Hur har, jih ai tiê đru kơ mnuih ƀun, dleh dlan anei jing klei ƀuh klă mơ̆ng lu mnuih ƀuôn sang ti Ƀuôn Kram, să Êa Tiêu, kdriêk Čư̆ Kuiñ, čar Dak Lak tơdah bơ̆k bâo kơ H’Bliăk Niê, kreh iêu Amĭ Bơ̆ng. Jing K’iăng khua hđăp Anôk bruă sang čư̆ êa kdriêk Čư̆ Kuiñ, leh wĭt mdei bruă, Amĭ Bơ̆ng mâo mnuih ƀuôn sang đăo knang ruah jing mnuih mâo k’hưm ti ƀuôn Kram. Ñu jing sa čô nao hgŭm sĭt êmĭt hlăm hdră bi mgrăng ti alŭ wăl, đru hyuă kjăp klei bi mguôp ti ƀuôn sang. Amĭ Bơ̆ng brei thâo snei:

“Kâo kreh nao hŏng khua ƀuôn mtrŭt mjhar mnuih ƀuôn sang gĭr mă bruă mđĭ kyar hdră duh mkra. Thâo hdră dlăng kriê wiê ênăk ana ksu, kphê, rông ŭn mnŭ čiăng mđĭ hnư hrui wĭt, rông anak čô hriăm hră m’ar truh anih. Snăn kơh dưi mâo êdei anăp jăk siam hĭn. Tal dua kâo ăt đru mbĭt hŏng să, ƀuôn mtă mtăn kơ mnuih ƀuôn sang kriê kjăp knhuah dhar kreh djuê ana pô msĕ si tông čing čhar, dŭm knăm m’ak mơ̆ng djuê ana pô čiăng kơ phung čô anak êdei anei dưi thâo knhuah dhar kreh jăk siam mơ̆ng djuê ana”.

Truh ară anei, să Êa Tiêu djăp leh hnơ̆ng čuăn krĭng ƀuôn sang mrâo. Hnư hrui wĭt kah knar grăp čô thŭn 2022 mâo giăm 45 êklăk prăk. Dŭm anôk bruă nah gŭ dưi duh bi liê rŭ mdơ̆ng, anôk bruă êlan klông dưi mkra kjăp. Kluôm să mâo 14 sang dhar kreh ti alŭ lehanăn 7 sang bi kƀĭn ƀuôn. Dưi mâo boh tŭ anei, mbĭt hŏng bruă sang čư̆ êa alŭ wăl, êpul êya mơ̆ng kdriêk truh kơ să, mâo klei đru mguôp mơ̆ng Amĭ Bơ̆ng, ñu ngă jăk hdră mtô mblang čiăng mnuih ƀuôn sang thâo mta kñăm, klei yuôm bhăn mơ̆ng bruă mkŏ mkra krĭng ƀuôn sang mrâo. Khă snăn, klei Amĭ Bơ̆ng ăt dôk mđing mĭn, anăn jing dhar kreh djuê ana ƀrư̆ luič ram.

“Kâo ƀuh mâo dŭm klei dleh dlan msĕ si klei hdĭp ară anei mdê hŏng êlâo, ară anei mnơ̆ng dhơ̆ng đĭ kyar hĭn, lu mnuih wơr bĭt hĕ knhuah dhar kreh djuê ana mơ̆ng aê aduôn pô đưm. Êngao kơ anăn, klei duh ƀơ̆ng ka kjăp, mâo lu mnuih dôk jưh kang đei hlăm klei đru mơ̆ng knŭk kna. Kâo gĭr mtrŭt mjhar čiăng mnuih ƀuôn sang gĭr mă bruă, amâo dôk guôn klei đru mơ̆ng pô mkăn.

Jing sa čô thâo săng kơ klei bhiăn, mâo klei thâo hlăm hdră đru kơ yang ƀuôn lu thŭn, leh wĭt ti ƀuôn sang, Amĭ Bơ̆ng mtă mtăn nanao kơ mnuih ƀuôn sang gĭr hluê ngă kjăp hdră êlan mtrŭn mơ̆ng Đảng, hdră bhiăn mơ̆ng knŭk kna. Ñu mtă mtăn kơ mnuih ƀuôn sang amâo hmư̆ klei arăng duah mplư, brei thâo bi mguôp, bi đru hdơ̆ng găp msir klei ư̆ êpa, bi hrŏ klei ƀun knap.

“Kâo čang hmăng ƀuôn sang pô đĭ kyar, tlaih kơ ƀun, gĭr ktưn kpưn đĭ hlăm klei hdĭp, anak čô gĭr hriăm hră truh anih. Mtă mnuih ƀuôn sang amâo hmư̆ klei phung jhat mplư, amâo bi kdơ̆ng hŏng Đảng, knŭk kna, hdĭp lehanăn mă bruă djŏ hdră bhiăn. Hlăm ƀuôn sang, brei gĭr mă bruă, hgŭm kngan mkŏ mkra ƀuôn sang jăk siam hĭn.

Hà Huy Quang, K’iăng khua dhar bruă djuê ana čar Dak Lak brei thâo, phung mniê mâo k’hưm hlăm êpul êya đru mguôp prŏng hlăm bruă mkŏ mkra hdră duh mkra – ala ƀuôn hlăm krĭng mnuih djuê ƀiă. Klei blŭ mơ̆ng mnuih mâo k’hưm mâo boh tŭ yuôm, čiăng kơ mnuih ƀuôn sang đăo knang hĭn, hmư̆ hĭn, mơ̆ng anăn hluê ngă jăk hdră mtrŭt mjhar hlăm ƀuôn sang ăt msĕ mơh mđĭ kyar bruă duh mkra – ala ƀuôn krĭng mnuih djuê ƀiă ƀrư̆ hruê ƀrư̆ tŭ dưn, jăk hĭn.

“Ară anei, êpul mnuih mâo k’hưm jing mniê hlăm êpul êya mnuih djuê ƀiă ti alŭ wăl čar amâo đei lu ôh, ƀiădah hŏng klei găl mâo mdê mơ̆ng mnuih djuê ƀiă krĭng lăn dap kngư hdĭp hluê tĭng kơ mniê, snăn klei blŭ, k’hưm, bruă klam mơ̆ng phung mniê mâo k’hưm yuôm bhăn snăk, boh nik hlăm bruă mjuăt bi hriăm čô anak, gŏ sang, krơ̆ng kjăp lehanăn kriê pioh knhuah dhar kreh jăk siam mơ̆ng djuê ana. Lehanăn bruă mkŏ mkra, mđĭ kyar hdră duh mkra – ala ƀuôn, mkŏ mkra klei hdĭp dhar kreh, snăn mâo klei blŭ, boh hră hlăm êpul êya mnuih djuê ƀiă.

Hŏng klei đru mguôp kơ ƀuôn sang, Amĭ Bơ̆ng mâo leh Dhar bruă djuê ana čar Dak Lak mđup brei Hră pah mni jing mnuih mâo k’hưm hĭn hlăm hdră mtô mblang, mtrŭt mjhar mnuih djuê ƀiă mdĭ kyar bruă duh mkra – ala ƀuôn, rơ̆ng klei êđăp ênang lehanăn krơ̆ng kjăp knhuah dhar kreh – klei bi mguôp djuê ana./.