Yan jao mă kahan thŭn 2025 anei ti Dak Lak mâo 2.553 čô nao kahan ti dŭm anôk bruă lĭng kahan leh anăn kđông kahan knông lăn hlăm čar Dak Lak, mbĭt hŏng đa đa anôk bruă hlăm phŭn bruă lĭng kahan, kahan alŭ wăl 5 jưh ti alŭ wăl čar.

Đại tá Niê Ta, Khua kiă kriê knơ̆ng bruă gĭt gai lĭng kahan, k’iăng khua êpul gơ̆ng ruah mă kahan čar Dak Lak brei thâo, hlăm yan hriăm mjuăt thŭn anei, dŭm anôk bruă srăng kñăm ngă jăk bruă kđi čar leh anăn klei mĭn, mđĭ hĭn bruă klam mơ̆ng dŭm gưl bruă Đảng, khua gĭt gai, knuă druh, lĭng kahan hlăm bruă hriăm mjuăt. Hlăm wưng anei, dŭm anôk bruă tŭ mă leh ênŭm ênoh kahan leh anăn dôk ngă dŭm klei mtô, klei bi hmô čiăng êdi, rơ̆ng mđĭ hnơ̆ng tŭ jăk bruă hriăm mjuăt hŏng lĭng kahan mrâo. Hŏng lĭng kahan mrâo, dưi bi hơĭt hlăm klei mĭn, ai tiê leh dŭm hruê tal êlâo kbưi hŏng gŏ sang, mprăp nao ti anôk hriăm mblah.