Aguah ưm hlăk hruê kăm krah mlan tlâo Lăn Dap Kngư, ti gŭ ana kyâo mtah, tač sang hră gưl 2 Ngô Mây, ti să Ea Mdroh, kdriêk Čư̆ Mgar, čar Dak Lak, hơ̆k mơak leh mâo êdeh sang dlăng hră êrô hiu truh hŏng hđeh sang hră. Tinei, mbĭt hŏng bruă dlăng hră, ksiêm hriăm klei hâo hưn hlăm internet, phung hđeh lŏ hgŭm hlăm lu klei hlăp lêñ. Khăp kơ klei čih kač rup, adei Triệu Yến Nhi, djuê ana Dao, hđeh sang hră adŭ 6A, pral duah hdruôm hră kơ klei čih kač rup leh anăn ksiêm hriăm kơ anăn phung čih kač rup hing ang dlông rŏng lăn:

“Kâo ƀuh hdruôm hră anei jăk snăk, kơ klei čih kač rup leh anăn lu klei mkăn. Kâo čang hmăng êdei anei srăng jing sa čô thâo čih kač rup msĕ si Van Goh. Leh nao hlăm hdră anei, kâo ƀuh mơak snăk, ñu ba kơ kâo klei mĭn mbruă lu”

Bi ti sang hră gưl 2 Lê Hồng Phong, ti să Ea Nam, kdriêk Ea H’Leo, anei jing gưl tal 2 êdeh sang hră êrô hiu ba klei mơak kơ hđeh sang hră. Adei Nguyễn Thảo My, adŭ 9A4, lač:

“Kâo nao hlăm klei hlăp lêñ mâo phung amai adei mkŏ mjing leh anăn lŏ mkra mjing mnơ̆ng dhơ̆ng hŏng phung adei adŭ 6, 7 leh anăn dlăng hră hŏng diñu. Kâo čang hmăng êdei anei jing pô čih mkra hdră. Bruă dlăng hră srăng đru mbŏ boh hră kơ pô lu snăk, boh nik tơdah klei čih snăn kâo dưi ba hlăm klei čih pô.”

 Dưi thâo êdeh sang dlăng hră êrô hiu “Klei mngač klei thâo” kyua Anôk bruă sang dlăng hră (Phŭn bruă dhar kreh - mjuăt ktang asei mlei leh anăn hiu čhưn ênguê) bi hgŭm hŏng Keh Thiện Tâm (êpul grup Vingroup) mđup brei kơ dŭm boh sang dlăng hră kluôm ala. Ti Dak Lak, êdeh mâo êbeh 2000 hdruôm hră hŏng lu mta msĕ si klei čih, kơ hđeh, hƀuê ênuk… Êngao anăn, êdeh lŏ dưi mâo tivi, măi tĭnh, laptop, kdrăp kriê dlăng, dlăng hră kơ phung bum ală…

 Pŏk ngă mơ̆ng knhal jih thŭn 2019 truh ară anei, sang dlăng hră čar Dak lak mkŏ mjing nanao êdeh dlăng hră ti dŭm sang hră ti krĭng taih kbưi. Trần Thị Thu Hà, K’iăng Khua Sang dlăng hră čar Dak Lak, brei thâo mbĭt hŏng bruă dlăng hră, hưn mthâo hdruôm hră mrâo, sang dlăng hră lŏ mkŏ mjing lu klei hlăp lêñ, mâo hnư mnơ̆ng pah mni mđĭ ai hđeh. Hlue si hdră kčah thŭn 2023, êdeh sang dlăng hră “Klei mngač klei thâo” srăng lŏ dơ̆ng ngă 96 gưl, kñăm lar bra dhar kreh dlăng hră kơ jih jang mnuih, boh nik hŏng phung hđeh.

“Tui hlue si phung srăng dlăng leh anăn klei găl, sang dlăng hră čar srăng mlih mrâo klei hlăp lêñ, mơak dlăng hră amâodah mkŏ mjing klei bi lông mguôp hŏng bruă dlăng hră, đru kơ hđeh mâo klei khăp dlăng hră, jing mâo djŏ klei mgô̆ ôh ƀiădah mjing klei mđĭ ai hriăm hră”.

 Mbĭt hŏng Dak lak, êdeh sang dlăng hră “klei mngač klei thâo” dưi pŏk ngă ti dŭm alŭ wăl mkăn ti Lăn Dap Kngư. Ti Gia Lai, êdeh sang hră dlăng lu kdrăp mnơ̆ng êrô hiu mâo ênoh bi liê êbeh 1 êklai prăk. Hlăm êdeh dưi mprăp êbeh 5 êbâo hdruôm hră dŭm mta. 10 boh măi tíng, tivi, êngao anăn lŏ mâo hdruôm hră răk leh anăn kdrăp pioh kơ phung bum ală. Hlue si klei ksiêm dlăng mơ̆ng Khua gĭt gai sang dlăng hră čar Gia Lai:  Anei jing sa hdră yuôm bhăn, đru kơ dŭm sang dlăng hră pral mkŏ mjing bruă ba klei hâo hưn giăm hŏng mnuih ƀuôn sang, đru lăm lui klei amâo thâo klei hâo hưn, amâo thâo yua kdrăp mrâo, pŏk mlar hdră dlăng hdruôm hră.

 Bi ti Lâm Đồng, sang dlăng hră bi hgŭm mkŏ mjing dŭm gưl êdeh sang dlăng hră êrô hiu “Klei mngač klei thâo” ti 21 sang hră dŭm gưl: gưl sa, gưl 2, gưl tlâo ti kdriêk Đức Trọng, Lâm Hà leh anăn ƀuôn prŏng Bảo Lộc. Hŏng giăm 3 êbâo hdruôm hră ba nao mâo lu mta msĕ si: Mtô bi hriăm knhuah hdĭp, mtô klei thâo hdĭp mda, mtô kơ êkei mniê, klei čih, klei yăl dliê hŏng rup. iêô jak leh dŭm pluh êbâo gưl hđeh sang hră hgŭm.

 Gưl êdeh mâo anăn “klei mngač klei thâo” mjing leh sa ai êwa mrâo, đru hlue ngă Hdră mđĭ kyar dhar kreh dlăng hră hlăm êpul êya. Hdră bruă mđĭ dŭm bruă hriăm jih klei hdĭp hlăm sang hră dlăng, sang kriê pioh, sang dhar kreh, êpul mâo Khua knŭk kna bi mklă. Êdeh pui sang dlăng hră êrô hiu đru mguôp tŭ dưn hlăm bruă mđĭ dhar kreh dlăng hră kơ phung hđeh sang hră./.