Aguah mbrue 28/7, Dhar bruă djuê ana čar Gia Lai mkŏ mjing leh klei bi tuôm phung khua mduôn, mnuih mâo kơhưm hlăm mnuih djuê ƀiă čar Gia Lai wưng thŭn 2021 – 2023. Mđĭ hĭn bruă klam hŏng yang ƀuôn, mnuih mâo kơhưm čar Gia Lai ngă leh jăk bruă pô mtrŭt mjhar mnuih ƀuôn sang mđĭ kyar bruă duh mkra ala ƀuôn, đru bi răng mgang klei êđăp ênang alŭ wăl. Msĕ si hlăm wưng thŭn 2021 -2023, phung mduôn khua, mnuih mâo kơhưm ngă leh jăk bruă mtrŭt “mnuih ƀuôn sang bi mguôp mkŏ mkra krĭng ƀuôn sang mrâo, ƀuôn prŏng dhar kreh” hŏng êbeh 700 êklai prăk mâo bi mkrum, duh myơr êbeh 132.000 m2 lăn, lehanăn bi mkrum êbeh 47 êbâo hrue ai ngă bruă.

Mbĭt hŏng anăn, mnuih mâo kơhưm đru leh kơ êbeh 20.000 gŏ êsei ƀun hlăm mnuih djuê ƀiă, thâo bi mlih knhuah mĭn, hdră êlan ngă bruă mđĭ kyar klei duah ƀơ̆ng. Čar Gia Lai čang hmăng hlăm wưng tinăp, mnuih mâo kơhưm lŏ dơ̆ng mtrŭt mjhar jăk hĭn jih jang mnuih nao mđĭ kyar klei hdĭp mda, mkŏ mjing Đảng lehanăn bruă kđi čar mkŏ mkra klei bi mguôp jih jang djăp djuê ana./.