Krah mlan 2/2023, pŏk mlar klei ksiêm dlăng mơ̆ng bruă mă êdeh mdiăng 21 phŭn kyâo ti krĭng Phŭn pui kmlă Đak Pi Nao II (bi knông hŏng kdriêk Ia Pa), êpul bruă djŏ tuôm kdriêk Kông Chro, čar Gia Lai ƀuh klei bi rai 7 phŭn kyâo dliê ti čuê dliê 780 čuê dliê kyua Knơ̆ng bruă dliê kmrơ̆ng Ia Pa kriê dlăng.  Leh anăn, anôk bruă djŏ tuôm thâo ƀuh bi rai dliê ti čuê dliê wăl 792 hlăm kdrêč dliê kriê dlăng mơ̆ng Knơ̆ng bruă dliê kmrơ̆ng Kông Hde. Ti anôk anei, dŭm êtuh phŭn kyâo ana ktruôl dliê, kpeh, kčik, êrăng arăng koh druôm, lu ênoh kyâo arăng ba mđuê̆ leh mơ̆ng dliê. Mblang kơ mta phŭn êmưt thâo ƀuh, gang mkhư̆ klei bi rai dliê, Lê Văn Thuỷ-  Khua Knơ̆ng bruă dlie kmrơ̆ng Kông Hde lač mâo mta phŭn ngă ngơi mang:

“Blŭ hrăm klă mngač hŏng phung knuă druh mâo ya bruă snăn hưn hŏng khua gĭt gai knơ̆ng bruă čiăng msir mgaih leh anăn hưn hŏng gưl dlông. Ƀiădah tăp năng, knuă druh, mnuih mă bruă bi mĭn jing mnuih ƀuôn sang alŭ wăl mă kyâp ngă sang anăn ăt ngă ngơi mang.”

Klei dliê mâo arăng bi rai ăt mâo lu ti alŭ wăl mdê mdê ti Gia Lai, msĕ si: Kbang, Chư Prông, Chư Sê… Knhal jih mlan 2/2023, êpu bruă djŏ tuôm kdriêk Kbang ksiêm dlăng, thâo ƀuh ti wăl dliê 114, kdrêč dliê kriê dlăng mơ̆ng knơ̆ng bruă dliê Sơ Pai mâo 16 phŭn kyâo prŏng mơ̆ng 40cm-90cm arăng koh druôm.  Nguyễn Văn Hợi-  Khua Knơ̆ng bruă dliê kmrơ̆ng Sơ Pai, kdriêk Kbang, lač:

“ Knơ̆ng bruă kriê dlăng, răng mgang dliê hlăm dŭm thŭn giăm anei tuôm hŏng lu klei dleh dlan. Êpul bruă răng mgang dliê dleh dưi duah djăp mnuih hĭn. Mnuih ƀuôn sang čiăng lŏ dưi koh druôm ênhă dliê knơ̆ng bruă kơ̆ng, ară anei jing dliê mda. Mnuih ƀuôn sang koh druôm wăt ênhă dliê, ngă kơ kpĭ kơ knơ̆ng bruă, mâo dŭm ana amâo mâo ênoh yuôm ba yua ôh ƀiădah phung diñu ăt koh druôm mơh ba klei rŭng răng.”

Boh nik, akŏ mlan 3/2023, êpul bruă kahan ksiêm čar Kon Tum ƀuh hnơ̆ng kyâo prŏng hlăm anôk dưm ti tač čuah krônf Đăk Pxi, ti să Đăk Pxi, kdriêk Đăk Hà. Anôk mă čuah anei jing mơ̆ng knơ̆ng bruă 87. Hlăm ênoh kyâo soh hŏng hdră bhiăn kahan ksiêm ƀuh mâo 2 pŏk prŏng, 4 hnơ̆ng kyâo, 11 ƀĕ kyâp wĭl mrâo koh druôm leh anăn 5 ana kyâo tram leh sui hruê hlăm êa. Jih jang ênoh kyâo arăng thâo ƀuh mâo boh dlông leh anăn boh prŏng. Čiăng mdăp hŏng êpul bruă djŏ tuôm   diñu mdăp hŏng klei mă čuah dơr. Khădah snăn mâo đa đa kyâo hŏng klei bi knăl mrâo dưi ma wmơ̆ng dliê dưm ti dlông čuah amâodah ka hmao mdăp ôh.

