Hlăm anăn, Êpul hgŭm phung êdam êra amâo jăk asei mlei Việt Nam bi hgŭm leh hŏng dŭm anôk bruă duh mkra AI lehanăn phung thơ̆ng kơ bruă mrô sa hlăm kdrăp mrô kñăm bi lar kdrăp klei thâo anak mnuih, đru kơ mnuih amâo jăk asei mlei mđĭ klei thâo ba yua kdrăp mrô ênuk mrâo. Anei ăt jing hdră kñăm hluê ngă Hdră mtrŭn mrô 57 mơ̆ng Phŭn bruă kđi čar hlăm bruă mđĭ kyar hdră ba yua kdrăp kreh knhâo, mrâo mrang lehanăn bi mlih mrô ala čar.

Hlăm dŭm hruê mlan 3 anei, lu adŭ hriăm hlăm adŭ leh anăn wăt online kơ AI, mlih mrô dôk mkŏ mjing kơ phung êdam êra hlăm kluôm ala, hlăm anăn mâo phung êdam êra amâo mâo jăk asei. Phung thơ̆ng kơ bruă kơ AI, pô mkŏ mjing mta phŭn hing ang kah mbha kơ dŭm mta phŭn, klă klơ̆ng hĭn leh anăn ênưih hĭn kơ klei dưn yua mrâo hĭn kơ bruă knuă grăp hruê mơ̆ng phung amâo mâo jăk asei mlei.

Khădah jơ̆ng êwiên đĭ êdeh trŭt, ƀiădah ayŏng Đoàn Ngọc Chiến, ƀuôn sang ti Hà Tĩnh, amâo mâo tuôm lui ôh mmông bi hriăm mơ̆ng phung thơ̆ng kơ bruă. Mđing hmư̆ leh anăn čih dŭm klei hriăm mrâo čiăng êdu kơ bruă knuă hlăm grăp blư̆ nao hlăm adŭ hriăm hdră bruă mrô mơ̆ng Êpul phung êdam êra amâo mâo jăk asei mlei Việt Nam mkŏ mjing, ayŏng Chiến brei thâo:

Bruă phŭn jing čhĭ mnia ti sang Pesthop. Kâo ƀuh klei čhĭ mnia kdrăp mrô dôk đĭ kyar, boh nik hlăm mbah tiktok, kâo hmăng hmưi dưi yua kdrăp mrâo mrang AI hlăm bruă mđĭ kyar dŭm mta phŭn, čih mkra mta phŭn, video viral… Êjai thâo êpul êdam êra amâo mâo jăk asei mlei Việt Nam mkŏ mjing hdră mnuih ƀuôn sang hriăm kơ bruă mrô, kâo bi klă nao hgŭm, phung amâo mâo jăk asei mlei dưi mâo klei nao jĕ hĭn hŏng kdrăp mrâo AI, čiăng dưi mâo bruă knuă djŏ guôp leh anăn đru kơ asei pô. Kâo hmăng hmưi leh thâo srăng dưi mkra dŭm mta phŭn, video viral anăn amâo guôn klei mtô kơ sa êpul êya mkăn”.

Êngao kơ bruă čhĭ mnia mnơ̆ng dhơ̆ng kơ mnơ̆ng rông ti Hà Nội, ayŏng Đoàn Ngọc Chiến lŏ ngă bruă hâo hưn ti anôk bruă mtô bruă mă leh anăn mđĭ kyar phung amâo mâo jăk asei mlei Việt Nam. Kyuanăn, êjai nao hlăm adŭ hriăm, ñu mâo leh phung thơ̆ng kơ bruă hưn mdah kơ klei dưn yua AI msĕ si Copilot hŏng dŭm mta đru kơ bruă knuă grăl hruê: kơ klei hlăk mblang klei čih pioh, mkŏ mjing mta phŭn, mkăp brei klei thâo hriăm leh anăn dưn yua čiăng kčoh hră pral, ngă klei hưn mdah, mkŏ mjing klei mĭn ngă bruă…

Bruă kâo jing mđing klei hâo hưn mơ̆ng anôk bruă, ngă dŭm hdră iêo mthưr klei đru, mkŏ mjing dŭm hdră êlan đĭ kyar kơ anôk bruă…kyuanăn êjai nao hlăm hdră leh anăn mâo phung thơ̆ng kơ bruă AI đru kčĕ, đru kơ kâo thâo lu hĭn kơ klei mrâo mrang mrô čiăng dưi čŏng ksiêm hriăm leh anăn dưn yua hlăm bruă knuă grăp hruê pô, msĕ si Copilot, kâo dưi dưn yua hlăm bruă mkŏ mjing hdră êlan bruă mă, ngă klei hưn mdah, dŭm klei mĭn mđĭ kyar bruă knuă”.

