Khua gĭt gai Đảng Tô Lâm mñă ktang, hluê si tur knơ̆ng ksiêm wĭt, lŏ čuê dŭm mta phŭn găl guôp mơ̆ng Hdră bhiăn leh anăn klei čuăn êlâo dih, lŏ dơ̆ng ksiêm duah bi mbŏ dŭm klei mĭn mrâo, mta phŭn mrâo, klei čuăn mrâo brei djŏ hŏng boh sĭt. Srăng mdưm bruă ksiêm dlăng leh anăn ngă hdră bhiăn Đảng hlăm kluôm klei ngă bruă mkŏ mjing Đảng, mđĭ klei kiă kriê lăn čar leh anăn ngă mta kñăm mđĭ kyar lăn čar ba mdah leh hlăm klei kƀĭn prŏng tal 14 mơ̆ng Đảng.

Bi klă bruă bruă ksiêm dlăng, ktuê dlăng jing hdră êlan gĭt gai yuôm bhăn mơ̆ng Đảng leh anăn ăt jing hdră brei Đảng ƀuah mkra, čŏng răng mgang, čŏng bi kluôm, čŏng mđĭ hnơ̆ng, jing kdrăp yua ksiêm dlăng klei dưi, krơ̆ng kjăp hdră bhiăn, jing mta phŭn rơ̆ng kơ êlan nao djŏ mơ̆ng hdră mtrŭn leh anăn klei čuăn, Khua gĭt gai Đảng Tô Lâm mñă klă, mlih ktang klei ksiêm dlăng, ktuê dlăng  jing mta phŭn gang mkhư̆ mơ̆ng hnưm, mơ̆ng kbưi, ksiêm dlăng klei dưi hlăm klei ngă bruă, hmao ƀuh dŭm klei arưp jing klei soh. Pŏk mlar klei ksiêm dlăng, rơ̆ng kơ jih jang dŭm hdră êlan mơ̆ng Đảng dưi mkŏ mjing jăk leh anăn tŭ dưn.