Hlăm hla pŏk web dulich.daknong.gov.vn, klei hưn mdah kơ ênao êa Ta Đùng hlăk mtah mdahŏng klei iêo jak phung tue hriê čhưn hŏng Daknông. Hlăm hla pŏk web anei, phung tue dưi lŏ ksiêm duah kơ dŭm anôk hiu čhưn ênguê hing ang mơ̆ng čar, mâo mkăp leh djăp klei hâo hưn kơ tuôr hiu hlăp, kơ anôk jưh dôk, klei hiu čhưn, klei hlăp mbul, lehanăn mnơ̆ng ƀơ̆ng huă... Anei jing sa kdrêč mơ̆ng jih jang bruă hiu čhưn ênguê thâo mĭn čar Daknông ba lông ngă mơ̆ng hrue 15/12/2022. Mkă tĭng leh 3 mlan lông ngă, tui si klei ksiêm wĭt, lehanăn mă klei hriăm lehanăn bi leh, jih jang klei ba yua lehanăn mđĭ kyar bruă hiu čhưn ênguê, mđĭ kyar kjăp bruă kiă kriê, hưn mdah kơ klei hiu čhưn ênguê. Phung tuê čiăng đuĕ hiu dưi pŏk hlăm online, dlăng tuor, kčĕ kơ klei đuĕ hiu hlăm hdră êlan thâo mĭn.

Mđrăm mbĭt hŏng bruă sang čư̆ êa alŭ wăl mkŏ mjing lehanăn mđĭ kyar bruă hiu čhưn ênguê lăn mnga êa mơak hlăm klei thâo mĭn, jing anôk bruă mơ̆ng êpul grŭp dăng kông Viettel Daknông. Nguyễn Anh Tuấn, k’iăng khua kiă kriê bruă hâo hưn kdrăp mrâo Viettel Daknông, brei thâo:

“Bruă anei srăng đru kơ Knơ̆ng bruă dhar kreh - mjuăt asei mlei, lehanăn hiu čhưn ênguê čar. Bi hŏng tue snăn dưi ksiêm duah, lông hiu dlăng dhar kreh 3 kiêng lehanăn ƀuh klei jăk siam leh truh kơ Daknông”.

Mbĭt hŏng klei mđĭ kyar bruă hiu čhưn ênguê lăn mnga êa mơak hŏng klei thâo mĭn, čar Daknông hlăk hgŭm hŏng knơ̆ng bruă ksiêm duah klei kreh knhâo Việt Nam mkra rup hla kak hŏng elektronik čar Daknông. Anei jing čar tal êlâo ti Lăn Dap kngư mkŏ mjing rup hla kak hŏng elektronik bruă hiu čhưn ênguê. Hluê anăn hlak kak anei hưn mthâo hŏng mnuih pŏk dưi thâo ƀuh dŭm anôk hiu čhưn ênguê, dưi pŏk dlăng si hdră êlan arăng ngă bruă, mâo klei kăp kčĕ kơ klei hiu čhưn ênguê, mâo êdeh êdâo hiu atăt, amâodah mưn êdeh čŏng mgăt mă pô hưn mthâo kơ knăm mơak mkŏ mjing knăm mơak lehanăn dŭm tuor hiu čhưn ênguê mtrŭn ênoh...   Thạc sĩ Đào Thị Lưu, ti knơ̆ng bruă ksiêm duah klei kreh knhâo Việt Nam yăl dliê, rup hla kak hiu čhưn ênguê hŏng elektronik Daknông mkr amjing djŏ guôp hŏng klei jing klă sĭt djŏ hŏng alŭ wăl, bŏ hŏng klei găl êdi:

”Rup hla kak hiu čhưn ênguê hŏng elektronik ti čar Daknông snăn hmei ba yua rup vẹ tinh Sentinel dưi mkăp 5 hrue 1 blư̆, mơ̆ng anăn srăng dưi ksiêm klei bi mlih mơ̆ng alŭ wăl. Drei knŏng dlăng ti rup anăn drei srăng thâo ƀuh ti jing klei ghă lehanăn klei hưn mkăn, lehanăn mâo dŭm hdră mghaih msir. Hŏng rup hlak kak lŏ mâo comment pioh kơ phung tue hiu čhưn mâo dŭm klei blŭ snei, sdih, kčĕ mâo mơh”.

Dưn yua jih klei găl mơ̆ng kdrăn ƀăng k’ưp tar rŏng lăn UNESCO, truh ară anei, knơ̆ng bruă sang čư̆ êa čar Daknông čuăl mkă lehanăn duh bi liê 44 anôk truh 3 akŏ phŭn mâo: “Klei khan mơ̆ng pui lehanăn êa”; “Klei muiñ siam mơ̆ng angĭn mrâo” lehanăn “Asăp kwang mơ̆ng boh lăn”. Tui si hdră êlan hlue ngă klei bi mlih mrô hlăm bruă hiu čhưn ênguê mơ̆ng thŭn 2020-2025, čar Daknông ba yua leh kdrăp mrâo mrang pioh ngă bruă mâo klei tŭ dưn kiă kriê, hưn mdah kơ bruă hiu čhưn ênguê, kñăm iêo jak phung tue hriê čhưn, lehanăn phung duh mkra hriê duh bi liê.   Khúc Thị Thoi- K’iăng khua knơ̆ng bruă dhar kreh, mjuăt asei mlei lehanăn hiu čhưn ênguê čar Daknông brei thâo:  

“Hmei akâo leh hdră êlan mơ̆ng knơ̆ng bruă sang čư̆ êa čar pioh mkŏ mjing hdră mđĭ kyar bruă hiu čhưn ênguê anei wưng thŭn 2022-2025. Boh nik ƀrư̆ ƀrư̆ mkŏ mjing phần mềm mâo dŭm mta app hlăm đĭng blŭ thâo mĭn, leh kơ anăn srăng bi klin jih jang klei găl kơ bruă hiu čhưn ênguê, alŭ wăl hlăp mbul... Mjing djăp klei tŭ dưn kơ kluôm čar hlăm bruă hiu čhưn ênguê”.

Hŏng lu lăn mnga êa mơak, lu knhuah gru dhar kreh jăk siam, mâo kdrăn ƀăng k’ưp tar rŏng lăn tŭ yap UNESCO Daknông – anôk mâo lu ênhiang klei kưt muiñ jăk siam, Daknông jing leh pioh kơ phung tue hiu čhưn dlăng krĭng lăn mrâo. Dưn yua, mđĭ bi lar klei găl anăn, čar mâo leh ênoh čuăn truh kơ thŭn 2025 mâo ƀiă êdi sa alŭ wăl hiu čhưn ênguê djăp ênoh čuăn ala čar, lehanăn 5 alŭ anôk hiu čhưn ênguê djăp ênoh čuăn gưl čar kơ dlông. Čang hmăng hŏng dŭm knhuang nao mrâo hlăm klei ba yua kdrăp mrô, bruă hiu čhưn ênguê Daknông srăng mâo klei đĭ kyar hĭn, jing anôk truh êđăp ênang, jăk hŏng tue hlăm ala čar lehanăn mơ̆ng ala tač êngao./.