Nao ti knăm bi tuôm hŏng dŭm anôk bruă duh mkra mnia mblei hŏng Khua anôk bruă sang čư̆ êa čar Gia Lai, lŏ mâo phung kơiăng khua anôk bruă sang čư̆ êa čar, phung khua kiă kriê dŭm knơ̆ng, dhar bruă djŏ tuôm. Ti knăm anei, Rah Lan Chung bi êdah klei čang hmăng, gru hmô “Kphê phung mă bruă duh mkra” jing sa hdră bi blŭ hrăm klă anăp đru kơ bruă sang čư̆ êa mđing hmư̆ klei blŭ, klei hưn mdah mơ̆ng anôk bruă duh mkra, mơ̆ng anăn pral ruh mtlaih dŭm klei dleh dlan hlăm hdră mă bruă.

Hlăm ai êwa hơ̆k mơak, bi ala anôk bruă duh mkra hưn mthâo leh kơ hdră mă bruă mbĭt anăn hưn lač kơ dŭm klei dleh dlan, gun kpăk. Phung khua kiă kriê dŭm knơ̆ng, dhar bruă djŏ tuôm nao leh hlăm hdră bi trông, čih pioh dŭm klei blŭ ba mdah. Phung khua anôk bruă sang čư̆ êa čar Gia Lai čang hmăng êpul êya anôk bruă duh mkra lŏ dơ̆ng hrăm mbĭt, duh myơr, đru mguôp dŭm klei mĭn mrâo, hgŭm kngan mkŏ mkra Gia Lai jing anôk truh jăk êdi kơ hdră duh bi liê, đru mđĭ kyar bruă duh mkra – ala ƀuôn alŭ wăl. Hluê hdră kčah, gru hmô “Kphê phung mă bruă duh mkra” srăng dưi krơ̆ng kjăp hlăm grăp aguah knăm pă hlăm hruê kăm./.