Indonesia leh anăn Việt Nam mâo klei găl prŏng kơ êdeh êran hŏng pui kmlă leh anăn Indonesia hmăng hmưi bi mguôp hŏng dŭm knơ̆ng bruă leh anăn knŭk kna Việt Nam čiăng mkŏ mjing wăl êdeh êran hŏng pui kmlă ASEAN. Anei jing klei hưn mơ̆ng Arsjad Rasjid khua kiă kriê adŭ bruă mnia mblei leh anăn tuh tia Indonesia (KADIN), mbĭt anăn hlŏng klam ngă Khua gĭt gai Êpul gơ̆ng đru kčĕ klei mnia mblei ASEAN 2023 (ASEAN-BAC 2023).

Arsjad Rasjid lač klă, anôk mnia mblei Ngŏ Dhŭng Asi mâo klei găl prŏng hŏng êdeh êran hŏng pui kmlă, hŏng ênoh mĭn tĭng jing 2,7 êklai dolar Mi ti thŭn 2027. Indonesia ƀuăn mtrŭt mđĭ klei bi mguôp plah wah bruă mkra mjing êdeh êran hŏng pui kmlă Indonesia leh anăn Việt Nam. Jih 2 ala čar mâo sơăi klei găl kơ êdeh êran hŏng pui kmlă, hŏng Việt Nam jing anôk čhĭ mnia êdeh êran hŏng pui kmlă prŏng tal 3 tĭ krĭng Ngŏ Dhŭng Asi leh anăn Indonesia jing anôk mnia mblei êdeh Ôtô prŏng hĭn ti alŭ wăl. Hŏng klei bi mguôp leh anăn kah mnga klei hriăm ăt msĕ hŏng ai dưi, 2 ala čar dưi ba yua jih hnơ̆ng klei găl mơ̆ng anôk mnia mblei êdeh êran hŏng pui kmlă hlăm alŭ wăl ASEAN.