Phung ƀuôn sang ti ƀuôn Đê Kjiêng, să A Yun, kdriêk Mang Yang mâo phăn jao kiă kriê truh 30 ha dliê mơ̆ng đang dliê knŭk kna mkuôm Kon Ka Kinh. Mđiă hlơr lehanăn thu krô sui, jing klei ênưih snăk ngă truh kơ klei pui ƀơ̆ng dliê hlăm grăp hrue. Čiăng dưi răng mgang dliê hŏng klei jăk, phung hlăk ai ƀuôn Đê Kjiêng bi mbha bruă hdơ̆ng găp hiu hlăm dliê gak răng jêñ jêñ, lehanăn mâo hdră ktir čuê dliê. Măng, mnuih mâo jao răng mgang dliê hlăm ƀuôn lač:

“Knuă druh đang dliê knuk kna mkuôm hriê hâo hưn mtô mblang hŏng mnuih ƀuôn sang kơ hdră răng mgang dliê, phung ƀuôn sang bi răng mgang dliê, lehanăn bi hlue gưt ngă djŏ, kăp nao hưn hŏng anôk gak răng, kñăm čiăng dưi mâo nanao dliê mtah siam, lehanăn mgi dih dưi mâo ênoh hrui wĭt mơh mơ̆ng bruă dliê”.

Đang dliê knŭk kna mkuôm Kon Ka Kinh mâo êbeh 41.000 ha dliê, luôm hlăm jih dơ̆ng mơ̆ng alŭ wăl kdriêk Đăk Đoa, Mang Yang lehanăn Kbang. Lê Văn Vinh, K’iăng khua đang dliê knŭk kna mkuôm Kon Ka Kinh brei thâo, mơ̆ng akŏ yan bhang mtam, êpul êya bruă mâo tiŏ nao leh knuă druh mnuih ngă bruă hiu ksiêm dlăng jêñ jêñ, păn kjăp jih jang boh klei, čŏng mkŏ mjing 4 hdră kơ anăn mtam,lehanăn mkŏ mjing dŭm êpul gang mkhư̆ klei pui ƀơ̆ng dliê. Hlăm anăn mâo sa kdrêč jing ai tiê phung ƀuôn sang đru nao bi tir čuê dliê, gang mkhư̆ pui răng mgang dliê.  

“Êpul bruă kreh mkŏ mjing jêñ jêñ klei hâo hưm mtô mblang hŏng phung ƀuôn sang hlăm dŭm boh ƀuôn mâo dŭm anôk jing jĕ hma pưk mnuih ƀuôn sang, bi knông hŏng lăn dliê, snăn đuĕ hiu nao pưk hma bi hưn hŏng êpul kiă kriê dliê kyâo. Êpul bruă ăt mkŏ mjing mơh dŭm bruă jah waih rơ̆k rung pơ̆ng pŏk mdhă čih hưn klei kăm ghă hŏng dliê, mâo klei bi hgŭm hŏng bruă sang čư̆ êa să lehanăn dŭm êpul êya bruă pô dliê bi kiă kriê kjăp”.

 Hlăm ênoh êbeh 60.000 ha dliê ti Mang Yang, mâo giăm 10.000 ha yap jing anôk ênưih êdi lĕ hlăm klei pui ƀơ̆ng, ti dŭm boh să: AYun, H’Ra, Đê Ar, Đắk Trôi, Đắk DJăng. Tui si Nguyễn Công Ngọc, K’iăng khua anôk bruă kiă kriê dliê kyâo kdriêk Mang Yang čiăng dưi gang mkhư̆ klei pui ƀơ̆ng dliê, kdriêk lŏ bi kjăp leh jih jang êpul bruă kiă kriê răng mgang klei pui ƀơ̆ng dliê dŭm boh să mkŏ mjing hdră 4 kơ anăn mtam, lehanăn mkŏ mjing dŭm êpul hiu đru răng mgang dliê đĭ leh truh kơ dŭm êtuh čô mnuih, knơ̆ng ăt jing hŏng mnuih ƀuôn sang:

“Grăp blư̆ hlăm yan bhang truh snăn bruă gang mkhư̆ klei pui ƀơ̆ng dliê dưi lŏ hyuă kjăp hĭn, êpul bruă mkŏ mjing klei hâo hưn, kčĕ mtô, mtrŭt mjhar, mtă mtăn kơ dŭm pô dliê, knơ̆ng bruă sang čư̆ êa să anôk mâo dliê bi mâo bruă klam hâo hưn truh hŏng grăp gŏ sang mnuih ƀuôn sang hdĭp giăm dliê. Anôk bruă kiă kriê dliê kyâo mâo kdrăp kăp ksiêm klei pui ƀơ̆ng dliê, pral lŏ hưn lehanăn nao bi truih mdjiê klei pui ƀơ̆ng dliê, amâo mâo lui pui ƀơ̆ng ling lar kơ anôk mkăn ôh”./.