Kyua hmăi mơ̆ng adiê hjan ti Êa ksĭ Ngŏ, hruê mbruê, 25/9, lu alŭ wăl ti čar  Gia Lai adiê hjan prŏng. Kñăm mkhư̆ klei hmăi mơ̆ng klei klưh hroh lăn, êngăp êa srăng mâo kyua êa lip, dŭm alŭ wăl, boh nik dŭm kdriêk nah ngŏ, ngŏ dưr čar dôk pŏk ngă hdră mdrơ̆ng. Dŭm kdriêk nah ngŏ leh anăn ngŏ dưr čar Gia Lai huĭdah mâo êa lip, klưh hroh lăn ti krĭng čư̆ čhiăng leh anăn êngăp êa ti krĭng tlung ƀiă jing: kdriêk KBang, wăl krah An Khê, kdriêk Đak Đoa, kdriêk Mang Yang, kdriêk Ia Grai, kdriêk Čư̆ Păh, ƀuôn prŏng Pleiku, kdriêk Chư Prông, kdriêk Đức Cơ, mơ̆ng hruê anei truh hruê mgi, dŭm alŭ wăl anei lŏ dơ̆ng mâo adiê hjan man dưn, hjan prŏng leh anăn angĭn êbŭ, mâo anôk hjan prŏng snăk.

Čiăng mprăp klei mdrơ̆ng leh anăn bi hrŏ klei luč liê, Anôk bruă gĭt gai gang mkhư̆ klei yan adiê ngă leh anăn duah phung mâo klei truh čar Gia Lai mtă kơ dŭm anôk bruă ba anăp ksiêm dlăng, ktuê dlăng dŭm wăl mnuih ƀuôn sang ktuê hang krông, êa hnoh, krĭng tlung čiăng pral mkŏ mjing mbĕ đuĕ mnuih ƀuôn sang krĭng mâo êa lip, klưh hroh lăn.