Hrue 21/2, êpul bruă kiă kriê dliê kyâo Gia Lai mâo leh hră mtrŭn mtă kơ dŭm êpul bruă djŏ tuôm pral mă bruă mbĭt hŏng kdriêk Kông Chro ksiêm bi nik klei uă druôm 125 phŭn kyâo dliê ti čuê dliê mrô 7, mrô 10 hlăm đang dliê mrô 792 mơ̆ng knơ̆ng bruă dliê kyâo Kông H’de, dôk hlăm alŭ wăl să Sơ Ró, hmao ƀuh hlăm hrue 15/2 leh êgao. 

Êlâo anăn tui si klei hâo mdah mơ̆ng pô dliê jing đang kyâo   Kông H’de, Anôk bruă kiă kriê dliê kyâo kdriêk Kông Chro hgŭm leh hŏng dŭm dhar bruă djŏ tuôm nao mkă dlăng klei bi rai dliê anăn. Snăn brei ƀuh, mâo 125 phŭn kyâo arăng tlĕ druôm hlăm đang dliê Kông H’de, jing kyâo kpeh, kyâo truôl... hŏng ênoh jih jang kyâo hgăl jing 30,2m3. Ară anei, dŭm anôk bruă djŏ tuôm dôk ngă hră mơar tui duah pô ngă soh, lehanăn phat mkra tui si klei bhiăn./.