Hluê si phung thơ̆ng kơ bruă, hlăm dŭm thŭn kơ anăp, mâo 65% bruă ară anei srăng dưi hrô hŏng kdrăp mrâo mrang. Anei ăt jing klei găl kơ phung êdam êra amâo mâo jăk asei mlei ti Việt Nam thâo kơ klei mlih mrô, mđing kơ bruă mă, čô̆ kơ bruă, mnia mblei online, nao hgŭm hlăm dŭm bruă yang ƀuôn. Ti anăp boh sĭt anei, Êpul phung êdam êra amâo mâo jăk asei mlei Việt Nam mkŏ mjing leh êpul Mnuih ƀuôn sang hriăm kơ bruă mrô, mâo wăt phung thơ̆ng kơ bruă mrô 1 hlăm lu mta bruă msĕ si: AI, Blockchain, êđăp ênang leh anăn hgăm klei hưn, Pô mkŏ mjing mta phŭn mrô, phung čih mkra, kač mkra, lập trình… nao hgŭm mrô kơ dŭm mta phŭn, dưn yua ênưih hĭn hlăm klei mă bruă leh anăn klei hdĭp kơ phung êdam êra amâo mâo jăk asei mlei. Ayŏng Phạm Văn Thành, Khua êpul hgŭm phung êdam êra amâo mâo jăk asei mlei Việt Nam brei thâo:

Hmei mkŏ mjing dŭm adŭ hriăm klă anăp leh anăn online hlăm 3 mlan kơ anăp. Ară anei jing hruê hriăm tal êlâo hưn kơ copilot mơ̆ng Microsoft. Êngao kơnăn, hmei ăt bi mguôp hŏng dŭm anôk bruă mâo dŭm tur knơ̆ng leh anăn dưi mâo hdră hriăm yua AI… leh anăn tur knơ̆ng gang mkhư̆ klei duah mplư dưi bi mrâo klei hưn kơ klei hgăm klei hưn ăt msĕ mơh hŏng dŭm mmông mtô klă anăp srăng đru kơ hdră bruă mnuih ƀuôn sang hriăm mrô kơ phung êdam êra amâo mâo jăk asei mlei Việt Nam mâo boh tŭ dưn.”

Čŏng pô nao hgŭm hlăm êpul “Mtô kơ mnuih ƀuôn sang hriăm hdră mrô”, grăp čô grăp mta bruă mtô bi hriăm, kah mbha klei hriăm kơ AI, đru kơ phung amâo mâo jăk asei mlei ñŭ kma hŏng yang ƀuôn leh anăn dưi čô̆ kơ bruă. Mơ̆ng anăn, diñu dưi đru kơ phung ka thâo kơ klei mlih mrô thâo kơ bruă anei. Lê Công Thành pô mkŏ mjing hdră “Mnuih ƀuôn sang hriăm kơ AI” brei thâo:

Grăp čô mă bruă hlăm yang ƀuôn čiăng thâo yua klei thâo mĭn mơ̆ng anak mnuih mkra mjing, hlăm lu hnơ̆ng mdê mdê msĕ si: yua hlăm klei hrăm hră mơar, yua hlăm bruă mkăn, hlăm klei hdĭp aguah tlam. Sitôhmô sa mta mnơ̆ng ƀơ̆ng drei dưi thâo hnơ̆ng mta jăk dŭm mâo. Kyuanăn klei thâo dưn yua klei thâo mĭn mơ̆ng anak mnuih mkra mjing jing klei yuôm êdi. Ƀiădah kyua ñu mrâo đei, ka mâo lu mnuih thâo yua. Bruă kâo jing klei thâo mĭn mơ̆ng anak mnuih mkra mjing. Kâo hmăng hmưi dưi bi lar klei thâo mĭn mơ̆ng anak mnuih mkra mjing kơ lu phung amâo mâo jăk asei mlei ti Việt Nam leh anăn kah mbha klei hriăm kơ phung ka thâo kơ kdrăp mrô.”

Mlih mrô amâo mâo mdei lar bra hlăm djăp mta bruă, pŏk lu klei găl čiăng kơ phung amâo mâo jăk asei mlei čŏng pô hĭn hlăm bruă nao jĕ, djŏ guôp leh anăn ñu kma hlăm klei hdĭp, mkŏ mjing klei mtăp mđơr hlăm yang ƀuôn. Dŭm adŭ hriăm mnuih ƀuôn sang hriăm kơ bruă mrô dôk ƀrư̆ ƀrư̆ hlăm hruê, bi lar klei thâo mrô hlăm phung êdam êra amâo mâo jăk asei mlei ăt msĕ mơh jih jang mnuih ƀuôn sang, đru kơ Việt Nam mkŏ mjing yang ƀuôn mrô mrâo mrang, mprăp kơ klei ñŭ kma leh anăn đĭ kyar./.