Aguah mbruê 28/7, Êpul ksiêm dlăng mrô 892 mơ̆ng Khua bruă Đảng gưl dlông, K’iăng Khua knŭk kna Lê Minh Khái jing khua êpul mâo leh mmông mă bruă hŏng Êpul khua bruă Đảng čar Dak Lak čiăng ba mdah klei bi klă mkŏ mjing êpul ksiêm dlăng leh anăn hdră êlan ksiêm dlăng mơ̆ng Êpul khua bruă Đảng thŭn 2023 hŏng Êpul khua bruă Đảng čar Dak Lak.

Mta phŭn klei ksiêm dlăng jing bruă mkŏ mjing, hluê ngă klei bi klă mrô 21-KL/TW, hruê 25/10/2021 mơ̆ng Êpul khua bruă Đảng gưl dlông kơ bruă mtrŭt mđĭ bruă mkŏ mjing, ƀuah mkra hlăm Đảng leh anăn bruă kđi čar, ktang phĭt gang mkhư̆, msưh kdŭn, ƀuah mkra phung knuă druh, Đảng viên mâo klei toh hroh hlăm klei mĭn, knuih hdĭp, knhuah hdĭp, čŏng mĭn, čŏng ngă. Kñăm kơ mta phŭn gang mkhư̆ klei ƀơ̆ng ngă, luč liê mang, klei amâo mâo jăk…K’iăng Khua knŭk kna Lê Minh Khái mtă kơ phung khua êmua hlăm êpul ngă klei ksiêm dlăng hluê si klei čuăn, rơ̆ng kơ klei mtăp mđơr, tŭ dưn, amâo mâo hmăi kơ klei ngă bruă mơ̆ng Êpul khua bruă Đảng čar Dak Lak leh anăn dŭm anôk bruă djŏ tuôm.