Gia Lai mâo êlan klei pui kmlă 500Kv lehanăn 220Kv hŏng boh taih 800km, găn hlăm lu pưk hma mnuih djuê ƀiă. Kyua mâo nanao klei mtô mblang mtă mtăn kơ bruă đru bi răng mgang êlan klei pui kmlă, snăn jih jang phung ƀuôn sang mâo klei thâo săng, mđrăm mbĭt hŏng anôk bruă pui kmlă bi răng mgang gơ̆ng pui kmlă lehanăn êlan klei pui kmlă. Rmah Chơn, ti ƀuôn Breng 2, să Ia Dêr, kdriêk Ia Grai, čar Gia Lai mâo 2 ha kphê giăm hŏng êlan klei pui kmlă 500kv brei thâo:

“Kâo mâo đang kphê jĕ hŏng êlan klei pui kmlă prŏng, asei mlei kâo lehanăn gŏ sang tui gưt nanao jih jang mta mtrŭn kơ bruă răng mgang klei êđăp ênang êlan klei pui kmlă. Kyuanăn, kâo lehanăn gŏ sang lŏ dơ̆ng bi mtă mtăn mơh hŏng jih jang mnuih hlăm ƀuôn thâo amâo mâo dưi duah mă, lehanăn dŭm gŏ sang mâo hma jĕ êlan klei pui kmlă bi hlue gưt klei mtă mtăn kơ bruă bi răng mgang êlan klei pui kmlă”      

Kơ kdrêč anôk bruă pui kmlă Gia Lai, jing êpul kreh jêñ jêñ hiu ksiêm dlăng klei êđăp ênang klei pui kmlă, mprăp kdrăp bi êran dlông adiê UAV kñăm ksiêm dlăng pral lehanăn tŭ dưn hĭn jih jang êlan klei pui kmlă, snăn bruă kiă kriê hŏng klei hiu čuă dlăng lehanăn hŏng kdrăp Hotline êjai kñăm čiăng dưi kiă kriê hŏng klei pral, mă bruă hŏng klei kjăp, bi hrŏ hrue mmông khăt pui. Boh nik, ti dŭm anôk mđĭ mtrŭn pui, mnuih ngă bruă mâo nanao klei mă bruă djŏ klei bhiăn tui si hrue mbha mmông gak răng, bi mdoh lehanăn mkra wĭt anôk jhat, mghaih msir dŭm bruă tơdah ƀuh mâo klei amâo mâo jăk. Trần Văn Trang, Khua anôk bruă mđĭ mtrŭn pui 500 kV Pleiku 2, Êlan klei pui kmlă Gia Lai, lač:

Hlăm yan anei klei bi yua pui kmlă jing prŏng mơ̆ng 80 – 90%, snăn ayŏng adei bi gak răng nanao kiă kriê bi jăk kdrăp ba yua pui kmlă. Kyuadah êjai yua pui hŏng hnơ̆ng prŏng ênưih snăk ba klei amâo mâo jăk kơ kdrăp masin, masin srăng đĭ hlơr, lehanăn đuĕ nao kơ lu klei amâo mâo jăk êjai bi êran. Ară anei jih jang kdrăp mă bruă mâo mkŏ hlăm computer pral dưi thâo ƀuh jih jang, phung dôk gak ênưih păn kjăp jih jang kdrăp bi êran hlăm computer. Djăp mta bruă bi mơĭt truh hŏng computer, snăn klei bi êran, klei kiă kriê mâo ksiêm dlăng jăk lehanăn pral hĭn, djăl hĭn mơh thâo buh djăp mta klei amâo mâo jăk”.

Tui si Trần Khánh Trung, K’iăng khua kiă kriê anôk bruă êlan klei pui kmlă Gialai, hŏng 783 km êlan klei pui kmlă 220kV lehanăn 500Kv, êpul êya anei lŏ kiă kriê, lehanăn bi êran dua anôk mđĭ mtrŭn pui 500kV, 1 anôk mđĭ mtrŭn pui 220Kv. Êpul bruă ba êlan êlâo ba yua kdrăp mrô, duh bi liê kdrăp mă bruă mrâo mrang kơ jih jang klei kiă kriê, bi êran. Mơ̆ng anăn, bi hrŏ jih jang ênoh bi liê, lehanăn mđĭ hĭn klei tŭ dưn bruă knuă ngă:

“Hlăm thŭn 2022, knơ̆ng bruă bi êran pui kmlă 3 jing êpul êya bruă ba êlan êlâo hlăm knơ̆ng bruă ba yua kdrăp phiơr hlăm adiê UAV kăp ksiêm, lehanăn kiă kriê jih jang bruă knuă êlan klei pui kmlă. Klei ksiêm duah mkŏ mjing jih jang bruă kiă kriê hŏng kdrăp thâo mĭn, mjing klei mdul êdi hlăm hdră êlan mă bruă. Jih jang hdră êlan anăn mâo ba yua hlăm klei mă bruă, dưi bi mlih leh jih hdră êlan mă bruă jing ba yua kdrăp kreh knhâo leh sơăi, ba wit leh klei tŭ dưn prŏng hlăm bruă bi mlih mrô wưng thŭn 2021 – 2025 mơ̆ng knơ̆ng bruă êlan kleipui kmlă mrô 3”./.