Êbeh 1 mlan leh mphŭn pŏk Festival mnga Đà Lạt tal 9 thŭn 2022, êpul tuê kluh nao ti ƀuôn prŏng anei ƀrư̆ hruê ƀrư̆ lu. Ti ƀuôn mnga Đa Thiện, sa hlăm 5 ƀuôn mnga mâo mơ̆ng sui leh ti ƀuôn prŏng Đà Lạt, tuê hiu čhưn dưi nao truh ti đang hiu dlăng lu mta mnga jăk siam, mbĭt hŏng ƀĭng ngă lŏ hma pla mjing, kriê dlăng mnga. Tuê hiu čhưn Trần Thanh Trà, hriê mơ̆ng ƀuôn prŏng Hồ Chí Minh, lač kơ klei pô hiu dlăng. “Ƀuh ai êwa jăk siam, jing ƀuôn prŏng klei khăp leh anăn ƀuôn prŏng mnga.  Djăp mta mnga jing sa mnâo, sa êa mil... leh anăn jih jang jăk siam, mtah leh anăn blang mngač snăk.”

Mbĭt hŏng ƀuôn mnga Đa Thiện, dŭm ƀuôn mnga Xuân Thành, Vạn Thành, Thái Phiên, Hà Đông mơ̆ng ƀuôn prŏng Đà Lạt ăt bi êdah lu mta mnga siam, rơ̆ng dŭm mta klei găl čiăng êdi čiăng duh kơ phung tuê. Vũ Anh Dũng, ti ƀuôn mnga Hà Đông, ƀuôn hgŭm 8, ƀuôn prŏng Đà Lạt, brei thâo, mnuih ƀuôn sang wăl ƀuôn prŏng lŏ mkra êlan klông, mđĭ dŭm anôk hiu čhưn dlăng mguôp hŏng dŭm mta mnga siam: “Ƀuôn bruă hmei mkŏ mjing hưn mdah dŭm anôk hiu čhưn ênguê kơ tuê nao čhưn dlăng. Sĭt mâo tuê nao snăn hmei mâo mnuih ƀuôn sang ktrâo lač nao ti grăp anôk hlue si klei čiăng. Jing phung tuê čiăng nao ti đang mnga cúc snăn hmei ba truh ti đang mnga cúc, mnga ly snăn mâo mnuih atăt leh anăn ktrâo lač kơ phung tuê. Dưi lač, ai tiê mnuih ƀuôn sang hơ̆k mơak snăk leh mkŏ mjing dŭm anôk hiu čhưn ênguê ti ƀuôn mnga snei”.

Tơdah nao ti dŭm ƀuôn mnga, phung tuê dưi thâo sa hruê ngă ƀĭng lŏ hma, duah hdră pla mjing, kriê dlăng dŭm mta djam tam, boh kroh mdê hjăn ti Đà Lạt, čŏng pô pĕ dŭm boh tei nan hruê̆ ksă hrah, hlai mbĭt hlăm ai êwa klei hdĭp mnuih Đà Lạt. Êngao kơ dŭm anôk kyua ƀuôn mnga mkŏ mjing, anôk anei lŏ mâo lu anôk hiu čhưn ênguê hlăm đang lŏ hma mơ̆ng dŭm knơ̆ng bruă, anôk bruă duh mkra hiu čhưn ênguê dôk jưh ti alŭ wăl. Hlue si Nguyễn Hùng Vỹ, ti ƀuôn mnga vạn Thành, bruă ba dŭm ƀuôn mnga djuê ana, dŭm anôk hiu čhưn ênguê lŏ hma hlăm bruă duh kơ phung tuê pŏk sa êdei anăp jăk mơak kơ mnuih ƀuôn sang alŭ wăl. Kyua dŭm mta mnơ̆ng dhơ̆ng mơ̆ng ƀĭng ngă lŏ hma ngă srăng mâo lu mnuih duah leh anăn thâo, mơ̆ng anăn mđĭ anăn knăl, ênoh yuôm mnơ̆ng dhơ̆ng lŏ hma leh anăn ba prăk hrui wĭt hơĭt kjăp hĭn. Êngao anăn, lu tuê weh čhưn ăt srăng ba lu hdră bruă mkăn đĭ kyar. Nguyễn Hùng Vỹ, lač: “Hiu čhưn ênguê lŏ hma ti ƀuôn mnga Vạn Thành snăn dôk đĭ kyar jing jăk, ba lu klei tŭ dưn bruă duh mkra lu. Ƀuôn prŏng ăt dôk mtrŭt mjhar, mjing klei găl jih ai tiê kơ mnuih ƀuôn sang ƀuôn mnga ăt msĕ mơh dŭm anôk bruă duh mkra ti alŭ wăl đĭ kyar hlue si hdră hiu čhưn ênguê lŏ hma. Bi mguôp hiu čhưn ênguê êjai mkra mjing mnơ̆ng dhơ̆ng êjai, hdră mtrŭn anei kâo ƀuh tŭ dưn”.

