Êlan dơ̆ng mrô 27 găn alŭ Phi Jŭt (să Dă Rsal hđăp, ară anei jing Dam Rông 3, čar Lâm Đồng) mâo boh taih êbeh 1km bŏ hŏng ƀăng blŭng, êa êngăp. Êdeh prŏng, êdeh mdiăng tuê, ôtô leh anăn êdeh điêt tlă dŭm bĭt ƀăng blŭng bŏ hŏng lŭ. Ayŏng Phan Mười, sa čô mâo sang ti êlan anei brei thâo, klei jhat rai mâo mơ̆ng 3 - 4 thŭn hŏng anei, ngă truh lu klei dleh dlan kơ klei êrô êbat, dŭ mdiăng leh anăn luč klei êđăp ênang.

 “Yan hjan amâo dưi dlăng ôh, êa hŏng lŭ msĕ hŏng lŏ. Êdeh găn bi kčăi lŭ bŏ mtih sang, bi yang bhang kâo kreh kđăl ƀăng, dleh dlan êdi yơh. Mâo lu mnuih lĕ kơ êdeh, đa đa hlŏng djiê ti anăp sang kâo. Ăt hmăng hmưi anôk bruă djŏ tuôm hnưm lŏ mkra êlan anei kơ mnuih ƀuôn sang êrô êbat mâo klei găl, phung hđeh nao sang hră êđăp ênang.”

 Bùi Tuấn Anh, sa čô mgăt êdeh mdiăng tuê mơ̆ng Gia Lai - Lâm Đồng brei thâo, ñu mgăt êdeh ti êlan dơ̆ng mrô 27 mâo giăm 10 thŭn hŏng anei. Êlâo dih mơ̆ng Dak Lak găn Lăn Dap Kngư knŏng 5 mmông, ară anei êlan jhat truh kơ 6, 7 mmông. Hlăm wưng bi mŭt čar, ênoh phung tuê đĭ 30 - 40%, ngă kơ sang êdeh mđĭ ênoh gưl êdeh. Ƀiădah êlan hjat, ngă kơ phung tuê êmăn, ênoh dŭ mdiăng đĭ 1 blư̆ mkrah:

 “Tuê đĭ êdeh kreh êgah êmăn, đĭ êdeh mâo klei hmăi, kreh lĕ hlăm ƀăng blŭng, boh nik jing dŏ mgang anăp leh anăn tluôn êdeh, pô êdeh kreh mâo boh tâo tlŏ, kreh hluh. Êngao kơnăn, êlâo dih êlan jăk ƀiă liê êa pui, ară anei lŏ thiăm 15 - 20 lĭt kơh dưi djăp kơ grăp gưl, kyua pô đĭ êmưt, amâo dưi nao hmăr, ngă kơ prăk blei êa pui lŏ đĭ hlăm brô 500.000 prăk.”

Trương Trung Thắng - K’iăng khua knơ̆ng bruă mkŏ mkra čar Lâm Đồng bi klă, ară anei mâo hlăm brô 21km êlan dơ̆ng mrô 27 găn kdriêk Dam Rông hđăp, ti kdrêč Km85+500 - km 106 jhat rai kjham. Klei anei mâo kyua dŭm thŭn anei hjan prŏng, êdeh mdiăng êgao hnơ̆ng lu leh anăn ka hmao lŏ mkra wĭt.

Trương Trung Thắng brei thâo, knơ̆ng bruă hưn mdah leh hŏng Bruă sang čư̆ êa čar Lâm Đồng mkăp brei 10 êklai prăk ngă bruă mkra wĭt mjêč msĕ si jah waih 2 nah êlan, mkra wĭt êlan mđuĕ êa, msir ƀăng blŭng. Bi kơ wưng sui, mâo leh hdră hưn hŏng Bruă sang čư̆ êa čar leh anăn Phŭn bruă mkŏ mra bi klă 110 êklai prăk čiăng mkra wĭt jih jang 21km êlan jhat rai, mmông ngă bruă hlăm thŭn 2026. Trương Trung Thắng lač:

 “Anei jing kdrêč êlan kčŭn čư̆ mdêč mdar, hŭi hyưt, êlan jhat rai čiăng lŏ mkra wĭt mtam. Hluê anăn, hmei bi leh hdră êlan, mâo  hdră lŏ wĭt rŭ mkra leh anăn ară anei bi lông phung ngă bruă. Leh ruah pô ngă bruă srăng ngă bruă mtam.”

Êlan dơ̆ng mrô 27 amâo djŏ knŏng mkŏ Dak Lak - Lâm Đồng, ƀiădah lŏ mkŏ êlan čar 725 găn dŭm să nah yŭ mơ̆ng Lâm Đồng hŏng anôk bruă Knŭk kna jing Đà Lạt. Mkra mđĭ êlan anei srăng ruh mgaih klei kpăk đĭ kyar hlăm čar, đru rơ̆ng klei êđăp ênang kơ mnuih ƀuôn sang. Hlăm klei mkŏ krĭng, lŏ mâo thiăm sa êlan Ngŏ - Yŭ đĭ kyar kluôm Dhŭng kwar krah.