Gưl Tết Nguyên đán Bính Ngọ 2026 (mơ̆ng hruê 27 mlan 12 truh hruê 6 Tết), čar Lâm Đồng čih yap hnơ̆ng tue hiu čhưn đĭ ktang. Hlue si Knơ̆ng bruă sang čư̆ êa čar, ênoh tue hiu čhưn dlăng, mdei msăn mâo hlăm brô 925.000 gưl, đĭ 32% mkă hŏng Tết Ất Tỵ 2025; hlăm anăn tue ala tač êngao đăo tĭng mâo 62 êbâo gưl.

Ênoh hrui wĭt  hiu čhưn ênguê mâo hlăm brô 1.850 êklai prăk. Tue kƀĭn lu mơ̆ng hruê 2 truh hruê 4 Tết; lu anôk dôk jưh ti Đà Lạt, Phan Thiết leh anăn Mũi Né mâo hnơ̆ng mưn adŭ lu snăk. Hnơ̆ng yua adŭ dôk jưh kah knar kluôm čar mâo 80–85%, brei ƀuh ai iêô jak tue hiu čhưn lŏ dơ̆ng kơrŭ wĭt jăk, mjing klei găl kơ đĭ kyar bruă hiu čhưn ênguê hlăm thŭn 2026.

Hdră hiu čhưn ênguê Khánh Hòa akŏ thŭn mrâo hŏng lu klei bi êdah jăk hlăk ênoh tuê hiu čhưn đĭ lu, lu anôk dôk đih đăm bŏ mnuih, ênoh hrui mâo wưng têt djuê ana Bính Ngọ 2026 mâo hlăm brô 2.200 êklai prăk, đĭ 62% mkă hŏng wưng anei thŭn êlâo. Mơ̆ng hruê 29/12 truh hruê 5 Têt, tač êdeh phiơr prŏng Cam Ranh mâo giăm 800 gưl phiơr hŏng êbeh 140 êbâo čô tuê, mbĭt anăn mâo lu phung tuê hiu čhưn êlan jơ̆ng.

Hdră hiu čhưn yan mnga mkŏ mjing hŏng klei mčhĭt mơuăt ti dm anôk hiu čhưn, lăn mnga êa siam. Kluôm čar drông hlăm brô 320 êbâo čô tuê dôk, đĭ êbeh 12%, hlăm anăn tuê tač êngao 120 êbâo čô, đĭ êbeh 23%. Anei jing tur knơ̆ng jăk găl čiăng kơ alŭ wăl lŏ dơ̆ng mđĭ kyar bruă hiu čhưn ênguê, mđing truh kơ ênoh hrui wĭt mâo 77 êbâo êklai prăk hlăm thŭn 2026./.

 Hlue si Knơ̆ng bruă dhar kreh, mjuăt asei mlei leh anăn hiu čhưn ênguê čar Dak Lak. Hlăm 6 hruê Tết (mơ̆ng 17-22/2), kluôm čar drông hlăm brô 395.000 gưl tue hiu čhưn, ênoh hrui wĭt hiu čhưn ênguê đăo tĭng mâo 457 êklai prăk. Mkă hŏng Tết Ất Tỵ, hnơ̆ng tuê đĭ 33% leh anăn ênoh hrui wĭt đĭ 25%. Dŭm anôk hiu čhưn ênguê leh anăn dhar kreh êpul êya krĭng nah Yŭ lŏ dơ̆ng jing anôk truh jăk siam, hlăk êjai nah Ngŏ mâo lu tue hiu čhưn hlăm êa ksĭ leh anăn anôk jăk siam, mdei msăn.  Lu bruă ngă dhar kreh, mjuăt asei mlei akŏ yan mnga dưi mkŏ mjing msĕ si klei bi lông waih mram să Krông Ana, klei bi lông waih mran ênao Suối Bùn (să Sơn Hòa) leh anăn dŭm hdră knăm mơak mĭn tĭng mkŏ mjing hlăm wưng kơ anăp. Boh tŭ jăk anei lač kơ klei iêô jak ƀrư̆ klă mngač  mơ̆ng hiu čhưn ênguê alŭ wăl hŏng klei dhar kreh leh anăn hiu čhưn ênguê êpul êya.