Aguah hruê 4/3 leh anăn tlam hruê 8/3, hmei mâo ƀô̆ mta ti krĭng ka mă čuah ti êa Krông Knô, kdrêč găn să Quảng Phú, kdriêk Krông Knô, čar Dak Nông, Ti kdrêč êa krông knŏng êbeh 2 km, mâo 6 boh hô̆ pui mă čuah. Đa đa dôk mă čuah hlăm êa krông, čuah dưi pom hlăm hô̆ pui. Ti krĭng mâo Knơ̆ng bruă sang čư̆ êa čar Dak Nông mkăp hră brei kơ dŭm anôk duh mkra kuai mă čuah, lu anôk klưh hroh giăm hang, ngă êa krông bi mlih, ƀiădah dŭm boh hô̆ pui ăt dôk hrip čuah kăn mdei mơh. Sa čô mnuih ƀuôn sang ti alŭ Phú Lợi, să Quảng Phú brei thâo, bruă kuai mă čuah hlăm dŭm thŭn anei ngă kơ klei klưh hroh ƀrư̆ hruê ƀrư̆ kjham, ngă luč lu lăn mkra mjing:

“Tinei snăn mrâo 5 mmông aguah snăn diñu mă bruă leh, diñu mă truh 6-7 mmông mmăt kơh mdei. Mâo pô snăn diñu mă ti êngao ƀiă, bi amâo ƀuh pô snăn diñu hlŏng mă giăm hang mtam, snăn klưh hroh yơh. Ih dlăng phă dih, ară anei ba đĭng tinăn, snăn hlăm wang 2 mmông lăn anôk anăn srăng klưh jih, Bruă sang čư̆ êa alŭ wăl snăn duah hdră msir yơh, lui snăn lăn lŏ hma hroh hlăm êa krông jih”.

    Nguyễn Chung Huy,  Khua Adŭ bruă ngăn dŏ wăl hdĭp mda kdriêk Krông Knô, čar Dak Nông brei thâo, boh klei klưh hroh lăn hang Krông Knô hlăm să Quảng Phú ƀrư̆ hruê kkham hĭn ti dŭm anôk bruă duh mkra dưi brei mă čuah. Hlue si klei ksiêm yap truh knhal jih thŭn 2022, mâo 28 gŏ êsei mnuih ƀuôn sang ti să Quảng Phú luč liê kơ lăn mkra mjing kyua klưh hroh lăn ti dŭm kdrêč êa krông mkăp kơ 3 anôk bruă duh mkra mă čuah. Dŭm gŏ êsei mnuih ƀuôn sang ngă hră mơĭt kơ Knơ̆ng bruă sang čư̆ êa să Quảng Phú leh anăn ară anei bruă sang čư̆ êa alŭ wăl dôk krah wah čiăng kơ anôk bruă duh mkra kuôl kă tla hnô kơ dŭm gŏ êsei. Nguyễn Chung Huy lač, bruă mă čuah ară anei jing mâo lu klei amâo jăk, klei klưh hroh lăn ngă mâo klei kčŭt hưn, dleh ktuê dlăng. Huy ăt bi mklă, dŭm kdrêč êa krông mâo Knơ̆ng bruă sang čư̆ êa čar Dak Nông mkăp brei kơ dŭm anôk bruă duh mkra mă čuah tal êlâo aao klưh hroh ôh. Hlue si hdră kčah, anôk bruă duh mkra dưi mă kbưi hŏng hang 20 m, ƀiădah klei kƀah jing amâo kčah ôh kbưi 20 m hŏng hang krông jing wưng mphŭn ngă amâodah hlăm jih wưng. Ngă truh kơ bruă klưh hroh kjham snăn dŭm hô̆ pui mă čuah ƀrư̆ êlam hĭn hlăm anôk kbưi hŏng hang krông hđăp. Ară anei, đa đa anôk klưh hroh leh dŭm pluh met, hô̆ pui dôk mă čuah kbưi hŏng hang krông êlâo dih. Leh anăn anei jing hdră bhiăn kčah kơ dŭm anôk bruă leh anăn Knơ̆ng bruă sang čư̆ êa čar Dak Nông ksiêm dlăng čiăng mkra mđĭ.

