Hŏng akŏ “Mnga Đà Lạt - Anôk jăk siam kơ êa mil”, Festival Mnga Đà Lạt tal X mkŏ mjing mơ̆ng hruê 5 truh hruê 31/12. Festival Mnga Đà Lạt tal anei mâo lu klei mdê hŏng 9 blư̆ mkŏ mjing êlâo dih hŏng hnơ̆ng prŏng; hnơ̆ng kluôm čar’ lu bruă mkŏ mjing nanao hlăm  thŭn leh anăn hưn boh phŭn dưi mkŏ mjing hlăm mlan 12/2024; boh phŭn mlih mrâo mbruă; lu klei dhar kreh, kdŏ mmuiñ mrâo mâo hnơ̆ng lu ala čar.

Boh nik, klei mñă mơ̆ng Festival Mnga Đà Lạt tal X thŭn 2024 jing wăl rang mdah mnga srăng dưi pŏk mlar kluôm ƀuôn prŏng. Mơ̆ng anôk rang mdah mnga ti ênao êa leh anăn riêng gah ênao êa Xuân Hương hŏng gru hmô jăk siam, jiă kma klei jăk siam hjăn mơ̆ng ƀuôn prŏng Đà Lạt truh kơ dŭm đang mnga, ktuê êlan ƀuôn prŏng, wăl ƀuôn sang, wăl hiu čhưn ênguê ti ƀuôn prŏng Đà Lạt leh anăn krĭng riêng gah.