Klei bi tuôm dưi mkŏ mjing hlăk Việt Nam mrâo mkŏ mjing tŭ dưn Klei kƀĭn phung bi ala kluôm ala tal XIV mơ̆ng Đảng lehanăn Việt Nam – EU klă klơ̆ng mđĭ klei bi mjĕ jing Ƀĭng hgŭm phŭn kluôm dhuôm. Khua knŭk kna mñă EU lehanăn dŭm ala čar hgŭm jing ƀĭng hgŭm yuôm bhăn hlăm hdră mtrŭn hŏng tač êngao mơ̆ng Việt Nam; bruă mkŏ mjing klei bi mjĕ mrâo hưn mdah klă klei đăo knang bruă kđi čar ƀrư̆ hruê ƀrư̆ kjăp lehanăn mjing boh kdrŭt bi hgŭm hlăm djăp bruă.

Tĭng dlăng kơ klei bi mjĕ Việt Nam – EU, Khua knŭk kna bi êdah klei mơak anăp hdră đĭ kyar leh 35 thŭn mkŏ mjing klei bi mjĕ (1990–2025). Bruă pŏk ngă tŭ dưn Klei kuôl kă mnia mblei êngiê Việt Nam – EU (EVFTA) đru ba EU jing ƀĭng hgŭm bruă mnia mblei prŏng tal 4 mơ̆ng Việt Nam, hlăk Việt Nam jing ƀĭng hgŭm bruă mnia mblei prŏng mơ̆ng EU hlăm ASEAN. Bi hgŭm hlăm hdră lĭng kahan – răng mgang klei êđăp ênang, mdrơ̆ng hŏng klei bi mlih yan adiê, bruă lŏ hma, kriê dlăng hdră bhiăn, bruă kreh knhâo, wăl hdĭp mda… dưi pŏk mlar hŏng lu klei găl. Khua knŭk kna mtă kơ dua tĭng mđĭ klei bi hgŭm hluê ai tiê mâo boh tŭ mbĭt, pŏk ngă tŭ dưn EVFTA, mtrŭt mđĭ hdră mnia mblei, mjing klei găl kơ wăl anôk mnia mblei lehanăn rơ̆ng boh tŭ kơ anôk bruă duh mkra dua tĭng./.