Knăm atăt êpul lĭng kahan yang ƀuôn Việt Nam wĭt kơ ala čar dưi mkŏ mjing ti tač êdeh phiơr Hatay ti Antakya, čar Hatay, Turki. Blŭ hlăm knăm anăn, Pô bi ala Đỗ Sơn Hải lač klă bruă lĭng kahan yang ƀuôn Việt Nam nao tui duah, đru dŏng ti Turki hlăm dŭm hruê êngao jing klei bi êdah mđĭ hĭn klei mjĕ giăm 2 tĭng.

Dua Êpul lĭng kahan yang ƀuôn Việt Nam leh anăn Phŭn bruă kahan ksiêm Việt Nam dưi mgaih msir leh lu klei dleh dlan, amâo mâo uêñ kơ klei arưp aram, hur har đru kơ mnuih ƀuôn sang Turki mgaih msir boih jhat mơ̆ng klei mgei lăn, mâo mnuih ƀuôn sang, bruă sang čư êa alŭ wăl leh anăn êpul êya đru dŏng tar rŏng lăn đăo knang, yap yuôm bhăn. Hlăm wưng nao ngă bruă mơ̆ng hruê 13 – 22/2 ti čar Hatay, êpul êya lĭng kahan yang ƀuôn Việt Nam mkŏ mjing leh bruă tui duah ti 31 anôk, hmao ƀuh 15 anôk mâo mnuih dôk hlăm anôk dlưh rai, hlăm anăn mâo 2 čô dôk hdĭp. Leh kơnăn, Êpul ba jao kơ anôk bruă đru dŏng alŭ wăl ba yua kdrăp ktrŏ kkuai duah leh anăn dưi đuh 28 asei atâo dưi kbiă kơ tač. Tlam mbruê 23/2, êpul wĭt truh leh ti tač êdeh phiơr Nội Bài, Hà Nội.