Sang dhar kreh ƀuôn Tơ̆ng Jŭ, ƀuôn hgŭm Êa Kao mčhĭt mơuăt ênai čing lehanăn ênhiang kdŏ čhuang mprăp drông tuê hlăm yan hiu čhưn ênguê tal êlâo leh hdră bi mŭt mbĭt. Ti krah ênai kwang mčhĭt mơuăt, H’Yam Bkrông – Khua êpul hgŭm bruă pơ̆k mñam Tơng Bông, khua êpul hiu čhưn ênguê êpul êya ƀuôn Tơ̆ng Jŭ – ktưn hưn kyua jih 10 ƀuôn mâo msĕ hnơ̆ng trah dlăng kơ bruă mđĭ lar knhuah djuê ana. Bruă bi hgŭm kjăp klei găl mơ̆ng ƀuôn čiăng mđĭ kyar hdră hiu čhưn ênguê êpul êya ăt dưi ba mdưm hlăm Hdră mtrŭn Klei bi kƀĭn bruă Đảng ƀuôn hgŭm.

“Hmei mâo hdră čiăng kơ bruă pô dưi kriê pioh kjăp snăn pŏk adŭ mtô bi hriăm bruă anei, tal 2 jing mđĭ kyar hdră hiu čhưn ênguê êpul êya snăn mnuih ƀuôn sang bi ngă bruă mbĭt, čiăng kơ arăng nao tui ksiêm kơ bruă djuê ana pô mơ̆ng đưm msĕsi pơ̆k mñam, knă kpiê čeh, krah mkra rup, tui ksiêm ngă ƀĭng ngă lŏ hma lehanăn ksiêm kơ dhar kreh čing čhar, mnơ̆ng ƀơ̆ng huă. Leh bi mŭt mbĭt, kâo ƀuh êhnoh ƀuôn mnuih djuê ƀiă lu, bi mguôp mbĭt srăng đĭ kyar kjăp mơh.

Hluê si klei čih mkra bruă kđi čar Klei bi kƀĭn bruă Đảng čar DakLak gưl XVIII, wưng thŭn 2025 – 2030, čar srăng mđĭ kyar hdră hiu čhưn ênguê phŭn, mâo klei găl msĕsi hiu čhưn ênguê êa ksĭ – lăn dliê ti dŭm đang dliê knŭk kna mkuôm, mđĭ kyar hdră hiu čhưn ênguê êoul êya, krĭng ngă lŏ hma, tui ksiêm kơ bruă mơ̆ng đưm. Ny Khang, djuê ana Êđê, alŭ Độc Lập B, ƀuôn hgŭm Suối Trai, čar Dak Lak đăo knang, alŭ pô srăng dưi dưn boh tŭ mơ̆ng hdră êlan mđĭ kyar mrâo mơ̆ng čar, hlăk dôk ti ktuê êlan mđĭ kyar lăn êa, bruă lŏ hma mơ̆ng dŭm krĭng pla boh durian prŏng ti nah Yŭ Dak Lak, mkŏ krĭng răng mgang wăl dliê Êa Sô, krông Ba Hạ, krĭng lăn dliê kriê pioh Krong Trai lehanăn nao truh phă krĭng ksĭ Phú Yên.

“Bi mŭt mbĭt jing sa hdră djŏ čiăng pŏk mlar wăl anôk bi mjĕ mjuk mđĭ kyar bruă duh mkra, mâo dliê, mâo čư̆, mâo êa ksĭ čiăng mđĭ kyar klei hdĭp mnuih djuê ƀiă, ƀrư̆ ƀrư̆ kpưn đĭ. Ară anei pô mŭt hlăm ênuk gưl mrâo leh, ênuk kpưn đĭ mơ̆ng pô, mơ̆ng djuê ana”.

Ăt msĕ hŏng Nay Khang, Sô Văn Sứt, djuê ana Čam H’roi, mnuih mâo kơhưm ti ƀuôn Ma Y, ƀuôn hgŭm Sơn Hòa lač, bruă bi mŭt mbĭt đru kơ ƀuôn sang mơ̆ng krĭng čư̆ dliê truh ti krĭng êa ksĭ dưi pral, jĕ hĭn. Mơ̆ng klei anei, ƀuôn sang srăng mâo lu klei găl đĭ kyar hĭn.

“Êlâo adih ăt bi mŭt mbĭt Khánh Hòa, Phú Yên, ƀiădah ênuk anăn, êlan klông ka đĭ kyar găl, klei hâo hưn ka đĭ kyar mơh, truh kơ ară anei jăk leh, kâo mĭn hdră bi mŭt mbĭt srăng ba wĭt boh tŭ dưn, jĕ giăm lehanăn lŏ mâo thiăm bruă mă đĭ kyar kâo mĭn srăng hơĭt kjăp, đĭ kyar hĭn čiăng kơ ala čar drei dưi đĭ kyar hĭn mkă hŏng ênuk gưl êlâo”.

Klei mơak dưi wĭt hlăm sa boh sang prŏng mrâo “Dak Lak” amâo djŏ knŏng jing klei mơak anăp hdră mtrŭn prŏng, pŏk klei găl đĭ kyar mrâo. Hluê si Cao Thị Hòa An – kơiăng khua bruă Đảng čar, Khua êpul gơ̆ng bruă ƀuôn sang čar Dak Lak, anei lŏ jing boh tŭ dưn mơ̆ng klei mâo hlăm hƀuê ênuk hlăk dŭm thŭn mlan kdơ̆ng mblah, Aduôn An lŏ wĭt yăl dliê klei mgei ai tiê hlăk dưi nao ti Klei bi kbĭn bruă Đảng krĭng kđông kahan krŭ kdơ̆ng đưm Yang Mao.

“Nao ti Klei bi kƀĭn, kâo ƀuh sa čô mniê năng ai êbeh 80 thŭn lehanăn mâo anăn knăl 60 thŭn Đảng, ñu blŭ hrăm hŏng kâo anei: Ơ bŭ, kâo hmư̆ ih jing mnuih mơ̆ng Phú Yên, kâo mơak êdi dưi bi tuôm hŏng ih. Hmư̆ ñu blŭ, kâo mgei ai tiê, rôč êa ală. Ñu lŏ lač, hlăm ênuk bi blah, Dak Lak – Phú Yên jiă klei khăp, amĭ mâo lu ƀĭng kahan jing mnuih Phú Yên, amĭ khăp snăk kơ mnuih Phú Yên. Snăn, kâo ƀuh anei jing ai ktang mơ̆ng klei hgŭm mguôp, bi mŭt mbĭt lehanăn klei đăo knang kơ knhuah gru mơ̆ng dŭm ênuk gưl”.

Bruă bi mŭt anôk bruă knŭk kna ti DakLak dôk bi êdah klă                                                                                                 boh tŭ amâo djŏ knŏng ti hră mơar, ƀiădah hlăm klei hdĭp mnuih ƀuôn sang. Mơ̆ng dŭm krĭng ƀuôn sang taih kbưi dŭm pluh km, ară anei dôk mbĭt sa boh sang, mnuih ƀuôn sang amâo djŏ knŏng giăm hĭn hŏng anôk bruă knŭk kna, ƀiădah lŏ hrăm mbĭt mâo klei găl, bi kah mbha hdră duh ƀơ̆ng mrâo”. “Sang prŏng mrâo” Dak lak jing anôk jưh knang hơĭt kjăp kơ mnuih ƀuôn sang grăp djuê ana tinei./.