêk Đăk Hà, lŏ bi hdơr:  “Leh hruê mtlaih êngiê thŭn 1975, jih jang mnuih ƀuôn sang, phung êdam êra nao jah rơ̆k ngă hma, mkra knơ̆ng kdơ̆ng êa, krih kơ ana pla mjing. Mơ̆ng anăn truh ară anei, klei hdĭp mnuih ƀuôn sang hlăm ƀuôn, hlăm să jăk leh, Lu gŏ sang mâo prăk hrui wĭt kjăp mơ̆ng ana pla mjing msĕ si kphê, kđuč, ksu leh anăn măk ka… anak čô dưi nao sang hră mơar.”

Hlăm ênuk mblah Mi, kdriêk Krông Bông, čar Dak Lak jing sa krĭng krŭ kdơ̆ng. Dŭm thŭn êgao , mâo lei duh bi liê mơ̆ng Đảng, Knŭk Kna, êlan klông tinei dưi bi kluôm, klei hdĭp mnuih ƀuôn sang ƀrư̆ hruê ƀrư̆ đĭ hĭn. Y Wơn Niê, khua ƀuôn Čư̆ Phiăng, să Hòa Phong, kdriêk Krông Bông hơ̆k mơak brei thâo:“Ti Ƀuôn Cư Phiăng êlan klông jing êlan ƀê tông, yua pui kmlă ala čar hŏng 72 gơ̆ng pui hlăm dŭm bĭt êlan, anei jing boh tŭ dưn klei duh bi liê mơ̆ng knŭk kna hŏng klei bi mguôp mơ̆ng mnuih ƀuôn sang”.

Hŏng mnuih Bahnar ti Gia Lai, klei hdĭp mda dôk mŭt hlăm wưng mrâo  ƀrư̆ jăk siam hĭn. A Gió, ti Plei Piơm, wăl krah Đăk Đoa, kdriêk Đăk Đoa, brei thâo, kyua mâo hdră kñăm ala čar mkŏ mkra krĭng ƀuôn sang mrâo, mđĭ kyar bruă duh mkra ala ƀuôn krĭng mnuih djuê ƀiă, bi hrŏ ƀun kjăp, mnuih Bahnar, mnuih djuê ƀiă đĭ kyar leh lu mta."Klei hdĭp mnuih ƀuôn sang hơĭt leh, anak čô dưi nao sang hră mơar. Lu gŏ sang dưi mkra sang prŏng siam, hŏng êdeh êdâo găn êrô, masin mrâo mrang, ruă duam dưi mdrao ti sang êa drao. Mnuih ƀuôn sang amâo lŏ dleh dlan ôh, prăk hrui wĭt mnuih ƀuôn sang hơĭt kjăp leh anăn trei mđao hĭn”.

Ti Kon Tum, truh kơ ară anei mâo 53 să ênŭm hnơ̆ng čuăn krĭng ƀuôn sang mrâo. A Theng, k’iăng khua Bruă sang čư̆ êa să Rờ Kơi, kdriêk Sa Thầy brei thâo, ti gŭ klei gĭt gai mơ̆ng Đảng, Knŭk Kna leh anăn dŭm gưl Bruă sang čư̆ êa, klei mă bruă knuă leh anăn klei hdĭp mnuih ƀuôn sang ƀrư̆ hruê ƀrư̆ mâo klei mlih: “Bruă mkŏ mkra ƀrư̆ hruê ƀrư̆ kdrưh kơăm, doh siam, ênhă lăn mă bruă dưi pŏk mlar, anak čô dưi nao sang hră mơar, klei êđăp ênang dưi rơ̆ng hơĭt hĭn mkă hŏng lu thŭn êlao. Bruă mkŏ wĭt ana pla mjing, mnơ̆ng rông dưi mđĭ kyar ktang.  Boh nik, mnuih ƀuôn sang pla lu ana mâo ênoh msĕ si durianm makka, kphê…,đru mđĭ hnư hrui wĭt leh anăn bi hơĭt klei hdĭp…

Čang hmăng ktuê dlăng bruă ngă ep ruĕ kahan bi hdơr 50 thŭn Hruê mtlaih êngiê kluôm kwar Dhŭng, hluh lir lăn čar, adei Điểu Nghuý, hđeh sang hră  mnuih djuê ƀiă knŭk kna rông ba kdriêk dak Rlâp, čar Dak Nông brei thâo: kâo ƀuh myun snăk kyua amĭ kkiêng hlăm ênuk  êđăp ênang. Hdơr kơ ênuk aduôn aê amâo hưi tuh êrah mčah klang bi blah răng mgang lăn čar, Điểu Nghuý bi êdah: “Kâo srăng gĭr hriăm hră jăk čiăng êdei anăp tơdah leh hriăm gưl 3 srăng mŭt hlăm sa sang hră kahan. Kâo čiăng hriăm hlăm sang hră kahan čiăng mjuăt pô, đru sa kdrêč ai ktang pô hlăm klei mkŏ mjing leh anăn răng mgang čar kwar. Kâo bi mĭn phung mda asei hmei brei hriăm bi jăk, bi gĭr ktưn čiăng lŏ čuê phung aduôn aê nao êlâo gĭr ktưn, bi knar hŏng dŭm ala čar prŏng hlăm 5 krĭng.”