Blŭ hlăm knăm pŏk Festival mnga Đà Lạt gưl tal 9, k’iăng Khua lăn čar Thị Ánh Xuân lač klă, leh giăm 130 thŭn mkŏ mjing leh anăn đĭ kyar, Đà Lạt – ƀuôn prŏng êbâo mnga amâo mâo djŏ knŏng dưi bi klă k’hưm jing krĭng knơ̆ng bruă kđi čar, bruă knŭk kna, bruă duh mkra, dhar kreh ti čar Lâm Đồng, ƀiădah lŏ đru mguôp hlăm klei đĭ kyar krĭng Lăn Dăp Kngư hmar leh anăn kjăp. Festival mnga Đà Lạt gưl tal 9 jing knăm mơak jăk yâo, mâo klei hmăi klă klơ̆ng, bi mni kơ klei siam mdê hjan mơ̆ng Đà Lạt, mtrŭt mđĭ klei đĭ kyar bruă mkra mjing, čhĭ mnia leh anăn mnia mblei mnga, boh mnga bruă lŏ hma dưi tŭ yap anăn knăl “Đà Lạt – boh tŭ dưn mơ̆ng lăn jăk”. K’iăng Khua lăn čar Võ Thị Ánh Xuân lač klă: “Hdră mtrŭn mrô 23 mơ̆ng Phŭn bruă kđi čar bi klă leh ƀuôn prŏng Đà Lạt jing krĭng điêt mơ̆ng krĭng Lăn Dăp Kngư. Klei anei brei ƀuh Đảng leh anăn knŭk kna đăo knang, čih yao, yap yuôm bhăn klei gĭr ktưn leh anăn dŭm boh tŭ dưn yuôm bhăn mơ̆ng Bruă Đảng čar, bruă sang čư êa leh anăn mnuih ƀuôn sang dŭm djuê ana čar Lâm Đồng, ƀuôn prŏng Đà Lạt dưi mâo leh hlăm wưng êgao, ăt msĕ hŏng dŭm klei găl hlăm alŭ wăl. Kâo đăo knang, hlăm wưng kơ anăp, Đà Lạt – Lâm Đồng lŏ dơ̆ng bi lar ai ktang mơ̆ng klei bi mguôp djuê ana, ba yua tŭ dưn dŭm klei găl, klei ktang mơ̆ng alŭ wăl, đru mguôp năng hŏng klei đĭ kyar mbĭt ti krĭng Lăn Dăp Kngư leh anăn kluôm ala”.

Hŏng akŏ “Đà Lạt – ƀuôn prŏng 4 yan mnga”, Festival mnga Đà Lạt gưl tal 9 thŭn 2022 jing klei lŏ čuê, bi klă, bi mni kơ pô pla mnga leh anăn hưn mdah dŭm klei yuôm bhăn kơ mnga, kơ dŭm mta boh mnga bruă lŏ hma phŭn leh anăn êdah êdi ti Đà Lạt. Hlăm anăn, bruă pla mjing mnga tinei dưi mâo hnư hrui wĭt lu, đru mguôp yuôm bhăn hlăm klei đĭ kyar bruă duh mkra – ala ƀuôn mbĭt ti čar Lâm Đồng.

Anôk čhĭ mnia djam mtam, mnga Đà Lạt klă klơ̆ng dưi pŏk leh ti ktuê hang ênao êa Xuân Hương, tinăn mâo lu mta boh mnga bruă lŏ hma phung mơ̆ng Đà Lạt – Lâm Đồng čiăng rang mdah, hưn mdah hŏng phung nao dlăng. Anôk čhĭ mnia anei dưi iêo mthưr giăm 50 êpul êya, grăp čô hŏng giăm 90 anôk čhĭ djam mtam, mnga, čê, kphê mbĭt hŏng lu mta mnơ̆ng dhơ̆ng OCOP, mnơ̆ng găl mơ̆ng Đà Lạt – Lâm Đồng. Amai Trần Thị Thanh Tuyền brei thâo: “Kâo dê thơ̆ng kơ čhĭ mnia djam mtam, hbei, boh kroh dŭm mta mơ̆ng Đà Lạt msĕ si amrêč trŏng boh, djam hbei đŭng, êsŭn hrah, hbei tao leh anăn lu mta mkăn. Êpul mkŏ mjing diñu hur har êdi, mkra brei kơ pô pŏk mdah čih anăn, anôk čhĭ mnia kơ pô, pô knŏng ba mnơ̆ng dhơ̆ng hruê rang mdah đuč. Kâo hmăng hmưi mnơ̆ng dhơ̆ng mơ̆ng Đà Lạt srăng dưi hưn mdah leh anăn lu mnuih thâo.

