Alŭ 5B, să Hoà Ninh, čar Lâm Đồng anôk aduôn aê, amĭ ama amai Ka Thuân hdĭp mda sui hŏng anei ăt jing anôk kriê pioh bruă pơ̆k mñam djuê ana. Mơ̆ng điêt, Ka Thuân mưng leh hŏng dŭm blah băn, blah mñam djuê ana phung mniê K’Ho, dŭm blah kpin, čhiăm jiă kma knhuah djuê ana.

Thŭn 2019, hlăk êjai mdei bruă knuă ti knơ̆ng bruă čiăng kriê dlăng anak điêt, Ka Thuân mphŭn čhĭ mnơ̆ng online leh anăn ƀuh lu klei mđing uêñ mơ̆ng phung akâo blei kdrăp djuê ana. Hlăm sang mâo leh masin tă kčoh, lŏ mâo ama leha năn amai mtô čoh mơ̆ng hnưm, ñu čŏng mkra mjing mnơ̆ng dhơ̆ng mơ̆ng pô, mă anăn knăl Ka Thuân Minz. Tal êlâo, ñu knŏng kčoh kdrăp djuê ana kơ ñu pô hơô nao hlăm klei huă mnăm. Ƀuh siam, lu mnuih bi mni, leh anăn kčoh msĕ snăn. Amai Ka Thuân mơak brei thâo:

 “Êlâo kơ pŏk anôk tă kčoh kdrăp djuê ana K’Ho, ti alŭ wăl kâo ƀuh lu mnuih ƀuôn sang pô khăp hơô kdrăp djuê ana mguôp hŏng kdrăp mrâo mrang. Mơ̆ng anăn kâo mâo klei mĭn mguôp kdrăp djuê ana hŏng kdrăp mrâo mrang hŏng klei čang hmăng lŏ kriê pioh dhar kreh djuê ana aduôn aê đưm, hlăk phung mda asei yua kdrăp djuê ana anei snăn anak čô thâo kơ dhar kreh djuê ana aduôn aê mơ̆ng kdrăp djuê ana, mơ̆ng anăn diñu mâo klei čiăng kriê pioh. Phung blei khăp kơ ti blah snăn pô srăng tă kčoh snăn kơ phung blei. Tơdah phung blei akâo kơ pô čoh si ngă snăn kâo srăng mkă, kčoh snăn. Phung blei kbưi hĭn jing phung Việt Nam dôk ti ala tač êngao leh anăn mnuih ala tač êngao. Anôk kâo tă kčoh knŏng mkăp hdră bruă kơ hlei pô khăp kơ kdrăp djuê ana snăn kơh kâo srăng ngă kơ diñu.”

Nah tluôn klei tŭ jing mơ̆ng Ka Thuân mâo klei hrăm mbĭt mơ̆ng gŏ sang. Ayŏng K’Hùng, ung ñu mơak ngă jih bruă hlăm gŏ sang čiăng kơ ñu mâo mmông mkra mjing kdrăp djuê ana. Amâo djŏ knŏng snăn ôh grăp blư̆ amai Ka Thuân ba mnơ̆ng dhơ̆ng hlăm klei rang mdah, hưn mthâo hlăm klei mdah kdrăp čŭt hơô hlăm čar leh anăn êngao čar ayŏng Ka Hùng lŏ hrăm mbĭt hŏng mô̆ đru bruă ktrŏ, rơ̆ng kơ klei kriê dlăng anak điêt kơ mô̆ hơĭt ai tiê hlăm bruă knuă:

 “Pô sa ai hŏng mô̆ čiăng kơ ñu  ngă bruă anei. Anei jing bruă djuê ana pô, čiăng kơ ênuk êdei lŏ thâo. Pô đru bruă hơĭt ai tiê ngă bruă, čiăng mđĭ kyar thiăm bruă anei hưn mdah kdrăp djuê ana K’Ho dưi lar amâo djŏ knŏng hlăm ala čar ôh, ƀiădah hlăm ala tač êngao ăt thâo mơh.”

