Leh hlăm brô 1 mlan ngă bruă ƀiădah êlan Nguyễn Chí Thanh, kdrêč mơ̆ng êlan Trường Chinh truh ti êlan Lê Duẩn, ƀuôn prŏng Pleiku, mâo mkăp 1,5 êklai prăk hlăm ênoh prăk mâo mkăp kluôm truh 185 êklai prăk, truh 3,6%. Ăt ti Pleiku, êlan Nguyễn Văn Linh, mrâo mkăp giăm 27% hlăm ênoh 100 êklai prăk. Bi Ktuê êlan hdră duh mkra nah Ngŏ (êlan dêč êlan dơ̆ng prŏng mrô 19) – hdră phŭn mơ̆ng čar, hŏng hnơ̆ng duh 1.200 êklai prăk, knŏng mrâo mkăp 3,6 %.

Jih 3 hdră anei êmưt hluê ngă s’aĭ, kyua sa mta phŭn jing ka msir mghaih klei kơ anôk ala, ka jao lăn kơ anôk bruă ngă mkra. Phan Việt Tân – K’iăng khua kriê dlăng hdră lŏ hma, hlăm Anôk kriê dlăng hdră duh bi liê rŭ mdơ̆ng čar Gia Lai brei thâo, hluê klei kčah mtrŭn mơ̆ng Hdră bhiăn Duh bi liê knŭk kna, hdră bi mklă lăn čiăng msir mghaih anôk ala brei ngă lu hdră kyua anăn truh kơ klei êmưt hluê ngă.

“Ară anei ăt dôk guôn msir mghaih anôk ala. Mâo dŭm alŭ wăl, kdriêk Đăk Đoa lehanăn ƀuôn prŏng Pleiku ngă leh hdră ksiêm dlăng. Ƀiădah truh kơ ară anei, dôk gun kpăk hlăm bruă bi mklă ênoh lăn kyua anăn dôk guôn dŭm êpul êya đru kčĕ bi mklă čiăng kơ Knơ̆ng bruă Ngăn dŏ wăl hdĭp mda bi mklă. Leh êpul êya ngă bruă ngă leh, dưi mkăp thiăm prăk, ƀiădah truh kơ ară anei amâo dưi ngă djŏ si hdră kčah mtrŭn.

Mbĭt hŏng mta phŭn gun kpăk hlăm bruă msir mghaih anôk ala, klei kƀah lăn bi mbŏ ăt ngă kơ amâo djŏ ƀiă hdră bruă ti Gia Lai êmưt hluê ngă. Boh sĭt, ti Gia Lai mâo 4 ƀăng lăn bi mbŏ dưi mkăp hră brei ba yua lehanăn 5 ƀăng boh tâo dưi mkăp ba yua. Ƀiădah lu anôk anei kbưi hŏng anôk dôk mkra hdră bruă. Hlăm lu mlan êgao, čar Gia Lai bi mklă ngă leh hră m’ar akâo dưi ba yua dŭm anôk mkăp lăn giăm ƀiădah truh kơ ară anei ka dưi msir mghaih ôh. Nguyễn Văn Quảng – Bi ala anôk bruă mguôp hnư rŭ mdơ̆ng hdră bruă 510, klam hluê ngă hdră bruă mrô 7, hdră êlan duh mkra nah Ngŏ hưn leh klei dleh dlan mơ̆ng êpul êya ngă bruă:

“Hdră rŭ mdơ̆ng mrô 7 mâo 3 boh kban lehanăn 1,5 km êlan truh kơ ară anei knŏng dưi pŏk ngă 1 kban M2 ti Ênao êa Nueng. Hlăm 1,7 km êlan, snăn pô duh bi liê knŏng mrâo jao 500m êlan, phung ngă mkra ăt dôk pŏk ngă ƀiădah truh kơ ară anei ka mâo lăn bi mbŏ. Čiăng mđĭ pral hdră ngă brei mâo lăn bi mbŏ.

Klei dleh kpăk jing ti Gia Lai mâo dŭm hdră rơ̆ng wưng hluê ngă ăt tuôm hŏng klei dleh dlan hlăm bruă mkăp ngăn prăk, kyua kƀah…. Prăk. Anei jing boh sĭt ti dŭm hdră bruă ba yua prăk yua lăn lehanăn mưn yua lăn, hlăk thŭn 2022 truh kơ ară anei, hlăk wăl anôk čhĭ lăn ala, sang dôk amâo lŏ mčhĭt m’uăt, čar dôk kƀah phŭn mkăp anei. Trương Hải Long – Khua anôk bruă sang čư̆ êa čar Gia Lai brei thâo, dŭm knơ̆ng, dhar bruă hlăm alŭ wăl dôk mjêč tui duah hdră msir ruh mtlaih klei dleh dlan.

Knơ̆ng bruă hdră kčah lehanăn Duh bi liê jing anôk bruă kriê dlăng 3 êpul ngă bruă mjêč ba mdah kơ anôk bruă djŏ tuôm pral mkăp prăk adôk, bi leh hră m’ar ngă bruă duh bi liê, mtrŭt mđĭ hdră msir mghaih anôk ala lehanăn mkŏ anôk dôk mrâo. Knơ̆ng bruă hdră kčah lehanăn Duh bi liê gĭt gai, bi hgŭm hŏng phung duh bi liê, dŭm knơ̆ng, dhar bruă, alŭ wăl mđing ruah mtlaih klei dleh dlan hlăm bruă pŏk ngă hdră lŏ krŭ wĭt bruă duh mkra – ala ƀuôn lehanăn 3 hdră ala čar kñăm. Mprăp kơ dŭm bruă phŭn đru kčĕ hŏng Anôk bruă sang čư̆ êa čar čiăng mkŏ mjing Klei bi kƀĭn tĭng dlăng bruă ruh mtlaih klei dleh dlan, gun kpăk êlâo kơ hruê 20/9/2023”.