Dăp anôk bruă knŭk kna, Lâm Đồng mơ̆ng 137 anôk bruă gưl să adôk 51 să, ƀuôn hgŭm, bi hrŏ 86 anôk bruă knŭk kna, bi knar hŏng êbeh 62 % (êngao kơ 2 să Ninh Gia ti kdriêk Đức Trọng leh anăn Bà Gia ti kdriêk Dă Huoai lui snăn). Ară anei, čar ăt dôk mjêč mkŏ mjing êpul bruă bi mŭt 3 čar Lâm Đồng, Bình Thuận leh anăn Dak Nông jing čar mrâo hlue si hdră mtrŭn mơ̆ng Anôk dlăng bruă Đảng gưl dlông.

Leh bi mŭt, čar Lâm Đồng mrâo mâo ênhă 24.233 km2, giăm 3,3 êklăk čô mnuih ƀuôn sang, jing čar prŏng hĭn kluôm ala. Hlăm hdră dăp, čar Lâm Đồng mĭn tĭng truh jih mlan12/2025 mâo 1.097 čô knuă druh, phung mă bruă hlăm čar mdei bruă. Čar mĭn tĭng bi liê êbeh 1.140 êklai prăk đru kơ phung knuă druh anei, hlue si Hdră mtrŭn 178/2025 mơ̆ng Knŭk kna.