Lŏ wĭt ti kdrŭn găn êa krông Sêrêpôk, anôk pô leh anăn phung ƀĭng hgŭm ngă bruă bruă pŏk êlan, Đại tá Lê Xuân Bá, khua kiă kriê hđăp Trung đoàn 4 công binh, Sư đoàn 470, Binh đoàn 12 ăt dôk mgei ai tiê. Čuh brui mgưi bi hdơr kơ phung mah jiăng djiê êngiă, Đại tá Lê Xuân Bá ktrâo kơ anôk kdrŭn ksĭ găn krông, ñu yăl dliê, akŏ yan bhang thŭn 1973, anôk bruă diñu mâo bruă klam rŭ mjing kban êlan klông mơ̆ng êlan 19 nao tĭ Krĭng dhŭng krĭng Lăn Dăp Kngư, rơ̆ng mâo êlan mgăn nao ti ƀuôn prŏng Ƀuôn Ama Thuôt. Ti anôk anei, ñu leh anăn phung ƀĭng hgŭm mkra sa grông êlan kơ êdeh sar leh anăn sa kdrông đung kơ ôtô, knong phao ktrŏ, kahan hang găn krông Sêrêpôk.

Hlăm wưng klei bi blah ktang phĭt, bruă pŏk êlan čiăng rơ̆ng kơ klei hgăm leh anăn rơ̆ng kơ hdră bhiăn “Nao amâo mâo gru, tŭk knă amâo mâo asăp, blŭ amâo mâo ênai”.Êdeh sar, êdeh luôm msei mâo sa êlan hjăn. Grăp bĭt êlan jing ngă sa kdrông đung mơ̆ng hang nah anei pia jing hang dưr, hang dih pia jing hang dhŭng. Boh prŏng mơ̆ng kdrŭn anei jing 6m, boh taih truh kơ hang nah dih jing 200. Ñu jing sa krŭn boh tâo yua êdeh ben tuh boh tâo leh anăn hli brei kpă jing êlan êlan kơ êdah sar, êdeh luôm msei găn. Leh ngă êlan anei mâo dŭm êtuh boh êdeh sar, êdeh luôm msei găn kdrŭn anei.

Hluê si Đại tá Lê Xuân Bá, kdrông đung anei mâo anăn pia LPP dưi mkra mơ̆ng dŭm kŭm păn msei dăp đrông, rŏng kdrông dưi mkra hŏng kyâo. Êlan dưi dăp hŏng dŭm boh tâo prŏng čiăng mjing êlan nao. Kdrông anei dưi ba dŭm êpul lĭng kahan phŭn, êdeh sar, êdeh êdâo nao truh ti dŭm čar krĭng Ngŏ dhŭng, êdei hĭn nao hlăm hdră klei bi blah Hồ Chí Minh thŭn 1975.

Hŏng bruă rŭ mjing, mkŏ kdrông 2 nah hang krông Sêrêpôk, phung roh ksun mblah bi rai ktang phĭt. Hŏng ai tiê bi blah ktang phĭt, gĭr jih ai răng mgang kơ hdră anei, 57 čô lĭng kahan mơ̆ng Trung đoàn 4 công binh leh anăn Tiểu đoàn kahan hang 21 hlăm Sư đoàn 470 asăn asei djiê êngiă ti alŭ wăl kdrŭn găn krông. Đại tá Đặng Đình Đường, khua kiă kriê hđăp Sư đoàn 470 wĭt hdơr, hlăm dŭm thŭn mlan anăn, ai tiê leh anăn klei mĭn “Săn asei kơ lăn čar” dưi đru kơ grăp čô knuă druh, lĭng kahan găn jih klei dleh dlan, knap mñai čiăng bi leh bruă klam.Thâo phung roh ksŭng mblah klei rai ktang phĭt ƀiădah arăng ăt thâo jing bi hluh êlan čiăng kơ êdeh leh anăn mnuih nao ti anôk bi blah. Klei yuôm bhăn hĭn ti anôk anăn jing si ngă săn asei čiăng amâo mâo klei hblŏk, bi hrŏ ti sa hnơ̆ng đuč. Jih jang phung knuă druh, ƀĭng hgŭm hmei, wăt 57 čô êbuh tinei diñu ăt mĭn msĕ sơnăn mơh.

