Dưi mkŏ mjing mơ̆ng hruê 10/7 truh kơ ară anei, hdră bruă êdam êra yan mdei mtah čar Dak Lak thŭn anei mkŏ mjing ti 9 să, wăl krah hlăm čar Dak Lak. Hlăm 15 hruê êgao, êpul êdam êra gưl čar pŏk leh 28 adŭ hriăm yan mdei kơ 700 čô hđeh sang hră gưl 1 leh anăn gưl 2, sa adŭ mtô boh hră kơ mnuih ƀuôn sang ti să Ea Hiu, kdriêk Krông Pač.

Mkŏ mjing 93 mmông mă bruă êdam êra, mjĕ êrô dhar kreh, klei kdŏ mmuñ ti dŭm alŭ ƀuôn, pluă mbĭt hŏng bruă hâo hưn kơ dŭm hdră êlan, hdră mtrŭn mơ̆ng Đảng, klei bhiăn ala čar, bi doh wăl hdĭp mda, hâo hưn klei hrăm kơ klei ƀă k’kiêng anak, hdră gŏ sang, gang mkhư̆ klei amâo mâo jăk hlăm yang ƀuôn. Ngă 17 mta bruă, hdră bruă êdam êra msĕ si: Kuič mngač êlan ƀuôn, mkra bi jăk sang kƀĭn ƀuôn, waih mnuôr êa, pla mnga ktuê êlan, đang mnga êdam êra.