Hlăm klei kƀĭn trông, dhar bruă mặt trận čar Dak Lak hưn mdah leh klah čŭn kơ phung mgơ̆ng asei. Hluê anăn anôk bruă ruah khua mrô 4 mâo 5 čô mgơ̆ng asei bi ala Bruă Kbĭn ala, anôk bruă ruah khua mrô 22 mâo 5 čô mgơ̆ng asei bi ala Êpul gơ̆ng bruă ƀuôn sang čar. Phung mgơ̆ng asei hưn mdah leh hdră ngă bruă, kñăm kơ mta kñăm mđĭ kyar bruă duh mkra - ala ƀuôn, mđĭ hnơ̆ng klei hdĭp mnuih ƀuôn sang, boh nik jing krĭng mnuih djuê ƀiă, mtrŭt mđĭ mlih mrâo hră mơar Knŭk kna, bi mlih mrô leh anăn mđĭ hĭn klei ktuê dlăng kơ bruă hluê ngă hdră êlan, hdră bhiăn lăn čar. Blŭ hrăm ti anăp phung mplĕ hră, Lương Nguyễn Minh Triết, Khua hlăm bruă Đảng gưl dlông, khua bruă Đảng čar Dak Lak mñă klă, tơdah mâo phung mplĕ hră đăp knang ruah ngă pô bi ala Bruă Kbĭn ala gưl 16 srăng gĭr ngă djăp bruă klam mơ̆ng pô bu ala, mđĭ hĭn klei blŭ hrăm hŏng phung bi ala leh anăn mnuih ƀuôn sang, hmao hưn mdah dŭm klei akâo, klei čiăng truh hŏng dŭm anôk bruă mâo klei dưi.

Lương Nguyễn Minh Triết ƀuăn rơ̆ng:

“Kâo ƀuăn srăng mdưm mnuih ƀuôn sang jing mta kñăm mơ̆ng grăp hdră êlan, srăng ksiêm duah, akâo ruh mgaih dŭm klei kpăk čiăng kơ hdră êlan leh ba mdah srăng klă sĭt nao hlăm klei hdĭp leh anăn ba wĭt boh tŭ dưn klă klơ̆ng kơ mnuih ƀuôn sang, srăng kñăm msir dŭm klei dôk mâo sui čiăng bi lar ai dưi mơ̆ng lăn ala ti alŭ wăl čar Dak Lak, hluê anăn mđĭ boh tŭ klei kriê dlăng, ngă mta kñăm rơ̆ng kơ lăn mkra mjing kơ mnuih djuê ƀiă leh anăn phung ƀun ƀin čiăng kơ mnuih ƀuôn sang hơĭt ai tiê mă bruă knuă.”

Phung bi ala bi êdah klei sa ai, bi myuôm hdră êlan ngă bruă mơ̆ng phung mgơ̆ng asei, mbĭt anăn hmăng hmưi phung djŏ ruah srăng ngă djŏ klei ƀuăn, hưn mdah djŏ klei čiăng, klei hmăng hmưi mơ̆ng mnuih ƀuôn sang, đru mtrŭt mđĭ klei đĭ kyar alŭ wăl.