Hlue si Hdră mtrŭn mơ̆ng Khua Lăn čar kơ klei phưi mnă thŭn 2025, phung mâo phưi thŭn anei jing: Phung dôk hlăm mnă mâo wưng, phung arăng krư̆ hlăm mnă jih klei hdĭp dưi bi hrŏ leh mâo wưng, phung dôk brei mjưh êjai klei dôk hlăm mnă.

Phạm Thanh Hà, K’iăng Khua Adŭ bruă Khua lăn čar bi mklă, mơ̆ng thŭn 2009 truh ară anei, Knŭk kna ngă leh 10 gưl phưi mnă hlăm knăm mơak prŏng mơ̆ng lăn čar, phưi kơ giăm 100 êbâo čô mnă mâo hdră hriăm mjuăt, mă bruă, hriăm hră jăk wĭt hŏng êpul êya, ala ƀuôn. Boh tŭ dŭm gưl phưi mnă rơ̆ng kơ klei bhiăn kđi čar, hdră bhiăn, bruă hŏng tač êngao, mâo mnuih ƀuôn sang hlăm ala čar sa ai leh anăn ala tač êngao bi mni; lŏ dơ̆ng bi mklă hdră êlan sa anăn mơ̆ng Đảng leh anăn Knŭk kna hlăm klei mđĭ leh anăn răng mgang klei dưi anak mnuih hŏng klei mtăp mđơr kơ jih jang mnuih ƀuôn sang, wăt phung dôk hlăm mnă. Hŏng Hdră mtrŭn phưi mnă mơ̆ng Khua lăn čar, dŭm pluh êbâo čô mnuih dưi dưn klei mơak dưi wĭt hŏng gŏ sang, srăng lŏ mkŏ mjing klei hdĭp.