Hruê m’ak anei jing hdră bruă grăp thŭn kơ êpul êya mphŭn čô̆ kơ bruă mrâo, dôk hlăm Hdră đru mphŭn čô̆ kơ bruă mrâo hlăm kluôm ala čar truh ti thŭn 2025 (Hdră 844 mơ̆ng Khua knŭk kna).

Thŭn anei, ti Dak Lak, hdră anei dưi mkŏ mjing hŏng lu bruă msĕ si: Rang mdah lehanăn hưn mthâo 150 mta mnơ̆ng mphŭn čô̆ kơ bruă, mta mnơ̆ng OCOP, mnơ̆ng lŏ hma êdah êdi lehanăn dŭm hdră hiu čhưn ênguê ti alŭ wăl, klei bi kƀĭn trông kơ bruă mă lehanăn hdră mphŭn čô̆ kơ bruă mrâo. Đru kčĕ hră m’ar mkŏ mjing anôk bruă duh mkra, mkŏ mkra mrâo anôk bruă; hưn mthâo jia, hưn mthâo kơ ênoh čan hŏng prăk mnga hdjul, đru ba yua boh hră bi klă mrô, phần mềm ksiêm tĭng kơ anôk bruă duh mkra. Dŭm klei bi kƀĭn trông djŏ tuôm kơ hdră đru anôk bruă duh mkra ngă bruă, lŏ krŭ wĭt, bi hgŭm klei čiăng blei yua mnơ̆ng dhơ̆ng, hdră msir hlăm bruă duh mkra – pla mjing mnơ̆ng lŏ hma doh./.