Ăt ti anôk anei, leh hruê sua wĭt klei êngiê krĭng kwar Dhŭng, 14 čô knuă druh, lĭng kahan hlăm kahan ksiêm yang ƀuôn čar Dak Lak (ară anei jing lĭng kahan knông lăn čar Dak Lak djiê leh hlăm klei bi blah hŏng kahan Pôn Pốt čiăng răng mgang kluôm Lăn čar.

Găn leh giăm 50 thŭn, truh kơ ară anei, anôk anei dôk mă dŭm gơ̆ng kyâo ti dlông rŏng lăn hlăm brô 20cm. Mơ̆ng thŭn 2013, Kdrŭn găn ksĭ Sêrêpôk gưi tŭ yap jing wăl kriê pioh hbuê ênuk yuôm bhăn. Mơ̆ng anăn truh kơ ară anei, anôk anei jing anôk hrah hlăm klei mtô mjuăt hƀuê ênuk knhuah gru bruă krŭ kdơ̆ng kơ phung mda asei. Ti djiêu kdrŭn găn êa krông, jing sang knưng čih anăn phung jhŏng ktang djiê djiê êngiă dưi rŭ mdơ̆ng leh anăn jao kơ kđông kahan Knông lăn Sêrêpôk răng mgang leh anăn kriê dlăng. Êlan mơ̆ng kdrŭn găn êa krông truh kơ êlan dơ̆ng mrô 14C dưi lang gŭ drŏng siam, găl kơ grăp čô nao čuă dlăng.

Čiăng mkŏ mjing wăl siam hlăm wăl kriê pioh, phung knuă druh, lĭng kahan kđông kahan knông lăn Sêrêpôk rŭ mdơ̆ng leh leh 2 hdră êdam êra, pla dŭm mta ana ƀơ̆ng boh msĕ si kneh, boh kruê̆. Bruă pla ana kyâo kih waih wăl sang knưng ăt mâo phung knuă druh, lĭng kahan truăn ngă nanao. Thiếu tá Phạm Văn Hiếu, Khua bruă Đảng, khua bruă kđi čar kđông kahan knông lăn Sêrêpŏk, lĭng kahan knông lăn čar Dak Lak brei thâo:Jing anôk bruă răng mgang knông lăn, hlăm anăn mâo wăl kriê pioh anei, phung knuă druh, lĭng kahan hdơr nanao kơ ai tiê phung ayŏng ama, boh nik phung săn asei, djiê êngiă čiăng răng mgang klei êngiê djuê ana. Jing phung nao êdei leh anăn gưl lŏ čuê, phung knuă druh, lĭng kahan hmei thâo săng nanao kơ klei myưng mơang leh anăn bruă klam, lŏ dơ̆ng bi lar knhuah hdĭp leh anăn klei hriăm, klei thâo ngă bruă čiăng lŏ dơ̆ng čuê kơ phung ayŏng ama răng mgang klei dưi kiă kriê, răng mgang knông lăn mơ̆ng lăn čar hlăm wưng mrâo.

Klei bi blah kbưi leh, ƀiădah dŭm gru anăn ăt dôk ti kdrŭn găn êa krông Sêrêpôk jing dŭm boh tŭ hƀuê ênuk yuôm bhăn, jing gru kruăk myưng m’ang kơ klei bi blah ktang phĭt, amâo mâo kdŭn mơ̆ng mnuih ƀuôn sang drei. Anăn jing gru kruăk bi hdơr kơ grăp čô mnuih ƀuôn sang kơ dŭm klei duh myơr, săn asei mơ̆ng phung ayŏng ama êbuh leh kyua klei êngiê djuê ana, hluh hlir lăn čar.