Leh dŭm mmông dôk hriăm ti adŭ, adei Y Minh Tuyết, adŭ 5B ti Sang hră čiêm rông hđeh mnuih djuê ƀiă gưl sa Măng Cành, să Măng Cành, kdriêk Kon Plŏng pral rao kiê kngan mbĭt hŏng 187 čô hđeh mơ̆ng 8 boh adŭ nao ti anôk tŭk knă êsei djam hlăm sang hră. Mnơ̆ng ƀơ̆ng huă mơ̆ng phung nai tŭk knă kơ phung hđeh hruê anei mâo kan, čĭm lehanăn djam. Adei Y Minh Tuyết brei thâo:

          “Sang kâo ti ƀuôn Măng Pành. Kâo čiăng dôk ti sang hră êdi, mâo mtô mjuăt jing mnuih thâo, jăk ênang lehanăn dưi ƀơ̆ng huă djam jăk jĭn. Tinei huă ƀơ̆ng jăk hĭn mkă hŏng ti sang kyua ti sang amâo mâo čĭm kan msĕ tinei ôh”.

          Thŭn hriăm 2023- 2024 Sang hră čiêm rông hđeh mnuih djuê ƀiă gưl sa Măng Cành mâo 272 čô hđeh, hlăm anăn mâo 57 čô hđeh dôk dưn Hdră mtrŭn mrô 116 thŭn 2016 mơ̆ng Knŭk kna. Ti anăp ênoh hđeh adôk amâo dưi dưn hdră mtrŭn anei ƀiădah mâo klei hdĭp gŏ sang dleh dlan, sang kbưi kyua anăn Sang hră ăt brei phung hđeh anăn dôk huă, wăt 85 čô hđeh ti 6 anôk sang hră mkăn. Nai mtô Trần Thông, Khua Sang hră čiêm rông hđeh mnuih djuê ƀiă gưl sa Măng Cành brei thâo, bruă grăp hruê tŭk knă êsei djam kơ phung hđeh ngă kơ phung nai lŏ mâo bruă mă…suaĭ hĭn ƀiădah hlao mnơ̆ng ƀơ̆ng huă bŏ hŏng klei khăp čiăng đru leh kơ phung hđeh gĭr nao sang hră truh ti adŭ hriăm. 

 “Krơ̆ng kjăp klei huă ƀơ̆ng, tlam hriăm hră jăk găl êdi. Klei mdê tinei jing hlăm yan hjan tơdah amâo huă yang hruê tlam phung hđeh amâo lŏ nao sang hră ôh. Krơ̆ng kjăp hdră tŭk knă đru krơ̆ng kjăp ênoh hđeh nao sang hră hlăm mông hriăm tlam ti adŭ”.

Kơ klei dôk huă yang hruê dơ̆ng, phung hđeh dưi dưn Hdră mtrŭn mrô 116/2016/NĐ-CP hlăm thŭn hriăm 2023-2024 tĭng mâo 1.900 čô hđeh (mâo 829 čô hđeh gưl 1, 871 čô hđeh gưl 2) hlăm 14 êpul êya Sang hră čiêm rông hđeh mnuih djuê ƀiă. Dŭm sang hră čih mkra leh hdră kčah mkŏ mjing klei huă yang hruê. Čiăng krơ̆ng kjăp hdră tŭk knă kơ giăm 1.250 čô hđeh mâo mnuih ƀuôn sang đru rông ba ti 4 să, wăl krah, mâo: Măng Cành, Pờ Ê, Đăk Tăng lehanăn wăl krah Măng Đen, anôk bruă mtô bi hriăm kdriêk Kon Plŏng hluê ngă leh lu hdră msir lehanăn mâo klei sa ai mơ̆ng bruă sang čư̆ êa, dŭm êpul êya lehanăn phung mâo ai tiê kmah.

Klă klơ̆ng, hdră “Rông adei” mơ̆ng êpul đru Đăo knang lehanăn Hdră “Rông adei Lăn dap kngư” đru leh kơ 397 čô hđeh hŏng ênoh grăp čô 17.000 prăk/hruê; keh phung hđeh ƀun krĭng dlông Hdră bruă “Hlao mnơ̆ng ƀơ̆ng huă mâo čĭm” đru huă yang hruê dơ̆ng kơ 850 čô hđeh, hlăm anăn mâo 412 čô hđeh gưl điêt hŏng ênoh grăp čô 8 êbâo prăk lehanăn 438 čô hđeh gưl sa, gưl 2 mâo 10 êbâo prăk.

Êngao anăn, sang hră lŏ mtrŭt mjhar, iêu mthưr klei đru mguôp mơ̆ng lu phung đru, êpul êya bruă hlăm lehanăn êngao čar, phung amĭ ama đru braih, djam mtam, hruê ai kñăm mđĭ hnơ̆ng tŭ jăk mnơ̆ng ƀơ̆ng huă kơ phung hđeh, mjing klei jăk găl kơ digơ̆ h’ĭt ai tiê hriăm hră hlăm thŭn hriăm 2023-2024.  Nai mtô Nguyễn Minh Cường, Khua adŭ bruă mtô bi hriăm kdriêk Kon Plŏng brei thâo, hŏng klei găl phŭn prăk đru kơ phung hđeh huă yang hruê dơ̆ng amâo lu, kñăm rơ̆ng hnơ̆ng tŭ jăk mmông huă ƀơ̆ng, sang hră ăt dôk iêu mtrŭt thiăm.

          “Khua sang hră iêu mthưr phung amĭ ama đru braih, mdiê, djam mtam djăp mta. Hlei amĭ ama amâo mâo mnơ̆ng đru djuh răm pui. Tơdah amâo mâo mnơ̆ng dưi hriê đru tŭk knă êsei djam kơ phung hđeh. Bi klei đru mơ̆ng yang ƀuôn snăn Adŭ bruă Sang hră m’ar mbĭt hŏng dŭm să, wăl krah, phung khua sang hră iêu mthưr phung mâo ai tiê kmah đru mnơ̆ng msĕ si kan krô, ƀung hdang krô, êa praĭ”.

Boh sĭt brei ƀuh, bruă krŏng kjăp klei tŭk knă êsei huă yang hruê kơ giăm 1.250 čô hđeh mâo mnuih ƀuôn sang rông, klei đua klam phŭn jing mŏng phung nai mtô ti dŭm sang hră. Dŭm hlao mnơ̆ng ƀơ̆ng huă ngă kơ phung nai suaĭ hĭn ƀiădah bŏ hŏng klei khăp čiăng dôk đru mđĭ ai phung hđeh, đru kơ phung hđeh mnuih djuê ana Sedang ti kdriêk Kon Plŏng, čar Kon Tum nao sang hră./.