Êpul êya ti alŭ 1, să Hà Tam, kdriêk Đăk Pơ tŭ ngă bruă kriê dlăng, răng mgang giăm 260 ha  dliê mơ̆ng Êpul kriê dlăng dliê knŭk kna mkuôm Dưr An Khê. Dŭm hruê anei, adiê mđiă ktang ngă kơ dŭm wăl dliê anei mâo lu rơ̆k krô, bhĭt tĭt ênưih truh klei pui ƀơ̆ng dliê. Čiăng čŏng gang mkhư̆, să Hà Tam mkŏ mjing leh dŭm êpul kriê dlăng, dăp lu anôk gak răng, hiu ksuang dlăng, rang mgang dliê. Boh nik, anôk bruă mâo leh hdră êlan čuh êlâo mâo klei ksiêm dlăng ti dŭm ênhă ênưih mâo pui ƀơ̆ng. Phạm Đông Mạnh, ti alŭ 1, să Hà Tam, kdriêk Đăk Pơ, sa gŏ sang ngă bruă kriê dlăng, rang mgang dliê brei thâo:

Dŭm êpul mơ̆ng 2 – 3 čô nao ksiêm dlăng 24/24, tơdah mâo klei truh hmei srăng hưn mdah hŏng êpul kriê dlăng dliê Dưr An Khê leh anăn hmei srăng iêo jih jang mnuih nao mgaih msir klei truh hŏng hdră 4 sa anôk, mâo Êpul ngă bruă sa anôk, gĭt gai sa anôk, mnơ̆ng yua sa anôk, bruă nah tluôn sa anôk, hmei ngă bruă kjăp, bi mguôp hrăm mbĭt čiăng mgaih msir klei truh”.

Êpul kriê dlăng dliê knŭk kna mkuôm Dưr An Khê (kdriêk Đăk Pơ, čar Gia Lai) ară anei dôk răng kriê êbeh 10.000ha dliê, hlăm anăn ênhă dliê hrông mâo 3.600ha, dliê pla mâo 1.000ha. Mơ̆ng akŏ thŭn mrâo, anôk bruă bi djăp leh êpul gĭt gai gang mkhư̆, truih mdjiê klei pui ƀơ̆ng dliê leh anăn 4 êpul êya yang ƀuôn ngă bruă kriê dlăng leh anăn jing êpul gang mkhư̆, truih mdjiê klei pui ƀơ̆ng dliê.

Lê Thái Hùng, K’iăng khua kiă kriê êpul kriê dlăng dliê knŭk kna mkuôm Dưr An Khê, kdriêk Đăk Pơ, čar Gia Lai brei thâo, anôk bruă mđĭ hĭn leh bruă ksiêm dlăng, tiŏ nao phung knuă druh mbĭt hŏng dŭm êpul ngă bruă gak răng ti dŭm bĭt anôk ênưih mâo pui ƀơ̆ng kñăm hmao ƀuh, mgaih msir dŭm klei pui ƀơ̆ng. Mbĭt anăn  mkŏ mjing dŭm êpul gang mkhư̆, truih mdjiê pui hŏng êpul êya truh kơ dŭm êtuh čô. Anôk bruă ăt hluê ngă lu hdră êlan msĕ si čih êlâo mâo klei ksiêm dlăng, mkra êlan mnuôr gang pui hŏng dŭm ênhă dliê mâo klei arưp aram pui ƀơ̆ng.

“ Anôk bruă ăt mđĭ hĭn bruă ksiêm dlăng, gak rang hŏng dŭm êpul ngă bruă, bi mguôp hŏng bruă sang čư̆ êa alŭ wăl leh anăn dŭm êpul, dhar bruă djŏ tuôm hlăm bruă hâo hưn, bi mguôp tơdah mâo pui ƀơ̆ng dliê srăng hmao tiŏ nao. Êngao kơnăn, bruă sang čư êa čar leh anăn dŭm knơ̆ng, dhar bruă djŏ tuôm mâo klei uêñ mĭn, mkŏ mjing klei găl hluê ngă dŭm hdră čuh êlâo mâo klei ksiêm dlăng čiăng bi hrŏ jih hnơ̆ng klei pui ƀơ̆ng dliê ti yan bhang.

  Kdriêk Đăk Pơ ară anei kriê dlăng giăm 24.000 ha dliê, hlăm anăn mâo êbeh 19.000ha dliê hrông. Đào Duy Tuấn, khua kiă kriê anôk bruă kriê dlăng dliê kdriêk Đăk Pơ brei thâo, anôk bruă mkŏ mjing leh hdră êlan gang mkhư̆ klei pui ƀơ̆ng leh anăn bi kluôm ênŭm êpul gĭt gai gang mkhư̆ truih mdjiê klei pui ƀơ̆ng gưl kdriêk, să, mđĭ hĭn bruă hâo hưn, mtrŭt mjhar mnuih ƀuôn sang, ksiêm dlăng dŭm anôk bruă pô dliê, bruă sang čư êa dŭm să čiăng kơ bruă gang mkhư̆ pui ƀơ̆ng dliê mâo boh tŭ dưn hĭn.

“ Mơ̆ng akŏ thŭn truh kơ ară anei ka mâo ôh klei pui ƀơ̆ng, ƀiădah anôk bruă kriê dlăng dliê kăn luč lei klei răng, ngă ngơi mang hlăm bruă gang mkhư̆ klei pui ƀơ̆ng. Jêñ jêñ mâo klei gĭt gai phung knuă druh bi mguôp hŏng bruă sang čư êa dŭm să, dŭm anôk bruă pô dliê mđĭ hĭn bruă hâo hưn, hluê ngă jăk hdră 4 sa anôk tơdah tam mâo klei pui ƀơ̆ng dliê, hmao truih mdjiê, amâo mâo brei pui bluh lar, boh nik mđĭ hĭn klei gak răng ti dŭm anôk mâo klei arưp aram pui ƀơ̆ng ktang.