Hlue si Tôn Thiện San, Khua Knơ̆ng bruă sang čư̆ êa ƀuôn prŏng Đà Lạt, hlăm gưl Festival Mnga Đà Lạt tal 9 leh anăn Tết Nguyên, alŭ wăl mkŏ mjing hdră “Đà Lạt - hiu čhưn ênguê dŭm ƀuôn mnga”, kñăm hưn mthâo, hưn mdah hƀuê ênuk mkŏ mjing, klei jăk siam krĭng lăn, anak mnuih mơ̆ng dŭm ƀuôn mnga mâo leh mơ̆ng dưm truh hŏng phung tuê. Anei ăt jing gưl čiăng mtrŭt mjhar, iêo jak dŭm anôk bruă duh mkra, mnuih ƀuôn sang ti dŭm ƀuôn mnga lŏ dơ̆ng mđĭ ktang bi lông mkra mjing, duh bi liê mđĭ kyar lŏ hma mguôp hŏng hdră mđĭ kyar hiu čhưn ênguê. Tôn Thiện San, brei thâo, kơ hnơ̆ng sui, ƀuôn prŏng srăng čuăl mkă mđĭ kyar klă klơ̆ng dŭm bruă hiu čhưn ênguê anei čiăng mđĭ klei tŭ dưn bruă duh mkra ala ƀuôn: “Dŭm ƀuôn mnga ngă bruă jing sa knhuang tal êlâo, hmei dôk čuăl mkă dŭm ƀuôn mnga, leh čuăl mkă dưi bi mklă snăn srăng rŭ mdơ̆ng dŭm ƀuôn mnga bi klă klơ̆ng hĭn. Hmei srăng rŭ mdơ̆ng dŭm gru hmô hlue si ƀuôn mnga srăng mâo dŭm mta mnơ̆ng klă klơ̆ng čiăng mđĭ lar klei găl ti ƀuôn mnga anăn. Êlâo hĭn dŭm ƀuôn mnga ăt mâo mnơ̆ng dhơ̆ng, si tô hmô msĕ ƀuôn mnga Vạn Thành ară anei mâo lu tuê hiu čhưn leh anăn dưi dlăng hlăm mmăt. Êngao kơ dŭm anôk bruă duh mkra bi liê leh, snăn ƀuôn prŏng srăng đru hâo hưn, đru thiăm prăk bi liê čiăng kă thiăm klei pui mjing ktuê êlan mnga dưi hiu dlăng hlăm mlan”.

Hŏng klei tă hdră hlăm bruă čuăl mkă, mbĭt anăn mđĭ ktang ba yua klei kreh knhâo hdră mnêč hlăm bruă pla mjing lŏ hma, đăo sĭt dŭm ƀuôn mnga mơ̆ng đưm ti ƀuôn prŏng Đà Lạt srăng lŏ dơ̆ng đĭ kyar ktang leh anăn kjăp, bi msiam thiăm kơ krĭng mâo lu mnga./.