“Klei mkăp hră brei mkhư̆ anôk phŭn, anôk knhal tuč, êngao anăn hlue si hdră kčah mă čuah kbưi hŏng hang 20 m. Hdră bruă mă čuah jing snăn bi hang ti anôk jing ka klă ôh, hlue si wưng, dôk gun kpăk tinei.  Kdriêk ăt lu blư̆ mâo klei akâo ksiêm dlăng, klei mĭn jing hang ti anôk ksiêm dlăng boh klei dưi brei mă, bi leh klưh roh leh snăn amâo mâo pô dưi bi mklă ôh hlue si hdră bhiăn”.

 Mbĭt anăn, hŏng boh klei klưh hroh kjham, hlăm mlan 11/2022, Knơ̆ng bruă sang čư̆ êa kdriêk Krông Knô mâo leh hră mơar akâo kơ Knơ̆ng bruă sang čư̆ êa čar Dak Nông mjưh mdei bruă mă čuah ti dŭm anôk klưh hroh ti să Quảng Phú. Khădah snăn, kdriêk dôk guôn mơ̆ng hlăk anăn truh ară anei, hlăk êjai klưh hroh mâo grăp hruê:

        “Hŏng boh klei klưh hroh ktuê hang Krông Knô snăn kdriêk mâo leh dŭm klei akâo kơ dŭm anôk bruă mă čuah mjêč mkŏ mjing leh anăn bi leh hdră mkra mlih, kơrŭ wĭt wăl hdĭp mda hlăm bruă mă čuah čiăng mơĭt kơ dŭm anôk bruă mâo klei ksiêm dlăng, bi mklă leh anăn tŭ ư hlue ngă. Mtă kơ Knơ̆ng bruă ngăn dŏ leh anăn wăl hdĭp mda ksiêm dlăng boh klei ksiêm wĭt boh klei klưh hroh hang krông. Kčĕ mdei êjai klei mă čuah hlue si hdră mtruưn 23 mơ̆ng Knŭk kna. Pia jing mdei êjai čiăng kơrŭ wĭt wăl hdĭp mda, leh kơrŭ wĭt snăn dưi lŏ mă. Kdriêk mtă leh, bi klei dưi mơ̆ng čar lŏ ksiêm dlăng kơ klei anei.”

 Hlăm êa Krông Knô, ti să Quảng Phú, kdriêk Krông Knô, Knơ̆ng bruă sang čư̆ êa čar Dak Nông mkăp 4 hră brei mă čuah kơ 4 anôk bruă duh mkra mâo: Knơ̆ng bruă mă mnơ̆ng hlăm gŭ lăn Phước Lộc, anôk bruă duh mkra Văn Hồng, Knơ̆ng bruă mă mnơ̆ng hlăm gŭ lăn Quảng Phú leh anăn Knơ̆ng bruă Hải Khánh Ngân. Hlăm anăn, Knơ̆ng bruă Hải Khánh Ngân mdei leh bruă ngă mơ̆ng mlan 1/2022. 3 anôk bruă duh mkra lŏ ngă bruă dưi mkăp klei dưi ba yua jih hnơ̆ng hlăm brô 68.000m3/thŭn hlăm boh dlông kdrêč êa krông hlăm brô 6,4km.

 Hŏng boh klei  klưh hroh lăn ƀrư̆ hruê ƀrư̆ kjham ti să Quảng Phú, bruă mdei êjai mă čuah čiăng ngă dŭm hdră msir răng mgang hang krông, kơrŭ wĭt wăl hdĭp mda hlue si Hdră mtrŭn 23 mơ̆ng Knŭk kna leh anăn hlue si klei kčĕ mơ̆ng kdriêk Krông Knô jing năng djŏ. Knơ̆ng bruă sang čư̆ êa čar Dak Nông brei hnưm mâo hdră mtrŭn, ñĕ kơ bruă klưh hroh lăn lŏ mâo, ngă jhat kơ êa krông Knô ăt msĕ mơh luč lăn mkra mjing mơ̆ng mnuih ƀuôn sang./.