Hlăm 22 boh sang čiăng mdơ̆ng mrâo ti să Gào, ƀuôn prŏng Pleiku, gŏ sang Siu Kra (ƀuôn C) mâo ruah ngă anôk rŭ mkra. Siu Ka hơ̆k mơak brei thâo:

 “Kâo mơak snăk, mni lač jăk kơ ƀuôn prŏng đru leh kơ gŏ sang kâo jing gŏ êsei dleh dlan mkra mđĭ sang dôk, mâo sang mrâo, dua ung mô̆ kâo hơĭt ai tiê mă bruă knuă”

Hlue si hdră kčah, ƀuôn prŏng Pleiku srăng rŭ mdơ̆ng mrâo 41 boh sang leh anăn mkra mrâo 28 boh sang hŏng hnơ̆ng đru 60 êklăk prăk/ boh sang mkra mrâo leh anăn 30 êklăk prăk/boh sang mkra mđĭ. Trịnh Duy Thuân, Khua dlăng bruă đảng ƀuôn prŏng ƀuôn Pleiku, brei thâo:

 “Ƀuôn prŏng Pleiku lăm lui sang tĭ,ƀrôč kơ 69 boh sang, hmei bi mklă wưng hlue ngă leh hlăm mlan 4/2025, akâo kơ dŭm gưl, dhar bruă, alŭ wăl đru jih ai tiê. Hŏng wưng mjêč snăn, dŭm anôk bruă lĭng kahan, anôk bruă duh mkra, dŭm dhar bruă, dŭm gưl, alŭ wăl mđĭ lar ai tiê bi khăp, bi đru, gĭr hlue ngă hdră anei hlue si hdră kñăm leh anăn hdră kčah leh.”

Lač kơ klei hrăm mbĭt mguôp ai tiê hlăm bruă lăm lui sang tĭ, Trung tá Ngô Văn Phôi, K’iăng Khua Trung đoàn 48, Sư đoàn 320, êpul kahan 34, lač klă:

 “Hmei mkŏ mjing leh anôk bruă gĭt gai, mkŏ mjing dŭm êpul mă bruă leh anăn bi hgŭm kjăp hŏng alŭ wăl, boh nik dŭm alŭ, ƀuôn, mkŏ mjing rơ̆ng klei huă ƀơ̆ng, mphŭn rŭ mkra dŭm hdră bruă hlue si hdră kčah čiăng bi leh jăk hdră bruă Knŭk kna leh anăn alŭ wăl kčah leh.”

Mbĭt hŏng Pleiku, jih jang dŭm alŭ wăl hlăm čar Gia Lai ăt dôk mjêč gĭr ktưn bi leh hdră lăm lui sang tŭ, ƀrôč hlăm gưl II/2025. Jing sa hlăm dŭm gŏ sang mâo đru mdơ̆ng sang mrâo, amai Puih Lý (ƀuôn Đe Chi, să Ia Pếch, kdriêk Ia Grai) mgei ai tiê brei thâo:

 “Knŭk kna mđing uêñ mjing klei găl mkra mrâo sang leh anăn mđup brei 1 drei êmô, thŭn êdei ung mô̆ hmei gĭr ktưn tlaih ƀun, mâo klei dưi brei anak pô hriăm hră mơar”

Phạm Thị Kim Tuyến, K’iăng Khua Knơ̆ng bruă sang čư̆ êa să Ia Pêč, bi êdag ai tiê mơak kơ boh tŭ mơ̆ng hdră bruă:

 “Anei jing hdră mơak snăk leh anăn yuôm bhăn hŏng mnuih ƀun. Truh ară anei să adôk hlă brô 20 gŏ êsei dleh dlan kơ sang dôk, să bi hgŭm hŏng anôk bruă ktuê dlăng bi nik čiăng kơ hdră mđĭ lar jih hnơ̆ng boh tŭ tơdah pŏk ngă.”

Hlue si hdră, čar Gia Lai kčah hdră kñăm bi leh mkŏ mkra mrâo leh anăn mkra mđĭ êbeh 8.400 boh sang hlăm gưl 2/2025. Čiăng hlue ngă hdră lui sang tĭ, ƀrôč hlăm kluôm čar, Gia Lai čiăng ênoh bi liê truh giăm 460 êklai prăk. Hlăm anăn Gưl dlông đru leh kơ čar 241 êklai prăk, 87 êklai prăk mơ̆ng ênoh mkiêt mkriêm bi liê 5% mơ̆ng čar leh anăn dŭm alŭ wăl. Hồ Văn Niên, Khua dlăng bruă Đảng čar Gia Lai brei thâo, čar dôk lŏ dơ̆ng gĭr ktưn iêo mkrum klei găl adôk kƀah čiăng bi leh hdră kñăm.

 “Ăt dôk 127 êklai čar ka mâo anăn brei lŏ dơ̆ng iêô mthưr đru, kyua anăn akâo kơ Anôk bruă gĭt gai čar lŏ dơ̆ng mă bruă hŏng dŭm anôk bruă Gưl dlông boh nik Knơ̆ng bruă mặt trận čar Việt Nam čiăng lŏ dơ̆ng đru thiăm kơ Gia Lai. Phung hlăm Anôk bruă gĭt gai čar mđĭ lar ai tiê đua klam, ksiêm dlăng, ktrâo lač leh anăn păn kjăp boh klei ti dŭm alŭ wăl dưi mbha, hưn boh tŭ klă klơ̆ng leh anăn Anôk bruă gĭt gai čar mđĭ lar kslei bi kƀĭn grăp mlan čiăng ksiêm dlăng boh tŭ hlue ngă hlăm grăp mlan”./.