Êbeh leh 10 thŭn êgao, aduôn Ka Joen ti să Liêng Srôñ, kdriêk Dam Rông, čar Lâm Đồng ƀuh leh lu blư̆ mkra wĭt mkra nao êlan klông ti êlan dơ̆ng prŏng mrô 27 găn anăp sang ñu. Leh mrâo lŏ wĭt mkra hlăm brô 2; 3 mlan anôk tiap mkra anăn lŏ kpŏk đuĕ jhat rai jing ƀăng ƀlŭng điêt ƀăng ƀlŭng prŏng. Klei anei ngă wĭt ngă nao ngă kơ klei găn êrô hdĭp mda mơ̆ng mnuih ƀuôn sang hlăm krĭng hmăi amâo mâo jăk.

 “Tơdah hjan snăn êa kdơ̆ng bŏ dih bŏ anei, dlăng msĕ hŏng ênao, amâo lŏ ƀuh ƀô̆ êlan ôh. Bi tơdah yan hjan truh snăn ƀhŭl mtŭk ƀhŭl mtŭl”.

Lu kdrêč hlăm êlan dơ̆ng prŏng mrô 27 lĕ hlăm klei jhat rai msĕ snăn. Ƀô̆ êlan bi lŏ mkra bi tiap, ƀiădah êdei kơ anăn lŏ wĭt jhat msĕ si hđăp, êrô êbat lĕ hlăm klei dleh dlan. Đoàn Văn Vĩnh, ti să Dă Rsal, kdriêk Dam Rông (Lâm Đồng) lač:

 “Lu jing mkra ti anăp jhat ti tluôm. Mmông hjan êdeh prŏng găn hriê kčăi êa bŏ dih bŏ anei, mnuih đĭ hiu êdeh hlăm êlan klông amâo mâo kjăp kngan djă êdeh ênưih lĕ hlăm bir êlan. Mmăt mlam phung hđeh êdam đĭ êdeh mtiŏ, ñĕ đuĕ kơ ƀăng ƀlŭng, ênưih bi pah bi drăm hdơ̆ng găp”.

          QL27 jing êlan dơ̆ng phŭn mkŏ 2 boh čar Lâm Đồng lehanăn Daklak, hŏng boh taih êbeh 200km, mâo duh bi liê mkra hlăm grăp kdrêč mơ̆ng thŭn 1998. Tui si  Nguyễn Văn Gia, khua knơ̆ng bruă êlan klông čar Lâm Đồng, prăk lŏ mkra wĭt êlan klông anei mơ̆ng phŭn bruă êlan klông dŭ mdiăng mkăp, hŏng ênoh lŏ mkra wĭt mơ̆ng 40 - 50 êklai prăk/thŭn knŏng djăp mă čar mkra wĭt mơ̆ng 8 - 10km/thŭn. Mơ̆ng klei lŏ mkra wĭt mtuôp mƀal msĕ snăn yơh êlan klông lĕ nanao hlăm klei jhat rai mđruĕ mđrông mơh.

 “Hŏng ênoh bi liê amâo mâo djăp ôh msĕ si klei čiăng, ngă kơ kdrêč êlan anei mrâo leh mkra wĭt snăn kdrêč adih lĕ jhat. Čar ăt mâo leh mơh klei akâo klei anei mơ̆ng sui leh, lehanăn hlăk thŭn 2010 mâo phŭn bruă êlan klông bi mklă leh mơh duh bi liê kơ bruă mkra wĭt hŏng ênoh hlăm brô 1.400 êklai prăk. Siămdah dơ̆ng mơ̆ng anăn hlŏng kơ ară anei, alŭ wăl kwưh nanao lu blư̆ hŏng djăp êlan, ƀiădah phŭn bruă êlan klông lač dôk tui duah prăk ka mâo ôh ênoh čiăng duh bi liê mkra wĭt êlan anei”.

         Knơ̆ng bruă sang čư̆ êa čar Lâm Đồng ăt duah leh mơh hŏng lu hdră, hlăm anăn mâo leh mơh klei akâo brei klei dưi mkŏ mjing klei bhiăn hjăn kơ Lâm Đồng dưi bi liê prăk pô čiăng mkra wĭt êlan anei. Ƀiădah, tui si Phạm S, K’iăng khua knơ̆ng bruă sang čư̆ êa čar Lâm Đồng, kyua bruă anei ka tuôm mâo ôh klei bhiăn mkăn, snăn mơh klei mă bruă lĕ hlăm klei dleh dlan.

 “Êlan dơ̆ng prŏng mrô 27 găn čar Lâm Đồng jing êlan jhat hĭn êdi hlăm  128 êlan dơ̆ng prŏng ti Việt Nam ƀiădah hlăm 14 thŭn êgao leh ka lŏ mâo klei mkra wĭt ôh. Mrâo anei k’iăng khua knŭk kna Trần Lưu Quang hriê snăn khua knơ̆ng bruă sang čư̆ êa čar Lâm Đồng ăt lŏ dơ̆ng akâo bi êdah bruă anei, tui si hmei mĭn juing năng bi liê yơh. Êjai dôk găn hlăm klei dleh dlan, dôk bi mbha prăk rŭ mkra dŭm mta bruă yuôm bhăn kơ lăn čar, snăn brei mâo klei bi tŭ ư mơ̆ng phŭn bruă êlan klông dŭ mdiăng. Lehanăn phŭn bruă srăng mâo hră mơar bi kna ngăn prăk, lehanăn mtă kơ Lâm Đồng mă êlâo pioh mkra hĕ. Ƀiădah, hdră êlan anei jing klei ka tuôm ngă ôh, năng ai srăng dôk dleh dlan mơh’.

          Ară anei hlăm grăp thŭn, knŭk kna mâo bi liê leh lu êklai prăk pioh kơ bruă lŏ mkra wĭt êlan dơ̆ng prŏng mrô 27 kdrêč găn čar Lâm Đồng ƀiădah hŏng klei êlan klông knư̆ hrue knư̆ jhat rai snei. Boh sĭt jing găn êrô bŏ hŏng klei dleh dlan, hmăi amâo mâo jăk ôh kơ bruă mđĭ kyar klei duh mkra ala ƀuôn ti Lâm Đồng lehanăn hlăm alŭ wăl lăn dap kngư./.