Hŏng akŏ “Gia Lai – Čư̆ dliê kpưn đĭ truh krĭng êa ksĭ”, Thŭn hiu čhưn ênguê ala čar 2026 ba asăp hâo hưn kơ hdră bi mguôp plah wah krĭng čư̆ dliê Lăn dap kngư hŏng krĭng ksĭ, plah wah lăn dliê prŏng kdrưh hŏng boh tŭ yuôm dhar kreh jăk siam mơ̆ng djuê ana. Anei jing wưng čiăng kơ Gia Lai hưn mthâo kơ boh tŭ yuôm mơ̆ng lăn dliê lehanăn anak mnuih krĭng Lăn dap kngư. Hlăm thŭn 2026, mâo 244 hdră bruă dhar kreh, hiu čhưn ênguê, mjuăt ktang asei mlei ti Gia Lai lehanăn lu alŭ wăl mkăn kluôm ala.

Klei êdah êdi jing Knăm mphŭn pŏk thŭn hiu čhưn ênguê ala čar – Gia Lai 2026, tĭng mkŏ mjing mmăt 28-2 ti ƀuôn hgŭm Quy Nhơn. Hlăm knăm mphŭn pŏk, čar Gia Lai srăng mkŏ mjing Klei kƀĭn mtrŭt mđĭ hdră duh bi liê thŭn 2026, tĭng jao klei bi mklă duh bi liê lehanăn siñê hdră bi hgŭm hlăm bruă tuh tia, pui kmlă, bruă nah gŭ, mnia mblei lehanăn hiu čhưn ênguê. Mbĭt anăn, lu hdră tui ksiêm kơ tuê hiu čhưn ênguê ăt dưi mkŏ mjing msĕ si: Hdră hưn mthâo kphê mguôp hŏng hdră hiu čhưn ênguê bruă lŏ hma, hưn mthâo mnơ̆ng ƀơ̆ng jăk alŭ wăl, dŭm hdră mjuăt ktang asei mlei hŏng lu hdră dhar kreh jăk siam./.