Kdrŭn êdeh čar Dak Lak ară anei dôk bi siñê hră kuôl kă găn êrô 180 boh êdeh mơ̆ng 35 anôk bruă duh mkra dŭ mdiăng, êran hlăm 24 ktuê êlan nao ti dŭm čar kwar Krah leh anăn nah Dưr. Mơ̆ng mlan 12/2024, anôk bruă mtă leh kơ jih jang khua anôk bruă duh mkra siñê ƀuăn rơ̆ng hlue ngă klei dŭ mdiăng tue leh anăn mnơ̆ng dhơ̆ng djŏ tui si hdră kčah mơ̆ng Phŭn bruă êlan klông dŭ mdiăng leh anăn ngăn prăk.

Klă klơ̆ng, hŏng dŭm ktuê êlan Dak Lak nao ti dŭm čar mơ̆ng Nghệ An, ênoh hră êdeh leh anăn mnơ̆ng dhơ̆ng đĭ amâo êbeh 50%; dŭm ktuê êlan mơ̆ng čar Hà Tĩnh, hnơ̆ng đĭ amâo êbeh 40%. Wưng ba yua mơ̆ng hruê 17/1 – 10/2/2025 (jing hruê 18 mlan 12 truh kơ 12 mlan sa hlue mlan ƀlĕ).