Hlăm ai êwa mpŭ, êpul bi ala êdah êdi mơ̆ng hdră “Đru čung ba mnuih ƀuôn sang” mơ̆ng Lĭng kahan ƀuăn hŏng Awa lŏ dơ̆ng hluê ngă jăk hdră đru čung ba mnuih ƀuôn sang mơ̆ng Lĭng kahan ti krĭng mnuih djuê ƀiă lehanăn krĭng čư̆ čhiăng; mđĭ lar dŭm gru hmô “Mbruă bruă đru čung ba mnuih ƀuôn sang”, bi leh jăk bruă klam mơ̆ng êpul kahan hlăm ênuk gưl mrâo, ênuk kpưn đĭ mơ̆ng djuê ana.

Hlăm dŭm thŭn êgao, hdră đru čung ba mnuih ƀuôn sang hlăm krĭng mnuih djuê ƀiă lehanăn krĭng čư̆ čhiăng mâo dŭm êpul kahan pŏk ngă mđrăm mbĭt, kluôm dhuôm, dưi bi lar ti lu anôk. Knuă druh, lĭng kahan amâo uêñ klei dleh dlan, suaĭ êmăn, mđing truh kơ nah gŭ, hluê ngă 4 mbĭt, (dôk mbĭt, huă mbĭt, mă bruă mbĭt, mbŭ mbĭt klei blŭ mnuih djuê ƀiă, bi hgŭm kjăp hŏng bruă Đảng, bruă sang čư̆ êa alŭ wăl mtô mblang, mtrŭt mjhar mnuih ƀuôn sang nao hgŭm mđĭ kyar bruă duh mkra – ala ƀuôn, mkŏ mkra anôk bruă kđi čar ti nah gŭ hơĭt kjăp… Lu hdră, gru hmô jăk, mrâo, tŭ dưn, mâo boh tŭ yuôm hlăm hdră kđi čar, ala ƀuôn… lui leh gru kruăk jăk siam kơ Lĭng kahan Awa Hô hlăm ai tiê mnuih ƀuôn sang. Ti knăm anei, bruă Đảng kahan gưl dlông, Phŭn bruă lĭng kahan pah mni leh kơ 35 êpul, 80 čô mnuih êdah êdi hlăm bruă “Đru čung ba mnuih ƀuôn sang” hlăm krĭng mnuih djuê ƀiă lehanăn krĭng čư̆ čhiăng wưng thŭn 2019-2024.