Wưng anei, knơ̆ng bruă bi tia čar Lâm Đồng bi mguôp hŏng bruă sang čư êa ƀuôn prŏng Đà Lạt mkŏ mjing klei hưn mdah anôk rang mdah, hưn mdah leh anăn ba čhĭ mnơ̆ng dhơ̆ng mâo anăn knăl “Đà Lạt – boh tŭ dưn mơ̆ng lăn jăk”. Truh kơ ară anei, ƀuôn prŏng brei leh hră tŭ yap hŏng anăn knăl anei kơ 768 anôk bruă, êpul êya, grăp čô hŏng 4 êpul mnơ̆ng dhơ̆ng jing: djam mtam, mnga, kphdê leh anăn klei hiu čhưn ênguê bi mguôp hŏng bruă lŏ hma. Anăn knăl anei ƀrư̆ hruê ƀrư̆ mrâo klei kruăk hŏng phung blei ba yua hlăm leh anăn êngao ala čar, ƀrư̆ ƀrư̆ bi klă jing sa anăn knăl prŏng. Phan Ngọc Thạch, Khua kiă kriê êpul gơ̆ng êpul hgŭm bruă bruă lŏ hma Sunfood Đà Lạt brei thâo: “Hmei hrŏng mă jih jang dŭm mnơ̆ng dhơ̆ng thâo klă phŭn agha, mnơ̆ng dhơ̆ng mâo anôk knơ̆ng bruă tuh tia bi klă kơh dưi ba čhĭ kơ phung blei ba yua. Êngao kơnăn, čiăng hưn mdah anăn knăl kơ dŭm knơ̆ng bruă, hmei mkŏ mjing leh mrô QR Code, mkŏ leh anăn hưn mdah dŭm mbah hâo hưn, mbĭt anăn hmei dôk bi mguôp hŏng taxi, sang huă mnăm truh kơ sang jưh čiăng hưn mdah leh anăn bi lar rup sang Sunfood anei truh hŏng phung tuê hiu čhưn ênguê.

Êpul mkŏ mjing Festival mnga Đà Lạt gưl tal 9 thŭn 2022 ăt mkŏ mjing leh klei kƀĭn kreh knhâo bi lar anăn knăl ƀuôn prŏng mnga Đà Lạt leh anăn knuih hdĭp mnuih Đà Lạt “mhač, khưm, khăp kơ tuê”. Klei kƀĭn mkăp leh lu mmông hưn mdah, bi trông kơ dŭm boh klei djŭm dar boh tŭ dưn anăn knlă ƀuôn prŏng Festival mnga Đà Lạt. Tôn Thiện San, khua bruă sang čư êa ƀuôn prŏng Đà Lạt mñă klă, hŏng Festival mnga Đà Lạt, bruă pla mjing mnga srăng dưi bi mni leh anăn bi klă anăn knăl mnga Đà Lạt jing klei găl čiăng dưi duh bi liê leh anăn mđĭ kyar. “Ti gŭ dŭm hdră êlan kreh knhâo lu dhar bruă, dŭm mta hră mơar, klei bi klă kreh knhâo dưi bi trôngm hlăk mblang, bi klă bruă klam, boh tŭ dưn mơ̆ng anăn knăl ƀuôn prŏng Festival mnga Đà Lạt leh anăn knuih hdĭp mnuih Đà Lạt… Hmei mâo klei đăo knang, hlăm wưng kơ anăp, ƀuôn prŏng Đà Lạt srăng lŏ dơ̆ng bi lar klei găl hlăm alŭ wăl čiăng đĭ kyar hmar, kluôm ênŭm leh anăn kjăp, đru mguôp hlăm klei đĭ kyar mbĭt ti krĭng Lăn Dăp Kngư leh anăn hlăm kluôm ala”.

Festival mnga Đà Lạt gưl tal 9 thŭn 2022 srăng mkŏ mjing truh kơ jih hruê 31/12, ƀuăn rơ̆ng hŏng lu mta phŭn, hdră jăk yâo kơ phung tuê hiu čhưn ênguê leh anăn mnuih ƀuôn sang alŭ wăl dưi ktuê dlăng. Hlăm anăn, dŭm anôk čhĭ mnia mnga srăng dưi dăp djŭm dar truh kơ jih wưng tết nguyên đán.