Ƀri bi hdơr 62 thŭn Hruê knhuah gru Êpul kahan ksiêm gang mkhư̆, truih mdjiê klei pui ƀơ̆ng lehanăn đru dŏng mnuih mâo klei truh, 22 thŭn Hruê jih jang mnuih ƀuôn sang gang mkhư̆ klei pui ƀơ̆ng, mmăt mbruê (28/9), ti Anôk bruă Dhar kreh Mnuih ngă bruă bi mjĕ mjuk Việt Xô mkŏ mjing leh Hdră “Mtrŭt mjhar jih jang mnuih ƀuôn sang gang mkhư̆, truih mdjiê klei pui ƀơ̆ng lehanăn đru dŏng mnuih mâo klei truh”  mâo Phŭn bruă Kahan ksiêm bi hgŭm hŏng Sang mđung rup Việt Nam mkŏ mjing.

Khua anôk bruă kƀĭn ala Vương Đình Huệ nao leh ti knăm anei. Ti hdră anei, bi mni leh dŭm bruă ngă jăk siam, jhŏng, mâo boh tŭ êdah êdi mŏng êpul kahan lehanăn mnuih ƀuôn sang hlăm hdră gang mkhư̆, truih mdjiê klei pui ƀơ̆ng lehanăn đru dŏng mnuih mâo klei truh lehanăn bi hdơr kơ mnuih ƀuôn sang mâo klei truh, lač jăk kơ phung knuă druh, lĭng kahan lehanăn mnuih ƀuôn sang săn leh asei nao hlăm hdră gang mkhư̆, truih mdjiê klei pui ƀơ̆ng lehanăn đru dŏng hlăm wưng êgao. Hlăm wưng ti anăp, klei pui ƀơ̆ng, mtuh dôk mâo dleh dưi ksiêm dlăng kyua anăn brei mđing hĭn kơ hdră anei, djŏ hŏng klei dôk mâo kñăm răng mgang kjăp klei êđăp ênang kơ kluôm yang ƀuôn./.