 Năng mđing jing anôk čuah mdăp kyâp anei kbưi hŏng Knơ̆ng bruă sang cư̆ êa să hlăm brô 1 km ƀiădah bruă sang čư̆ êa alŭ wăl amâo thâo ôh. Trần Phước Tuấn,  Khua Knơ̆ng bruă sang čư̆ êa să Đăk Pxi bi mklă: êlâo kơ wưng êpul kahan ksieme ƀuh kyâo soh hŏng hdră bhiăn, bruă sang čư̆ êa să khăng mkŏ mjing hiu ksiêm dlăng, hiu duah leh anăn bruă kriê dlăng dliê kjăp amâo mâo ya boh klei ôh:

“Să ăt mkŏ mjing leh dŭm Êpul mlir dhar bruă khăng ksiêm dlăng, răng mgang dliê ăt msĕ mơh mkŏ mjing 2 anôk ti 2 ktuê êlan phŭn jing êlan dơ̆ng pral mrô 677  ktuê êlan ñĕ kơ êa lip lêč. Hlăm wưng êgao snăn klă klơ̆ng bruă kriê dlăng dliê ti alŭ wăl kjăp, amâo mâo klei amâo jăk ôh”.

Êngao kơ ênoh kyâo êpul brưa djŏ tuôm thâo ƀuh hlăm anôk dưm čuah mơ̆ng Knơ̆ng bruă 87 djiêô krông Đăk Pxi, să Đăk Pxi, kdriêk Đăk Hà, bi kyâo prŏng dưi ƀuh hlăm đang ksu kbưi hŏng anăn hlăm brô 300m, hŏng 2 anôk kƀĭn kyâo. Hlăm anôk bi kƀĭn ral sa mâo jih jang 7 hnơ̆ng kyâo prŏng. Ti anôk bi kƀĭn tal dua mâo 4 hnơ̆ng kyâo điêt prŏng mdê mdê.  Hlue si dŭm klei hâo hưn, ênoh kyâo hlăm đang ksu jing kyâo kyua phung tlĕ mă kyâp mdăp mơ̆ng anôk mdăp kyâo hlăm čuah mơ̆ng knơ̆ng bruă 87 giăm krông Đăk Pxi.

Tơdah lač kơ ênoh kyâo soh hŏng hdră bhiăn mâo êpul bruă djŏ tuôm mă kơ̆ng, sa čô khua gĭt gai Knơ̆ng bruă dliê kmrơ̆ng čar Kon Tum ăt lač kơ ênoh kyâo mâo 6 hnơ̆ng, 11 ƀĕ kyâo wĭl arăng mrâo koh druôm leh anăn 5 ana kyâo mâo klei bi knăl tram hlăm êa sui hruê ti tač čuah amâo lač ôh kơ kyâo mdăp hlăm đang ksu. Ñu ăt brei thâo bruă anei kahan ksiêm dôk ksiêm dlăng, êpul kahan ksiêm knŏng mâo bruă klam bi hgŭm anăn amâo mâo ôh klei hâo hưn klă klơ̆ng kơ hnơ̆ng lu leh anăn mta kyâo mă kơ̆ng.

Pŏk mlar ksiêm dlăng, êpul bruă djŏ tuôm čar Kon Tum tal êlâo ƀuh hlăm čuê dliê 327, să Đăk Pxi mâo 22 ana kyâo arăng koh druôm. Khădah snăn ka dưi bi mklă ôh ênoh kyâo anei leh anăn ênoh kyâo arăng mdăp hlăm čuah bi djŏ tuôm mơ̆ amâodah hơăi. Boh klei anei êpul bruă djŏ tuôm čar Kon Tum dôk ksiêm dlăng bi mklă.