 Mơ̆ng bruă hgŭm hlăm klei mdah kdrăp čŭt hơô, hưn mthâo mnơ̆ng dhơ̆ng čŭt hơô hlăm lu hla pŏk web ala ƀuôn, mnơ̆ng dhơ̆ng čŭt hơô Ka Thuân ƀrư̆ hruê mâo lu mnuih thâo. Dŭm mta mnơ̆ng dhơ̆ng djuê ana kyua amai Ka Thuân mkra mjing amâo djŏ knŏng ngă kơ mnuih hơô jhŏng hĭn ôh ƀiădah lŏ kơrŭ wĭt klei ktưn hưn. Thŭn 2024, klei mĭn mphŭn čô̆ kơ bruă “Ba kdrăp djuê ana truh kơ grăp čô mnuih” mơ̆ng Ka Thuân mâo klei pah mni mrô dua klei bi lông mphŭn čô̆ kơ bruă mlih mrâo čar Lâm Đồng tal 7. Anei amâo djŏ knŏng jing klei pah mni kơ klei mbruă ôh, ƀiădah lŏ jing klei čih yap kriê pioh leh anăn mđĭ lar knhuah dhar kreh djuê ana hlăm ênhiang hdĭp mrâo mrang.

Ayŏng K’Vũ ti să Đinh Văn Lâm Hà, brei thâo, hŏng kngan mbruă amai Ka Thuân, dŭm mnơ̆ng dhơ̆ng djuê ana dưi kriê pioh ai tiê, knhuah dhar kreh Lăn Dap Kngư, mâo klei bi mrâo mbruă djŏ guôp hŏng klei hdĭp hruê anei:

 “Kdrăp čŭt hơô djuê ana mâo lu mnuih lŏ mđing kyua ară anei dŭm mta mnơ̆ng dhơ̆ng snei ƀiă. Dŭm klei mdê hjăn tơdah pô hơô snăn yuôm bhăn snăk, ba kơ pô klei ktưn hưn leh anăn klei ƀuh jăk siam snăk. Ñu ngă thâo mbruă snăk, čiăng răng kriê snei ăt suăi snăk, dưi kriê pioh jing yuôm bhăn êdi.”

 Khăp kơ kdrăp cŭt hơô djuê ana kyua Ka Thuân mkra mjing, amai Hoàng Thị Thanh Huyền, nai mtô Sang hră gưl tlâo mnuih djuê ƀiă knŭk kna rông ba čar Lâm Đồng, brei thâo:

“Kâo ƀuh jih jang mnơ̆ng dhơ̆ng anei bi êdah ai tiê, knhuah dhar kreh djuê ana mnuih Lăn dap Kngư, knhuah djuê ana ƀiădah ăt mâo klei mrâo mrang. Lu mnơ̆ng dhơ̆ng dưi bi mrâo mơ̆ng tur knơ̆ng djuê ana, mrâo mrang leh anăn mbruă. Kâo pô jing nai mtô Sang hră  gưl tlâo mnuih djuê ƀiă knŭk kna rông ba čar Lâm Đồng snăn kâo ƀuh ktưn hưn kơ ƀuôn sang tal dua leh anăn ƀuh klei jăk siam anei brei dưi kriê pioh leh anăñ mđĭ lar lu hĭn”.

 Kreh kriăng hŏng bruă jing pô pơ̆k mñam ti ƀuôn sang, grăp thŭn, hŏng ktrei leh anăn kngan mbruă amai Ka Thuân, dŭm êtuh blah kdrăp čŭt hơô djuê ana bi leh, mâo hlăm knăm mơak, hruê bi kuôl leh anăn hlăm gưl yuôm bhăn. Boh nik, rup phung mniê hlăm hruê bi kuôl djuê ana hơô mơiêng bi kuôk djuê ana hŏng rup kđêč djuê ana jing klei ktưn hưn hĭn hŏng amai Ka Thuân.

 Ti krah klei hdĭp grăp hruê bi mlih ti Lăn Dap Kngư, amai Ka Thuân Minz ăt kriăng ti jhưng mñam, mơĭt klei khăp dhar kreh K’Ho hlăm grăp êlan kčoh. Mơ̆ng dŭm blah čŭt hơô dliê kmrơ̆ng, Ka Thuân Minz dôk mđĭ kyar klei čang hmăng kơ kdrăp čŭt hơô - klei čang hmăng kơ sa knhuah siam dưi kriê pioh, dưi mpŭ leh anăn êdah kdlưn hlăm klei hdĭp hruê anei./.