Dŭm hruê anei, phung mă bruă rŭ mdơ̆ng êlan mlir kdriêk Mang Yang – Ia Pa mă bruă jih ai tiê ƀiădah êlan mâo boh tlaih 33km, ênoh duh bi liê êbeh 195 êklai prăk, ăt tlă anăp hŏng klei êmưt. Mphŭn rŭ mdơ̆ng mơ̆ng mlan 11/2023 leh anăn mĭn tĭng bi leh hlăm mlan 1/2026, ƀiădah ară anei lu bĭt anôk ăt ka dưi ruh mgaih anôk ala, amâodưi mă bruă. Krung Dam Đoàn, k’iăng khua bruă sang čư̆ êa kdriêk Mang Yang brei thâo, lu anôk čiăng ruh mgaih anôk ala ƀiă ka thâo klă ênoh lăn:

          “Bruă ruh mgaih anôk ala djo tuôm hŏng 33 gŏ sang, găn 3 să: Kon Thụp, Đăk Djrăng leh anăn Lơ Pang (kdriêk Mang Yang). Ară anei ăt adôk đa đa anôk čiăng mâo ênoh lăn kơh bruă sang čư̆ êa kdriêk bi mguôp hŏng dŭm anôk bruă duh bi liê čiăng mtrŭt bi pral dŭm hră mơar, hnưm mâo ênoh klă čiăng hưn mdah hŏng mnuih ƀuôn sang, rơ̆ng djŏ hŏng klei čuăn hdră bhiăn.”

Bi kơ phung duh bi liê, Nguyễn Hữu Sơn, klam bruă adŭ bruă kriê dlăng hdră mrô 01 (Êpul kriê dlăng hdră duh bi liê mkŏ mkra čar Gia Lai) brei thâo, truh kơ ară anei, ênoh bruă ngă knŏng mâo mă giăm 61% hdră kčah. Anôk bruă srăng gĭr ruh mgaih dŭm klei kpăk gun čiăng bi leh bruă êlâo kơ hruê 30/8.

 “Hlăm bruă bi mguôp êpul srăng jêñ jêñ tiŏ nao mnuih mă bruă hŏng Êpul gơ̆ng tla hnô leh anăn bruă sang čư̆ êa kdriêk Mang yang čiăng kơ hlăm klei mă bruă tơdah mâo kpăk gun srăng mgaih msir pral. Êpul bruă ăt gĭt leh anăn gĭt gai phung ngă bruă bi kƀĭn êdeh êdâo, kdrăp yua, mnuih mă bruă leh anăn mnơ̆ng yua čiăng mtrŭt bi pral klei mă bruă čiăng djŏ hŏng hdră kčah.”

Hdră anôk mnuih ƀuôn sang dôk êlan Nguyễn Văn Linh (ƀuôn prŏng Pleiku) ăt dôk êmưt kyua ka dưi ruh mgaih anôk ala. Hdră mâo ênoh duh bi liê 260 êklai prăk, yua ngăn prăk gưl dlông leh anăn mĭn tĭng bi leh mơ̆ng thŭn 2022 – 2025. Ƀiădah, klei mă bruă truh kơ ară anei knŏng mâo mă giăm 605. Hlăm ênhă giăm 40ha čiăng hrui wĭt, knŏng mâo hlăm brô 24ha dưi mâo klei tŭ ư hŏng hdră êlan čiu tla…

Hŏng dŭm boh sĭt anei, bruă sang čư̆ êa čar Gia Lai ba mdah leh hră mơar gĭt gai dŭm anôk bruă djŏ tuôm ksiêm dlăng, ruh mgaih klei dleh dlan leh anăn mtrŭt bi pral klei mă bruă. Nguyễn Hữu Quế, k’iăng khua bruă sang čư̆ êa čar Gia Lai mbĭt hŏng dŭm êpul, dhar bruă, alŭ wăl hmar ksiêm dlăng boh sĭt leh anăn hmao mâo dŭm klei gĭt gai čiăng ruh mgaih klei dleh kơ dŭm bruă mkŏ mkra, mtrŭt bi pral klei mă bruă ti dŭm alŭ wăl mâo leh anôk ala, rơ̆ng kơ klei ngă bruă leh anăn mprăp bi djăp klei găl ba jao kơ dŭm hdră jing wưng mrâo.

 “Bruă klam hlăm klei hâo hưn čiu hnô ruh mgaih anôk aka jing mơ̆ng dŭm gưl bruă sang čư̆ êa. Nao bi tuôm hŏng grăp čô čiăng hlăk mblang, mâo đa đa srăng ngă ktang phĭt, tơdah kpăk gun srăng hưn hŏng bruă sang čư̆ êa čar akâo klei blŭ mguôp leh anăn bi êdah klei mĭn pô, ngă sơnăn kơh ba wĭt boh tŭ dưn kơ knŭk kna, kơ mnuih ƀuôn sang srăng mñă kơ bruă sang čư̆ êa čar ksiêm dlăng bi klă. Čiăng bi êdah ai tiê bruă klam, hruê mmông msĕ si bi klă klei gĭr si srăng ngă čiăng bi hluh êlan čiăng ngă dŭm bruă kơ anăp”.

Bruă sang čư̆ êa čar Gia Lai mjêč hluê ngă dŭm hdră êlan čiăng rơ̆ng kơ klei dlăng kriê tŭ dưn dŭm hdră bruă, hdră duh bi liê bruă knŭk kna jing mjêč êdi hlăm wưng mkŏ dăp, bi kluôm phung mă bruă bruă sang čư̆ êa alŭ wăl. Phung mâo bruă sang čư̆ êa čar Gia Lai mñă brei ksiêm dlăng jing dŭm hdră duh bi liê bruă knŭk kna wưng man dưn 2021 – 2025, hdră êlan thŭn 2025 ăt msĕ kơ dŭm hdră lŏ jao. Mbĭt anăn, bruă sang čư̆ êa čar mñă kơ dŭm anôk bruă djŏ tuôm mgaih msir dŭm hdră ka tĭng mkă, dŭm hdră mă prăk êlâo ka hrui wĭt leh anăn bi hdră dưi bi klă ƀiădah ka djăp prăk tla.

Čiăng mtrŭt bi pral leh anăn rơ̆ng kơ klei jêñ jêñ hlăm bruă kriê dlăng, bruă sang čư̆ êa čar Gia Lai gĭt gai dŭm knơ̆ng, dhar bruă leh anăn bruă sang čư̆ êa dŭm kdriêk, wăl krah, ƀuôn prŏng čiăng bi klă bruă klam, mgaih msir dŭm boh klei mâo. Boh nik hŏng dŭm anôk bruă mkŏ mkra leh anăn anôk bruă hmăi mơ̆ng klei mkŏ dăp anôk bruă knŭk kna čiăng ksiêm dlăng, čiăng mkra mlih găl guôp čiăng rơ̆ng kơ klei tŭ dưn, mkriêt mkriêm, ñĕ kơ klei luč liê mang.