Hlăm mmông mă bruă hŏng Khua êpul bruă Êdam êra cộng sản Hồ Chí Minh gưl dlông, Khua bruă kƀĭn ala Vương Đình Huệ yap yuôm bhăn Êpul bruă Đoàn gưl dlông čuăn ruah akŏ klei ngă bruă thŭn 2023 leh anăn akŏ mlan Hđeh êdam êra nao mbĭt hŏng bruă “mlih mrô”. Anei jing bruă klam mjêč, yuôm bhăn, bi djăp hnơ̆ng čuăn ênuk mrâo, ba ala čar drei ñŭ kma kluôm êlam hŏng klei đĭ kyar mbĭt tar rŏng lăn. Bi kơ bruă Đoàn leh anăn hdră bruă phung êdam êra hlăm wưng kơ anăp, Khua bruă kƀĭn ala mñă klă, Bruă hđeh êdam êra cộng sản Hồ Chí Minh gưl dlông čiăng lŏ dơ̆ng ksiêm duah, hyuă kjăp hĭn klei blŭ gĭt gai mơ̆ng Khua gĭt gai Đảng Nguyễn Phú Trọng hlăm klei kƀĭn bruă Êdam êra kluôm ala gưl tal 12, bi klă hlăm grăp bruă klam klă klơ̆ng. Khua bruă kƀĭn ala Vương Đình Huệ mñă klă:

 “Êpul bruă êdam êra cộng sản Hồ Chí Minh čiăng thâo săng klă hĭn kơ kơhưm, bruă klam leh anăn bruă mơ̆ng pô, mđĭ klei mĭn bruă klam, amâo mâo mdei klei gĭr hlăm klei hriăm hră mơar, mjuăt pô, kñăm mđĭ klei thâo, knuih hdĭp cách mạng, bi mrâo klei hmăng hmưi hlăm phung hđeh êdam êra čiăng hluê ngă bruă klam hƀuê ênuk, nao êlâo hlăm bruă mkŏ mjing leh anăn răng mgang ala čar. Mđĭ hĭn bruă mtô mjuăt bi hriăm kơ phung mda asei kơ klei mĭn bruă cách mạng, knhuah hdĭp, knuih hdĭp dhar kreh, mđĭ ai tiê khăp kơ ala čar, klei ktưn hưn djuê ana, boh nik jing rông ba klei hmăng hmưi mkŏ mjing ala čar mdrŏng sah, yâo mơak leh anăn thâo săng klă kơ bruă ngă, bruă klam pô hlăm bruă mkŏ mjing leh anăn răng mgang ala čar.”

Mbĭt hŏng klei đĭ kyar mơ̆ng bruă tuh tia 4.0, boh sĭt bruă duh mkra, bruă kđi čar, yang ƀuôn, phung êdam êra ăt mâo klei mlih hmar. Khua bruă kƀĭn ala Vương Đình Huệ mră kơ Êpul bruă êdam êra srăng mâo nanao klei mbruă, amâo mâo mdei mlih mrâo mta phŭn, hdră ngă bruă čiăng mgaih msir klei čiăng, klei hmăng hmưi mơ̆ng phung mda asei, mă phung êdam êra jing phŭn klei mkŏ mjing dŭm mta bruă, mkŏ mjing bruă ngă kyua boh tŭ dưn mơ̆ng phung êdam êra. Êpul bruă Đoàn leh anăn phung êdam êra srăng jing phung nao êlâo hlăm bruă hluê ngă hdră êlan mlih mrô ala čar, đĭ kyar bruă duh mkra mrô hŏng tur knơ̆ng klei kreh knhâo leh anăn mrâo mrang, mlih mrâo hŏng klei mbruă.

Ăt hlăm hruê kăm anei, Êpul bruă êdam êra cộng sản Hồ Chí Minh gưl dlông leh anăn Knơ̆ng bruă dăng kông Việt Nam (Vietnam Post) bi klă klei bi mguôp wưng thŭn 2023 – 2026 hŏng dŭm mta phŭn kñăm kơ bruă mlih mrô kơ phung đoàn viên, hđeh êdam êra. Blŭ hlăm knăm bi klă, ayŏng Bùi Quang Huy, khua kiă bruă tal 1 êpul bruă Đoàn gưl dlông brei thâo, Êpul bruă Đoàn gưl dlông bi klă phung êdam êra jing kmeh gơ̆ng hlăm bruă mlih mrô. Kyuanăn bruă bi klă klei kuôl kă anei srăng đru mtrŭt mđĭ bruă mlih mrô kơ phung êdam êra, phung đoàn viên.

“Drei bi klă klei kuôl kă hruê anei hlăm jih 3 gưl, gưl dlông, gưl čar, gưl kdriêk. Klei anei ngă kơ mta phŭn klei bi klă plah wah 2 tĭng hmar truh hlăm boh sĭt leh bi klă. Leh hdră anei kâo hmăng hmưi 2 tĭng srăng bi klă dŭm mta phŭn leh anăn ksiêm yap dŭm boh tŭ dưn hluê si grăp tuôr, klei anăn đru kơ drei mđĭ hnơ̆ng tŭ jăk klei bi mguôp plah wah 2 tĭng”.

Hluê si klei kuôl kă bi mguôp, wưng thŭn 2023 – 2026, 2 tĭng srăng kñăm bi mguôp hluê ngă dŭm bruă đru mlih mrô kơ phung đoàn viên, phung êdam êra leh anăn mkăp brei klei thâo mnia mblei hlăm mbha mrô, boh nik jing phung êdam êra krĭng ƀuôn sang. Hluê si Nguyễn Hải Thanh, Khua kiă kriê knơ̆ng bruă dăng kông Việt Nam brei thâo:

 “Bruă dăng kông Việt Nam srăng lŏ dơ̆ng hrăm mbĭt hŏng Êpul bruă êam êra cộng sản Hồ Chí Minh hlăm bruă bi hơĭt klei hdĭp yang ƀuôn, dŭm mta bruă đru msĕ si lui, bi hrŏ ênoh dŭm mta bruă, đru kơ dŭm mta mnơ̆ng dhơ̆ng čô̆ kơ bruă mơ̆ng phung mda asei krĭng ƀuôn sang, bi mguôp mkŏ mjing dŭm hdră, bruă hđeh êdam êra mâo hnơ̆ng ala čar, lăm lui klei ư̆ êpa, bi hrŏ klei ƀun ƀin, bi hơĭt klei hdĭp yang ƀuôn hŏng klei kjăp… đru mkŏ mjing hdră ala čar kñăm kơ bruă mkŏ mkra krĭng ƀuôn sang mrâo, mkŏ mjing ƀuôn prŏng mrâo mrang”.

Hlăm klei hluê ngă klei kuôl kă, Vietnam Post bi mguôp hŏng bruă êdam êra gưl dlông mtô mjuăt kơ phung êdam êra kluôm ala mđĭ hĭn klei thâo săng kơ bruă mlih mrô, mbĭt anăn mkăp brei dŭm klei thâo hlăm bruă mnia mblei ti tur knơ̆ng mrô msĕ si: dưn yua dŭm kdrăp marketing mrâo mrang, klei thâo livestream čhĭ mnia, mkŏ mjing mta phŭn rup djŏ hnơ̆ng marketing, kriê dlăng phung ba yua… Vietnam Post srăng đru kơ phung đoàn viên, phung êdam êra kluôm ala pŏk dŭm anôk čhĭ mnia hlăm mbah mnia mblei điện tử Postmark.vn.