Hlăm mmông mă bruă, Trần Việt Trường bi myuôm bruă mprăp mơ̆ng čar Kon Tum hlăm mmông mă bruă, ƀuh čar Kon Tum adôk mâo lu klei dleh dlan, klei lông dlăng, ka dưi bi lar jih klei găl mâo, ka mâo hdră êlan phŭn, amâo mâo ai dưi čiăng hluê ngă dŭm hdră…

Êpul ksiêm dlăng mrô 1922 mơ̆ng Phŭn bruă kđi čar ăt čih yap lu boh klei hlăm boh sĭt hluê ngă klei bi klă mrô 123 mơ̆ng Êpul khua bruă Đảng gưl dlông leh anăn hdră mtrŭn mrô 57 mơ̆ng Phŭn bruă kđi čar. Čar Kon Tum mñă kơ Bruă Kƀĭn Ala hnưm ksiêm dlăng, ba mdah hdră mtrŭn kơ đa đa hdră, hdră êlan mđĭ kyar Lăn Dap Kngư hluê si hdră mtrŭn mrô 23 mơ̆ng Phŭn bruă kđi čar kơ hdră tă mđĭ kyar bruă duh mkra ala ƀuôn leh anăn răng mgang klei êđăp ênang krĭng Lăn Dap Kngư truh thŭn 2030, tă hdră truh thŭn 2045, mñă kơ Khua knŭk kna, phŭn bruă mkŏ mkra hnưm uêñ mĭn, ksiêm dlăng kơ hdră êlan hluê ngă klei duh bi liê êlan dơ̆ng pral Quảng Ngãi – Kon Tum čiăng mkŏ mjing klei găl kơ 2 čar đĭ kyar.