Bruă ruah mă leh anăn iêo mthưr mnuih ƀuôn sang nao kahan mâo leh dŭm alŭ wăl ngă jăk, kjăp, rơ̆ng kơ klei êngiê, mtăp mđơr, klă mngač, khua hŏng klei čuăn mơ̆ng klei bhiăn nao kahan. Truh kơ wưng anei, jih jang 8 kdriêk, ƀuôn prŏng ti čar Dak Nông dưi ngă leh bruă ruah mă, ăt msĕ hŏng bi mguôp tŭ ư hdră anăn, hră mơar hŏng dŭm anôk bruă tŭ mă lĭng kahan leh anăn mâo asăp mtrŭn iêo nao kahan, mprăp kơ hruê knăm nao mŭt kahan.

Thiếu tá Phan Huy Hùng, Khua knơ̆ng gĭt gai lĭng kahan ƀuôn prŏng Gia Nghĩa, čar Dak Nông brei thâo, hlăm wưng Tết Nguyên đán Quý Mão, bruă Đảng nah gŭ, bruă sang čư êa dŭm gưl leh anăn dŭm êpul bruă kđi čar yang ƀuôn mkŏ mjing leh lu klei êmuh čuă, mđĭ ai phung êdam êra, ăt msĕ hŏng gŏ sang mâo anak čô nao kahan thŭn 2023. Hluê anăn ăt thâo klă boh sĭt, klei hmăng mhưi, mbĭt anăn ăt ruh mgaih dŭm klei dleh dlan, kpăk gŭn, mkŏ mjing klei găl kơ phung êdam êra mâo klei hơĭt ngă bruă.